INAI hahine bona tatau rua oi diba, a? Inai hahine be Iesu ena turana ta, Maria Magadala. Bona dabua kurokuro idia karaia tatau be aneru. Maria ia itaia noho daiutu lalonai Iesu ena mase tauanina idia atoa. Ia be mase tauanina idia guria gabuna. To hari tauanina ia noho lasi! Daika ese ia abia? Mani ita itaia.

Iesu ia mase murinai, hahelaga taudia ese Pilato idia hamaoroa: ‘Iesu ia mauri neganai, ia gwau dina toi murinai do ia toreisi lou. Unai dainai oi haganidia guria gabuna do idia gimaia. Bena ena hahediba taudia ese ena tauanina do idia henaoa bona toreisi lou hereva do idia gwauraia garina.’ Pilato ese hahelaga taudia ia hamaorodia tuari taudia do idia siaia guria gabuna idia gimaia totona.

To Iesu ia mase bena dina ihatoina ai, Iehova ena aneru ta ia mai. Guria gabuna ia koua nadina ia kokia. Tuari taudia idia gari bada dainai idia marere lasi. Gabeai, guria gabuna lalonai idia itaia neganai, tauanina ia noho lasi! Tuari taudia haida be hanua dekenai idia lao bona hahelaga taudia idia hamaoroa. Unai hahelaga taudia dikadia idia karaia karana oi diba, a? Tuari taudia dekenai moni idia henia idia koikoi totona. Bona tuari taudia idia hamaoroa: ‘Umui gwau, ena hahediba taudia be hanuaboi idia mai, ai mahuta neganai, ena tauanina idia henaoa.’

Gabeai, Iesu ena turana hahine haida ese guria gabuna idia vadivadi henia. Idia hoa bada badina tauanina ia noho lasi! Bena aneru rua be mai dabua diaridiari danu idia hedinarai. Idia henanadai: ‘Dahaka dainai iniseniai Iesu umui tahua? Ia toreisi lou vadaeni. Umui lao haraga bona ena hahediba taudia umui hamaoroa.’ Unai hahine idia heau haraga! To dala dekenai tau ta ese ia koudia. Unai tauna oi diba, a? Ia be Iesu! Ia gwau: ‘Umui lao, egu hahediba taudia umui hamaoroa.’

Unai hahine be hahediba taudia dekenai Iesu ia mauri lou bona ia idia itaia sivaraina idia gwauraia neganai, idia abia dae be auka. Petero bona Ioane be guria gabuna dekenai idia heau lao idia itaia totona, to gau ta ia noho lasi! Gabu idia rakatania neganai, Maria Magadala be unuseni ia noho. Unai nega ai guria gabuna lalonai aneru rua ia itaia.

Iesu ena tauanina dekenai ia vara gauna oi diba, a? Dirava ena siahu dainai ia boio. Dirava ese Iesu be ena tauanina gunana ai ia hamauria lou lasi. Iesu dekenai lauma tauanina matamatana ia henia, guba anerudia edia tauanina bamona. To Iesu ia ura ena hahediba taudia idia diba ia mauri lou vadaeni dainai, taunimanima idia itaia diba tauanina ia karaia, gabeai unai do ita dibaia.