Ioane Bapatiso be lagani tamona lalonai dibura ruma ai ia noho. To Iesu ena hoa karadia edia sivarai ia kamonai. Iena hahediba taudia ese idia hamaoroa Naina hanua ai Iesu ese vabu ta ena natuna ia hatorea isi lou neganai, iena hemami mani oi laloa. To Ioane ia ura Iesu amo do ia kamonai, bema ia be Mesia. Unai dainai ena hahediba taudia rua ia siaia. Dahaka karaia totona? Idia ese Iesu do idia nanadaia: “Oi be Do Ia Mai Tauna, eiava idau tauna ta do ai naria?”​—Luka 7:19.

Reana oi laloa unai be henanadai idauna. Ioane be Dirava badinaia tauna. Lagani rua gunanai, Iesu ia bapatisoa neganai, ia itaia Iesu latanai lauma helaga ia diho, bona Dirava ena gadona ia kamonai, ia gwau Iesu ia lalonamo henia. Ita gwau lasi Ioane ena abidadama ia manoka. Badina bema unai be momokani, Iesu ese Ioane ena ladana do ia hanamoa lasi. To bema Ioane ia daradara lasi, dahaka dainai unai henanadai ia henia?

Reana Ioane ia ura Iesu sibona ese do ia hamomokania ia be Mesia. Bona unai hereva ese ia do ia hagoadaia, badina ia be dibura ruma ai ia noho. Oibe, badina namona ta dainai Ioane be unai henanadai ia henia. Ioane be Baibel ena peroveta herevadia ia diba, idia gwau Dirava ena Horoa Tauna be king ai do ia lao bona taunimanima do ia hamauria. To, Iesu ia bapatiso bena hua momo murinai, Ioane be dibura ruma ai ia noho. Unai dainai Ioane ia ura diba bema ma ta ese Iesu ena gabu do ia abia bona peroveta hereva hegeregerena, Mesia ese do ia karaia gaudia do ia hagugurua.

Iesu be maoromaoro Ioane ena hahediba taudia dekenai ia gwau lasi, ‘Oibe, idia perovetalaia Tauna be lau,’ to taunimanima edia gorere idauidau ia hanamoa karana amo ia hamomokania Dirava ena siahu amo unai ia karaia. Bena hahediba taudia ia hamaoroa: “Umui lao bona umui kamonai bona itaia gaudia be Ioane dekenai umui gwauraia: Matakepulu taudia be hari idia itaia, aena dika taudia be idia raka, lepera taudia be idia goeva, taia kudima taudia be idia kamonai, mase taudia idia toreisi lou, bona ogogami taudia be sivarai namona idia kamonai.”​—Mataio 11:4, 5.

Ioane ese Iesu dekenai unai henanadai ia henia, badina ia ura Iesu ese hoa kara ma haida do ia karaia bona reana dibura ruma amo ia do ia ruhaia. To, Iesu ese Ioane ia hamaoroa namo lasi ia laloa ia ese hoa kara ma haida do ia karaia.

Ioane ena hahediba taudia idia lao murinai, Iesu ese hutuma ia hamaoroa, Ioane be peroveta tauna sibona lasi. Ia be Malaki 3:1 ese ia perovetalaia Iehova ena “hereva gwauraia tauna.” Danu, ia be peroveta tauna Elia, Malaki 4:5, 6 ese ia perovetalaia hegeregerena. Iesu ia gwau: “Umui lau hamaoroa momokani, taunimanima ibounai amo, ta ese Ioane Bapatiso ia hereaia lasi, to guba Basileia lalonai ia maragi tauna ese Ioane ia hereaia.”​—Mataio 11:11.

 Iesu ia gwau guba Basileia lalonai ia maragi tauna ese Ioane ia hereaia anina be, Ioane be guba Basileia lalonai do ia vareai lasi. Ioane ese Iesu ena dala ia hegaegaelaia, to Ioane ia mase murinai, Keriso ese guba lao dalana ia karaia. (Heberu 10:19, 20) To, Ioane be Dirava ena abidadama peroveta tauna, bona ia be tanobada ai do ia noho, Dirava ena Basileia ena lohia henunai.