matti ke mutabik khushkhabri 13:1-58
-
beej bonevala (1-9)
-
yeeshu misalein kyon deta tha (10-17)
-
bonevale ki misal ka matlab samjhaya (18-23)
-
gehoon aur jangli paudhe (24-30)
-
raai ka daana aur khameer (31-33)
-
yeeshu ne misalein batakar bhavishyavani poori ki (34, 35)
-
gehoon aur jangli paudhon ka matlab samjhaya (36-43)
-
chhipa khazana aur beshkeemti moti (44-46)
-
bada jaal (47-50)
-
khazane se nayi aur purani cheezen (51, 52)
-
-
yeeshu apne ilake mein thukraya gaya (53-58)
13 us din yeeshu ghar se nikaalne ke baad jheel ke kinare baitha hua tha.
2 tab logon ki ek badi bheed uske paas ikattha ho gayi, isliye woh ek naav par chadhkar baith gaya aur saari bheed kinare par khadi hui thi.+
3 fir usne misalein dekar unhein bahot-si baatein batayin.+ usne kaha, “dekho! ek beej bonevala beej bone nikala.+
4 jab woh bo raha tha, to kuch beej raaste ke kinare gire aur panchhi aakaar unhein khaa gaye.+
5 kuch beej aisi zameen par gire jahaan zyada mitti nahin thi, kyonki mitti ke neeche chattan thi. in beejon ke ankur fauran dikhayi dene lage kyonki vahaan mitti gehri nahin thi.+
6 lekin jab sooraj nikala, to woh jhulas gaye aur jad na pakadne ki vajah se sookh gaye.
7 kuch aur beej kaanton mein gire aur kanteele paudhon ne badhkar unhein daba diya.+
8 magar kuch aur beej badhiya mitti par gire aur unmein fal aane lage. kisi mein 100 guna, kisi mein 60 guna to kisi mein 30 guna.+
9 kaan lagakar suno ki main kya kah raha hoon.”+
10 fir chele yeeshu ke paas aakaar poochhne lage, “tu logon ko misalein dekar kyon sikhata hai?”+
11 tab usne yah javab diya, “swarg ke raaj ke pavitra rehasyon ki samajh+ tumhein di gayi hai, magar un logon ko nahin di gayi.
12 kyonki jis kisi ke paas hai, use aur diya jaayega aur uske paas bahot ho jaayega. magar jis kisi ke paas nahin hai, usse woh bhi le liya jaayega jo uske paas hai.+
13 main unhein isliye misalein batata hoon kyonki woh dekhte huye bhi nahin dekhte aur sunte huye bhi nahin sunte, na hi iske maayne samajhte hain.+
14 un par yashayah ki yah bhavishyavani poori hoti hai, jo kehti hai, ‘tum log sunoge magar sunte huye bhi iske maayne bilkul nahin samajh paaoge. aur dekhoge magar dekhte huye bhi bilkul nahin dekh paaoge.+
15 kyonki in logon ka man sunna ho chuka hai. woh apne kaanon se sunte to hain, magar kuch karte nahin. unhonne apni aankhein moond li hain taaki na woh kabhi apni aankhon se dekhein, na apne kaanon se sunein aur na kabhi unka man iske maayne samjhe aur na woh palatkar laut aayen aur main unhein changa karoon.’+
16 magar sukhi ho tum kyonki tumhari aankhein dekhti hain aur tumhare kaan sunte hain.+
17 main tumse sach kehta hoon, bahot-se bhavishyavaktaon aur nek logon ne chaha tha ki woh sab dekhein jo tum dekh rahe ho, magar nahin dekh sake+ aur woh baatein sunein jo tum sun rahe ho, magar nahin sun sake.
18 ab tum beej bonevale ki misal par dhyan do.+
19 jo insan raaj ka vachan sunta to hai magar uske maayne nahin samajhta, uske dil mein jo boya gaya tha use shaitan*+ aakaar chheen le jaata hai. yah vahi beej hai jo raaste ke kinare boya gaya tha.+
20 jo chattani zameen par boya gaya tha, yah woh insan hai jo vachan ko sunte hi use khushi-khushi sweekar karta hai.+
21 magar usmein jad nahin hoti isliye woh thode vakt ke liye rehta hai aur jab vachan ki vajah se use museebatein ya zulm sehne padte hain, to woh fauran vachan par vishvas karna chhod deta hai.*
22 jo kaanton ke beech boya gaya hai, yah woh insan hai jo vachan ko sunta to hai, magar is zamane* ki zindagi ki chinta+ aur dhokha denevali paise ki taakat vachan ko daba deti hai aur woh fal nahin deta.+
23 jo badhiya mitti mein boya gaya hai, yah woh insan hai jo vachan ko sunta hai, uske maayne samajhta hai aur vaakai fal deta hai, koi 100 guna, koi 60 guna aur koi 30 guna.”+
24 yeeshu ne bheed ko ek aur misal batayi, “swarg ke raaj ki tulna ek aise aadmi se ki jaa sakti hai, jisne apne khet mein badhiya beej boye.
25 jab log raat ko so rahe the, to uska dushman aaya aur gehoon ke beech jangli paudhe ke beej bokar chala gaya.
26 jab paudhe bade huye aur unmein baalein aayin, to jangli paudhe bhi dikhayi dene lage.
27 isliye us aadmi ke daason ne aakaar usse kaha, ‘maalik, kya toone apne khet mein badhiya beej nahin boye the? to fir usmein jangli paudhe kahaan se ug aaye?’
