EMU MAURI lalonai mai anina bada gauna ta oi reaia, a? Bema oi be Dirava ena kara sisina sibona oi diba, anina be oi be gau ta oi reaia noho. Dahaka dainai? Badina taunimanima bilioni momo ese idia davaria bamona, Dirava dibaia karana ese edia mauri ia hanamoa. Idia abia hahenamo ese hari bona vaira negai idia ia durua diba.

Iehova Dirava, Baibel ia Torea Tauna, ia ura ia ita dibaia. Salamo torea tauna ia gwau: “Namona be taunimanima do idia diba, oiemu ladana be Iehova, Oi sibona be tanobada ibounai ena Ataiai Momokani Diravana, tanobada ibounai oi lohiaia noho.” Iehova ia diba iseda namo totona ia ita dibaia be namo. “Lau, Iehova, be emui Dirava, Lau ese umui lau hadibaia noho, namo umui davaria totona.” Iehova Dirava, Ataiai Momokani Diravana ita dibaia ena namo be dahaka?​—Salamo 83:18; Isaia 48:17.

Ena namo ta be dina ta ta ai hekwakwanai ita davaria neganai, ia ese ita ia durua vaira nega totona helaro ia henia, bona lalomaino ia henia. Danu, Iehova ena kara ita diba namonamo dainai, unai ese ita ia durua hari tanobada ibounai ai taunimanima ese idia laloa momo gaudia dekenai lalohadai maorona ita abia. Idia laloa momo gaudia be dahaka?

Emu Mauri be mai Ena Anina, A?

Ena be taunimanima edia diba teknoloji dekenai be ia bada ia lao, to idia do henanadai, “Iseda mauri ena anina be dahaka?” Bema ta be unai henanadai ena haere ia abia lasi, ia be mauri ena anina korikorina do ia diba lasi. Taunimanima momo idia mamia mauri be anina lasi. Lagani 1997 ai, Germany dekenai tahua gaukara ta ese ia hahedinaraia taunimanima 100 amo 50 idia gwau nega haida o nega momo idia mamia mauri be anina lasi. Reana emu gabu ai taunimanima be unai bamona idia mamia danu.

Bema tau ta be ena mauri ena anina ia diba lasi, do ia auka ena mauri ai tahua gaudia ia atoa totona. Unai dainai haida idia laloa namona be dagi bada idia abia eiava taga taudia ai idia lao. To idia do daradara noho. Haida be edia mauri ena badina idia diba lasi dainai idia laloa edia mauri idia hadokoa be namo. Niuspepa ta ladana International Herald Tribune ese mauri lagani 31 hahine hairaina ena sivarai ia gwauraia. “Ena be taga maurina ia noholaia, to ia mamia ena mauri be anina dainai, ia ura karaia gauna ia karaia diba.” Ia be sleeping pills eiava mahuta ena muramura ia abia bona ia mase. Reana oi danu ese edia mauri idia hadokoa kava taudia haida oi diba.

Reana oi ese taunimanima haida edia hereva oi kamonai vadaeni, idia gwau saiens taudia ese mauri ena badina idia gwauraia hedinarai diba. Germany ena niuspepa ta ladana Die Woche ia gwau: “Ena be saiens taudia edia hereva be momokani, to tomadiho bona kara maoromaoro eiava kerere dekenai edia lalohadai be idau. Evolusen ena hahediba herevana ena anina be ia hedinarai namonamo lasi, bona quantum physics (be saiens ena kahana ta, bona gau ibounai edia gaukara dalana ia herevalaia) ena hahediba herevana be ta ese ia lalopararalaia diba lasi badina diba maorona ia hadibaia lasi.” Ena be saiens taudia ese mauri gaudia idauidau bona edia mauri dalana idia gwauraia hedinarai diba, to ita dekenai mauri ena anina idia gwauraia hahedinaraia diba lasi. Bema saiens taudia edia hereva ita abidadama henia, iseda henanadai ena haere mauri ena anina totona do ita diba lasi. Niuspepa ta ladana Süddeutsche Zeitung ia gwau, “taunimanima idia ura ta ese edia henanadai do ia haerelaia.”

Iseda henanadai ibounai ia haerelaia diba tauna be ita ia Havaraia Tauna. Badina matamanai ia ese tanobada ai taunimanima ia atoa dainai, ita noho ena badina be ia sibona ia diba. Baibel ia gwau Iehova ese taunimanima ia havaraia, tanobada do idia hahonua bona do idia naria totona. Taunimanima ese idia karaia gaudia ibounai lalonai, namona be iena kara, hegeregere ena hahemaoro maoromaoro, ena aonega bona ena lalokau idia tohotohoa. Iehova ese ita ia havaraia ena badina ita diba neganai, iseda mauri ena badina korikori ita dibaia.​—Genese 1:​26-​28.

