2 Petero 2:1-22
2 Gunaguna peroveta koikoi taudia be Dirava ena taunimanima huanai idia noho, unai hegeregerena umui huanai danu hadibaia koikoi taudia do idia noho. Idia ese hehuni dalanai orea hapararaia karana do idia havaraia emui abidadama hadikaia totona, bona edia biaguna, idia ia hoia tauna, do idia dadaraia, vadaeni karaharaga idia sibona latanai dika do idia mailaia.
2 Ma danu, momo ese unai taudia edia gwau-edeede hemarai karadia* do idia badinaia bona unai gaudia dainai haida ese hereva momokani ena dala do idia gwauraia dika.
3 Danu, mataganigani dainai koikoi herevadia do idia gaukaralaia gau haida idia abia totona. To Dirava ese idaunegai idia totona ia gwauraia panisi be ia metairametaira lasi, bona edia hadikaia ore negana be do ia mai momokani.
4 Dirava ese idia kara dika aneru ia panisidia bona Tataros* dekenai ia negedia. Bona ia ese dibura masemase gurina dekenai ia atodia, unuseniai do idia noho ela bona hahemaoro negana.
5 Bona Dirava idia badinaia lasi taudia latanai abata badana ia mailaia neganai, ia ese guna ia noho tanobadana ia panisia, to kara maoromaoro ia harorolaia tauna Noa, bona ma taunimanima 7 ia hamauria.
6 Danu, ia ese inai taoni, Sodoma bona Gomora be kahu ai ia halaodia neganai ia panisidia, unai amo Dirava idia badinaia lasi taudia dekenai do ia vara gauna ia haheitalaia.
7 Bona ia ese kara maoromaoro tauna Lota ia hamauria. Ia be taravatu utua taudia edia kara dainai ia lalometau bada, badina idia ese edia gwau-edeede hemarai karadia* idia habadaia momokani.
8 (Unai kara maoromaoro tauna be edia huanai ia noho, bona dina ibounai unai taravatu utua taudia idia karaia gaudia ia itaia bona kamonai dainai, ena lalona ia hisihisi bada.)
9 Iehova ese ia idia badinaia taudia be hahetoho amo ia hamauridia dalana ia diba, to kara maoromaoro lasi taudia ia guidia, ena hahemaoro negana ai ia hadikadia ore totona.
10 Unai be do ia vara momokani inai taudia dekenai, dala idia tahua ma haida ida idia mahuta hebou, idia hamirodia totona, bona lohia taudia idia laloa maragi.
Idia be idia hekokoroku, sibodia idia laloa, bona idia gari lasi hairai idia abia taudia idia gwauraia dika totona.
11 Ena be aneru edia siahu bona goada be bada, to idia ese hadikaia herevadia amo hadibaia koikoi taudia idia samania lasi, badina Iehova idia matauraia.
12 To unai tatau be animal bamona. Animal be mai edia lalona lasi, to edia ura sibona idia badinaia, idia vara bena taunimanima ese idia guidia bona idia hamasedia. Unai tatau be unai lalona lasi animal bamona, idia diba lasi gaudia idia gwauraia dika, idia be edia dala dikana ai do idia mase ore,
13 oibe, unai dala dikana idia badinaia dainai unai dika do idia davaria, unai be edia davana dikana.
Idia laloa dina ai edia tauanina ena ura idia hagugurua karana be moale gauna. Umui huanai idia be miro bona maka gaudia. Bona umui ida idia aniani hebou neganai, edia hadibaia hereva koikoidia amo umui idia hakaua kerere, bona unai idia moalelaia bada.
14 Idia ura bada idia heudahanai* bona kara dika idia hadokoa diba lasi, bona manoka taudia* idia koia. Edia kudouna be mataganigani karana dekenai ia manada. Idia be dika taudia.
15 Dala maorona idia rakatania, bona dala kererena idia badinaia. Idia ese Balama, Beoro ena natuna, ena dala idia badinaia, ia be kara kerere ena davana ia ura henia bada,
16 bona taravatu ia utua dainai sisiba ia abia. Ia hereva diba lasi doniki be taunimanima edia gadona ai ia hereva, unai amo peroveta tauna ena kavakava karana ia koua.
17 Idia be ranu ia noho lasi ranu guridia bamona, bona lai gubana ese ia odaia lao ori bamona, bona dibura masemase be ia noho hegaegae idia totona.
18 Idia ese sibodia idia abia isi herevadia, anina lasi herevadia unai, idia gwauraia. Bona idia ese tauanina ena ura, bona gwau-edeede hemarai karadia* amo, kerere taudia amo idia heau siri noho taudia idia koia.
19 Idia gwauhamata unai taudia be ura kwalimu do idia abia, to idia be do dika ena igui hesiai taudia. Badina bema gau ta ese tau ta ia biagua, unai tauna be unai gauna ena igui hesiai tauna ai ia lao.
20 Momokani, Lohiabada bona Hamauria Tauna Iesu Keriso ena diba maoromaoro dainai, inai tanobada ena dika amo idia heau mauri taudia be unai gaudia ma idia karaia lou, bona unai gaudia ese ia biagudia, vadaeni hari edia noho dalana ia dika momokani, guna bamona lasi.
21 Do ia namo bema idia ese kara maoromaoro ena dala dekenai diba maoromaoro idia abia lasi, badina unai diba maoromaoro idia abia murinai, Dirava ese idia dekenai ia henia taravatu helagana idia dadaraia.
22 Idia dekenai inai aonega herevana ia momokani: “Sisia be ena mumuta dekenai ia giroa lou, bona boroma be ia digu murinai ia giroa lou bona kopukopu dekenai ia giroagiroa.”
