Baibel ia gwau, taunimanima ibounai be idia kara dika. Tau ginigunana, Adamu, ia amo kara dika ura karaia ita abia. Unai dainai, nega haida kara dikadia ita karaia bena unai murinai ita lalohisihisi unai kara dainai. Dirava ena Natuna, Iesu Keriso, ese iseda kara dika totona davana ia henia bona ia mase ita totona. Ena boubou davana ese iseda kara dika gwauatao totona dala ia kehoa. Unai be harihari gauna Dirava amo.​—Roma 3:23, 24 duahia.

Taunimanima haida be kara dika badadia idia karaia bona idia daradara bema Dirava ese edia kara dika ia gwauatao diba. Ita moale badina Dirava ena hereva ia gwau: “Iesu ena rara ese kara dika ibounai amo ita ia hagoevaia.” (1 Ioane 1:7) Mai ura ida Iehova ese iseda kara dika badadia ia gwauatao henia diba bema iseda kara amo ita hahedinaraia ita helalo-kerehai momokani.​—Isaia 1:18 duahia.

Bema ita ura Iehova Dirava ese iseda kara dika ia gwauatao henia, ia ita diba be namo​—ena dala, ena sisiba, bona ena taravatudia ita lalopararalaia. (Ioane 17:3) Iehova ese idia helalo-kerehai bona edia kerere idia rakatania taudia ia gwauatao momokani.​—Kara 3:19 duahia.

Dirava ena lalonamo ita abia totona be auka lasi. Iehova ese iseda manoka gaudia ia lalopararalaia. Ia be mai ena hebogahisi bona namo. Dirava ena hebogahisi bona lalokau ese oi ia hagoadaia ia do oi hamoalea dalana do oi dibaia namonamo, a?​—Salamo 103:13, 14 duahia.