Dahaka Oi Karaia Diba?

Bema mauri ena badina ita diba lasi be edena bamona? Baibel ena heduru herevana be ia gwau Iehova oi dibaia namonamo. Unai dainai Iesu ia gwau: “Mauri hanaihanai abia totona, namona be oi, Dirava momokanina tamona, bona oi ese oi siaia tauna, Iesu Keriso, do idia dibaia.” Danu, kara namodia hegeregere lalokau oi hahedinaraia be namo. Bona Dirava ena Mesia Basileiana henunai do oi noho totona oi hekwarahi. Unai amo emu mauri be mai ena badina, bona nega vaira totona helaro namona do oi abia. Unai amo reana guna oi laloa momo henanadai badadia edia haere do oi davaria.​—Ioane 17:3; Hadibaia Tauna 12:13.

Edena dala ai unai henanadai badadia edia haere abia karana ese oi do ia durua? Tau ta ladana Hans be unai ia mamia. a Guna Dirava dekenai diba sisina sibona ia abia bona unai ese ia durua lasi. Hans ia laloa do ia moale bema drag ia abia, kara bodaga, kara gageva bona motorbike ia taria. To ia gwau: “Egu mauri be anina lasi, bona lau moale lasi. Hans ena mauri lagani be 25 bamona neganai ena lalona ia hadaia Dirava ia dibaia totona, bona Baibel duahia namonamo karana amo unai ia karaia. Iehova ia diba namonamo bona mauri ena anina korikorina ia diba neganai, Hans be ena mauri dalana ia haidaua, bapatiso ia abia bona Iehova ena Witnes ta ai ia lao. Ema bona hari be lagani ten ful-taim hesiai gaukara ia karaia noho. Hans ia gwau: “Iehova hesiai henia karana be mauridala hereadaena. Gau ta ida ita hahegeregerea lasi. Iehova lau dibaia dainai hari egu mauri be mai anina.”

Momokani, taunimanima momo be mauri ena badina sibona idia laloa momo lasi, to gau haida danu. Tanobada oromana be ia dika ia lao dainai, taunimanima momo idia lalohisihisi bona henanadai ma ta idia laloa.

Dahaka Dainai Ia Vara?

Nega momo, dika be taunimanima ta dekenai ia vara neganai, henanadai tamona sibona ia laloa: “Dahaka dainai ia vara? Ta be dika ia haheaukalaia totona, ena henanadai ena haere maorona ia abia neganai, do ia moale. To bema ta be haere maorona ia abia lasi, do ia badu diba. Mani hahine ta ladana Bruni ena sivarai ita laloa.

Bruni be sinana ta bona ena mauri lagani be 50 bamona, ia gwau: “Lagani haida idia ore vadaeni bona egu natuna kekeni maragi ia mase. Dirava lau abidadama henia dainai egu dubu ena pris dekenai lau lao lalogoada herevadia lau abia totona. Ia gwau Dirava ese Susan ia abia lao guba dekenai bona hari ia be aneru ta. Ia mase dainai lau lalohisihisi bada, to hari Dirava dekenai lau badu, badina egu natuna ia abia.” Lagani haida lalonai Bruni be ia hisihisi noho. Bena “dina ta Iehova ena Witnes ta be Baibel amo ia hahedinarai Dirava lau badu henia be anina lasi. Iehova ese Susan be guba dekenai ia abia lao lasi, bona ia be aneru lasi. Ia gorere badina ita ibounai be goevadae lasi. Susan be mase lalonai ia mahuta noho bona Iehova ia naria noho, ia do ia hatorea isi lou. Danu, lau davaria ia ese taunimanima ia havaraia tanobada paradaisona lalonai idia noho ela bona hanaihanai totona, bona unai nega be kahirakahira. Iehova ena kara korikorina lau dibaia neganai, ia kahirakahira lau lao bona lau lalohisihisi lasi.”​—Salamo 37:29; Kara 24:15; Roma 5:​12.

Taunimanima milioni momo be hekwakwanai idauidau idia davaria noho. Hegeregere ta ena hekwakwanai, tuari, hitolo bada eiava disasta badana. Bruni be Baibel ai ia itaia Iehova be ita davaria hisihisi eiava dika ia havaraia lasi neganai, bona kahirakahira Iehova ese dika do ia haorea, unai dainai ia moale. Momokani, kara dika be ia bada ia lao noho badina ita be inai tanobada oromana ena “dina gabedia” ai ita noho. Ita ibounai ese ita naria nohonega namona be kahirakahira do ia vara.​—2 Timoteo 3:​1-5; Mataio 24:​7, 8.