28 maalik ne kaha, ‘yah ek dushman ka kaam hai.’+ tab unhonne kaha, ‘agar tu kahe to kya hum jangli paudhon ko ukhaadkar bator lein?’
29 usne kaha, ‘nahin! kahin aisa na ho ki jangli paudhe ukhaadte vakt tum unke saath gehoon bhi ukhaad do.
30 katai ka samay aane tak unhein saath-saath badhne do. jab katai ke din aayenge, to main kaatnevalon se kahoonga ki pehale jangli paudhon ko ukhaadkar unhein gattharon mein baandh do taaki unhein jala diya jaaye, uske baad tum gehoon ko mere godam mein jama karo.’”+
31 usne logon ko ek aur misal di, “swarg ka raaj raai ke daane ki tarah hai, jise ek aadmi ne lekar apne khet mein bo diya.+
32 darasal woh beejon mein sabse chhota hota hai, magar jab woh ugta hai to sabziyon ke paudhon mein sabse bada ho jaata hai aur ek ped ban jaata hai. yahaan tak ki aakash ke panchhi aakaar uski daaliyon par basera karte hain.”
33 usne unhein ek aur misal batayi, “swarg ka raaj khameer ki tarah hai, jise lekar ek aurat ne kareeb 10 kilo* aate mein goondh diya, aakhir mein saara aata khameera ho gaya.”+
34 yeeshu ne bheed ko ye saari baatein misalein dekar batayin. vaakai, woh bagair misal ke unse baat nahin karta tha+
35 taaki yah baat poori ho jo bhavishyavakta se kehalvayi gayi thi, “main misalein dekar sikhaunga aur woh baatein bataunga jo shurooat* se chhipi hui hain.”+
36 iske baad yeeshu bheed ko vida karke ghar mein gaya. uske chele uske paas aakaar kehne lage, “hamein khet ke jangli paudhon ki misal ka matlab samjha.”
37 usne kaha, “badhiya beej bonevala, insan ka beta hai.
38 khet, duniya hai.+ badhiya beej, raaj ke bete hain. magar jangli paudhon ke beej, shaitan* ke bete hain+
39 aur jis dushman ne inhein boya hai, woh shaitan hai. katai, duniya ki vyavastha* ka aakhiri vakt hai aur katai karnevale swargdoot hain.
40 isliye theek jaise jangli daane ke paudhon ko ukhaadkar aag mein jala diya jaata hai, vaise hi is duniya ki vyavastha* ke aakhiri vakt mein hoga.+
41 insan ka beta apne swargdooton ko bhejega aur woh uske raaj se un sab logon ko ikattha kareinge, jo doosron ko paap ki taraf le jaate hain* aur unhein bhi jo dusht kaam karte hain.
42 swargdoot unhein aag ki bhatthi mein jhonk deinge,+ jahaan woh royenge aur daant peeseinge.
43 us vakt nek jan apne pita ke raaj mein sooraj ki tarah tez chamkeinge.+ kaan lagakar suno ki main kya kah raha hoon.
44 swarg ka raaj zameen mein chhipe khazane ki tarah hai jo ek aadmi ko milta hai. woh ise dobara vahin chhipa deta hai aur khushi ke maare jaakaar apna sabkuch bech deta hai aur us zameen ko khareed leta hai.+
45 iske alava, swarg ka raaj ek aise vyapari ki tarah hai, jo behtareen kism ke motiyon ki talash mein ghoomta hai.
46 aur jab use ek beshkeemti moti mila, to usne jaakaar fauran apna sabkuch bech diya aur woh moti khareed liya.+
47 saath hi, swarg ka raaj ek bade jaal ki tarah hai, jise samundar mein daala gaya aur jisne har kism ki machhliyaan samet lin.
48 jab jaal bhar gaya to woh use khinchkar kinare par laaye aur baithkar achhi machhliyon+ ko bartanon mein ikattha kiya, jabki bekar machhliyon+ ko unhonne feink diya.
49 is duniya ki vyavastha* ke aakhiri vakt mein bhi aisa hi hoga: swargdoot jaakaar dushton ko nek janon se alag kareinge.
50 aur dushton ko aag ki bhatthi mein daal deinge, jahaan woh royenge aur daant peeseinge.
51 kya tum in sab baaton ke maayne samjhe?” unhonne kaha, “haan.”
52 usne unse kaha, “agar aisa hai, to logon ko sikhanevala har updeshak jise swarg ke raaj ke baare mein sikhaya gaya hai, ghar ke us maalik ki tarah hai jo apne khazane se nayi aur purani cheezen baahar laata hai.”
53 ye misalein batane ke baad yeeshu vahaan se chala gaya.
54 woh apne ilake mein aaya jahaan woh pala-badha tha.+ woh sabha-ghar mein logon ko sikhane laga. woh uski baatein sunkar hairan reh gaye aur kehne lage, “is aadmi ko aisi buddhi kahaan se mili aur yah aise shaktishali kaam kaise kar paa raha hai?+
55 kya yah badhai ka beta nahin?+ kya iski maa ka naam mariyam nahin aur iske bhaai yakub, yoosuf, shamaun aur yahooda nahin?+
56 aur iski behenein bhi kya hamare beech nahin rehtin? to fir, is aadmi ko ye saari baatein kahaan se aa gayin?”+
57 isliye unhonne us par yakeen nahin kiya.+ magar yeeshu ne unse kaha, “ek bhavishyavakta ka har kahin aadar kiya jaata hai, sirf uske apne ilake aur ghar mein nahin kiya jaata.”+
58 unke vishvas ki kami ki vajah se usne vahaan zyada chamatkar nahin kiye.
