Eden​—Be Taunimanima Edia Noho Gabuna Ginigunana, a?

ANI inai oi laloa, oi be uma gabu ta lalonai oi noho. Siti ena regerege bada oi kamonai lasi. Inai uma gabu be bada herea, maino ia noho bona gau dikana ta ia noho lasi . Ma danu, lalohekwarahi be lasi, gorere eiava hisihisi oi mamia lasi. Gabu ibounai oi moalelaia.

Flaoa mai edia kala idauidau oi itaia, sinavai, au bona rei edia kala be namo herea dina ena diari henunai. Lai ia toa metairametaira oi mamia bona flaoa edia bonana namo herea oi bonaia. Au rauraudia edia regerege, ranu be nadi latanai ia aru, manu idia boiboi bona ane idia abia ena regena, oi kamonai diba. Unai ibounai oi laloa neganai, oi ura unai bamona gabu mai hairaina dekenai oi noho, a?

Tanobada hegegemadai momo idia laloa taunimanima edia mauri be unai bamona gabu ta dekenai ia matamaia. Lagani handred momo lalonai Iuda tomadiho, Kerisendom, bona Islam tomadiho taudia dekenai Eden uma gabu ena sivarai idia hadibaia, unuseniai Dirava ese Adamu bona Heva ia atoa. Baibel ia gwau edia mauri be namo herea. Idia ta ta bona animal huanai maino ia noho bona Dirava ida maino ai idia noho, unai gabu namo hereana ai Dirava ese idia dekenai noho hanaihanai helarona ia henia.​​—⁠Genese 2:​15-​24.

Hindu taudia be mai edia lalohadai danu idau negai paradaisona dekenai. Buddhist taudia idia abia dae tomadiho gunalaia taudia badadia, eiava Buddha, be nega vaira ai, tanobada be paradaiso bamona ia lao neganai, do idia hedinarai. Bona Africa ena tomadiho idauidau edia sivarai momo lalonai Adamu bona Heva edia sivarai idia hadibaia.

Oibe, tanobada paradaiso ia noho ena lalohadai be tomadiho bona kastom momo lalonai ia hedinarai. Histori torea tauna Jean Delumeau ia gwau: “Taunimanima momo ese paradaiso ena histori idia abia dae, unai gabu ai mauri be namo herea, maino, moale, aniani bona gau namodia momo herea idia noho, lalohekwarahi, dagedage bona hepapahuahua karadia be lasi. . . . Unai lalohadai dainai taunimanima momo idia ura bada ia boio paradaisona idia tahua.”

Unai sivarai ibounai bona kastom idauidau ese idia gwauraia herevadia be edeseni amo idia abia? Reana taunimanima momo be ia vara momokani sivaraina amo unai lalohadai idia abia, a? Idau negai, Eden umana bona Adamu bona Heva be momokani idia noho, a?

Haida be unai lalohadai dekenai idia daradara. Hari inai nega ai, momo idia laloa unai sivarai be gori bona ia be idau negai ena sivarai sibona. Hoa gauna be unai bamona idia laloa taudia haida be tomadiho idia laloa bada lasi. Danu tomadiho gunalaia taudia momo be Eden umana ena sivarai idia abia dae lasi. Idia gwau unai bamona gabu ta ia noho lasi. Idia gwau unai sivaria be gori sivaraina, eiava parabole ta, ia be sivarai korikorina lasi.

Momokani, Baibel ai parabole momo idia noho. Iesu be taunimimanima idia diba momo parabole ia gaukaralaia. To, Baibel ese Eden ena sivarai ia gwauraia, histori korikorina, ia vara momokani, parabole ta bamona lasi. Bema ita herevalaia sivarai be idia vara momokani lasi, edena bamona Baibel ena hereva ibounai ita abidadama henia diba? Namona be Eden umana ena sivarai idia abia dae lasi taudia edia lalohadai ena badina ita tahua, bona do ita itaia edia lalohadai be momokani eiava lasi. Bena do ita itaia dahaka dainai ita ta ta dekenai unai sivarai be mai anina bada.