Dirava Idia Dibaia Dalana

Hans bona Bruni be Dirava idia diba sisina. Idia abidadama henia to ena kara idia diba namonamo lasi. Bona Iehova idia dibaia totona nega idia atoa bena diba maorona idia abia neganai, namo idia davaria. Idia be hari taunimanima ese idia laloa momo henanadai badadia edia haere maorodia idia davaria. Unai ese idia dekenai lalomaino bona nega vaira totona helaro namona ia henia. Iehova ena hesiai taudia milioni momo be unai bamona moale idia davaria danu.

Iehova ita diba namonamo totona, gau ginigunana be Baibel ita duahia, badina Baibel ese ita dekenai Iehova ena kara bona ena ura ia gwauraia hedinarai. Keristani taudia ginigunadia edia nega ai, haida be unai bamona idia karaia danu. Histori torea tauna bona doketa tauna Luka ia gwau, Greece hanua ta ladana Berea dekenai idia noho Iuda kongrigeisen be “mai edia ura bada ida Dirava ena hereva idia kamonai [Paulo bona Sila ese idia hadibaia herevana] bona dina ta ta ai Toretore Helagadia idia tahua namonamo bema idia kamonai herevadia be momokani eiava lasi.”​—Kara 17:10, 11.

Keristani taudia ginigunadia be kongrigeisen idauidau ai idia hebou. (Kara 2:​41, 42, 46; 1 Korinto 1:​1, 2; Galatia 1:​1, 2; 2 Tesalonika 1:1) Hari danu, Iehova ena Witnes taudia be edia kongrigeisen ta ta ai idia hebou bona unai hebou ta ta ese taunimanima ia durua Iehova kahirakahira idia lao bona mai moale ida ena gaukara idia karaia diba totona. Emu gabu dekenai idia noho Witnes taudia oi bamoa neganai, hahenamo ma momo oi davaria diba. Ena be idia be goevadae lasi, to Iehova ena Witnes taudia ese Iehova ena kara namodia idia hahedinaraia diba. Unai dainai Witnes taudia edia hebou dekenai ita lao neganai, Iehova do ita dibaia namonamo.​—Heberu 10:24, 25.

Reana do oi laloa Dirava lau dibaia totona inai gaudia ibounai do lau karaia, a? Momokani, unai be mai hekwarahi. To iseda mauri lalonai, ita ura abia gaudia ibounai be ita gaukara goada bona ita abia. Mani oi laloa heau helulu tauna be hanaihanai ia treinini. Hegeregere, France ai Olympic gadara, skiing (aisi ai gadara karana)amo golo medol ia abia tauna Jean-Claude Killy ese intanesinol spot gadara dekenai ia kwalimu totona ia hegaegae karana ia herevalaia, ia gwau: “Gadara negana be do lasi neganai, lagani ten do oi treinini, bona lagani momo lalonai palani namona oi karaia bona dina ibounai do oi lalohadailaia. Unai ena anina be lagani ta lalonai dina 365 unai do oi laloa lou lou bona emu tauanina oi treinia.” Nega bada ia haorea bona ia hekwarahi bada ia treinini totona, to karaia heau helulu be minit ten sibona! To bema ita hekwarahi Iehova ita dibaia totona, ita davaria hahenamo ena bada be heau helulu ai idia kwalimu ena namo ia hereaia bona ia be do ia noho hanaihanai gauna.

Ia Bada ia Lao Hebamo Karana ta

Daika ia ura ena mauri lalonai gau hereadaena ta ia reaia? Ta lasi, ani? Unai dainai, bema oi laloa emu mauri be anina lasi eiava bema oi ura dika ia vara ena badina oi diba, namona be emu lalona oi hadaia Iehova, Baibel ena Dirava, oi dibaia totona. Iehova oi dibaia karana ese emu mauri do ia hanamoa ela bona hanaihanai.

Iehova ita dibaia karana be do ia ore, a? Ena be taunimanima haida be lagani momo ena hesiai gaukara idia karaia, to Iehova dekenai idia dibaia gaudia bona idia dibaia noho gau matamatadia dainai idia hoa bada. Iehova dekenai ita dibaia gaudia dainai ita moale bona ia kahirakahira ita lao. Namona be aposetolo Paulo hegeregerena ita gwau: “Dirava ena taga, ena aonega bona ena diba be dobu momokani! Iena hahemaoro karadia be ta ese ia tahua diba lasi bona ena dala ibounai be ta ese ia lalopararalaia diba lasi! Badina ‘daika be Iehova ena lalohadai ia diba? Eiava daika be iena sisiba tauna ai ia lao?’”​—Roma 11:33, 34.

[Futnout]

[Blurb]

Idia do henanadai, “Iseda mauri ena anina be dahaka?”’

[Blurb]

“Iehova ena kara korikorina lau dibaia neganai, ia kahirakahira lau lao”

[Blurb]

“Iehova hesiai henia karana be mauridala hereadaena. Gau ta ida ita hahegeregerea lasi. Iehova lau dibaia dainai hari egu mauri be mai anina”