Ioane 13:1-38
13 Pasova aria do lasi neganai, Iesu ia diba ena nega ia ginidae vadaeni ia be inai tanobada do ia rakatania, bona Tamana dekenai do ia lao. Iesu be tanobada ai ia murinai idia raka taudia ia lalokau henidia ela bona dokona.
2 Hanuaboi ai idia do aniani noho, bona Diabolo ese Simona ena natuna, Iuda Iskariote, ena kudouna ai, Iesu ena mase dalana karaia lalohadaina ia atoa vadaeni.
3 Iesu ia diba Tamana ese gau ibounai be ena imana dekenai ia atoa vadaeni bona ia be Dirava amo ia mai bona Dirava dekenai do ia lao.
4 Vadaeni ia be pata amo ia toreisi bona ena atai dabua ia kokia. Bena tauele ta ia abia bona ena gabana ai ia kwatua.
5 Unai murinai disi ta lalonai ranu ia bubua bona ena hahediba taudia edia aena ia huria matamaia, bena ena gabana ai ia kwatua tauele amo edia aena ia hakaukaua.
6 Ia be Simona Petero dekenai ia mai neganai, Petero be ia dekenai ia gwau: “Lohiabada e, egu aena do oi huria, a?”
7 Iesu ese ia haere henia, ia gwau: “Lau karaia gauna be hari oi lalopararalaia lasi, to gabeai do oi laloparara.”
8 Petero be ia dekenai ia gwau: “Oi be egu aena do oi huria lasi momokani.” Iesu ese ia haere henia, ia gwau: “Bema oiemu aena lau huria lasi, lau ida do oi noho diba lasi.”
9 Simona Petero be ia dekenai ia gwau: “Lohiabada e, egu aena sibona lasi, to egu imana bona kwarana danu.”
10 Iesu be ia dekenai ia gwau: “Ia digu vadaeni tauna be ena aena sibona ia huria be namo, badina ena tauanina ibounai ia goeva. Umui be umui goeva, to umui ibounai lasi.”
11 Iesu be ena mase dalana do ia karaia tauna ia diba. Unai dainai ia gwau: “Umui ibounai be umui goeva lasi.”
12 Vadaeni edia aena ia huria murinai, ena atai dabua ia hahedokilaia bena pata dekenai ia helai lou, bona idia dekenai ia gwau: “Umui dekenai lau karaia karana umui lalopararalaia, a?
13 Lau umui gwauraia ‘Hadibaia Tauna’ bona ‘Lohiabada’ bona umui hereva maoro, badina lau be unai bamona tauna.
14 Unai dainai, bema lau, Lohiabada bona Hadibaia Tauna, ese emui aena lau huria, umui danu ese ta ta emui aena umui huria be namo.
15 Lau ese umui dekenai dala lau hahedinaraia vadaeni, umui dekenai lau karaia hegeregerena, umui danu unai bamona umui karaia be namo.
16 Umui lau hamaoroa momokani, igui hesiai tauna ese ena biaguna ia hereaia lasi, bona tau ta ese ia siaia tauna be ia ia siaia tauna ia hereaia lasi.
17 Bema unai gaudia umui diba bona bema umui karaia, do umui moale.
18 Lau be umui ibounai lau herevalaia lasi. Lau abia hidi taudia lau diba. Unai amo Toretore Helagadia do ia guguru, ia gwau: ‘Guna egu paraoa ia ania tauna be egu inai tauna ai ia lao.’
19 Ia do vara lasi gauna be hari umui lau hamaoroa. Unai amo ia vara neganai, do umui abia dae lau be ia.
20 Umui lau hamaoroa momokani, lau ia siaia tauna ia abia dae tauna ese lau danu ia abia dae. Bona lau ia abia dae tauna ese lau ia siaia tauna danu ia abia dae.”
21 Iesu ese unai gaudia ia gwauraia murinai, ia lalohekwarahi* bada. Bona ia hereva hedinarai, ia gwau: “Umui lau hamaoroa momokani, umui ta ese egu mase dalana do ia karaia.”
22 Hahediba taudia be ta ta idia itaia matamaia, idia daradara ia be daika ia herevalaia.
23 Iesu ena hahediba tauna ta be ia badinai ia helai, Iesu ese ia lalokau henia.
24 Unai dainai Simona Petero be ia dekenai ia lado* bona ia gwau: “Ai oi hamaoroa, ia be daika ia herevalaia.”
25 Vadaeni ia be Iesu ena kemena kahirakahira ia lao bona ia gwau: “Lohiabada e, unai be daika?”
26 Unai dainai Iesu ia haere, ia gwau: “Aniani disi lalonai paraoa sisina lau atoa bona lau henia tauna be ia.” Vadaeni Iesu ese paraoa sisina ia abia, disi lalonai ia atoa bena Simona Iskariote ena natuna, Iuda, dekenai ia henia.
27 Bena Iuda ese paraoa ia abia murinai, Satani be Iuda ena lalona dekenai ia vareai. Unai dainai Iesu be ia dekenai ia gwau: “Oi ura karaia gauna oi karaia haraga.”
28 To pata dekenai idia helai taudia ta ia diba lasi dahaka dainai Iuda dekenai unai hereva ia gwauraia.
29 Oibe, Iuda be moni mauana ia dogoatao dainai, haida idia laloa Iesu be ia dekenai ia gwau: “Aria ai do ita gaukaralaia gaudia oi hoia,” eiava namona be ogogami taudia dekenai gau ta do ia henia.
30 Unai dainai, paraoa sisina ia abia murinai, maoromaoro ia raka-lasi. Bona unai be hanuaboi vadaeni.
31 Vadaeni Iuda ia raka-lasi murinai, Iesu ia gwau: “Hari taunimanima ena Natuna be hairai ia abia, bona ia amo Dirava danu be hairai ia abia.
32 Bona Dirava sibona ese ia dekenai hairai do ia henia bona ia dekenai unai hairai do ia henia haraga.
33 Lauegu lalokau natudia e, nega sisina sibona umui danu do lau noho. Lau do umui tahua bona Iuda taudia dekenai lau hereva bamona, ‘Lau lao gabuna dekenai umui mai diba lasi.’ Unai hereva be hari umui dekenai lau gwauraia danu.
34 Umui dekenai taravatu matamata lau henia inai, do umui lalokau heheni, lau ese umui lau lalokau henia hegeregerena, umui danu do umui lalokau heheni.
35 Unai amo taunimanima ibounai do idia diba umui be egu hahediba taudia, bema umui huanai lalokau ia noho.”
36 Simona Petero be ia dekenai ia gwau: “Lohiabada e, edeseni do oi lao?” Iesu ia haere, ia gwau: “Do lau lao gabuna dekenai hari oi mai diba lasi, to gabeai do oi mai.”
37 Petero be ia dekenai ia gwau: “Lohiabada e, dahaka dainai hari oi murinai lau mai diba lasi? Oi dainai egu mauri do lau atoa diho.”
38 Iesu ia haere, ia gwau: “Emu mauri* be lau dainai do oi atoa diho, a? Oi lau hamaoroa momokani, kokoroku be do ia tai lasi ela bona nega toi lau do oi gorea.”
