Bẹsọn décembre 2012, Kunnudetọ Jehovah tọn lẹ to Thaïlande basi nujijla vonọtaun de nado gọalọna wehọmẹvi lẹ nado wazọ́n ganji to wehọmẹ. Kunnudetọ 20 he ko whẹ́n mẹho wẹ gbọn wehọmẹ voovo lẹ to Bangkok. Yé yì ogán wehọmẹ dopodopo tọn dè bo ze Réveillez-vous! octobre 2012 tọn jo na mẹplọntọ lẹ po wehọmẹvi lẹ po. Hosọ Réveillez-vous! lọ tọn wẹ “Réussir sa scolarité,” (Lehe A Sọgan Tindo Kọdetọn Dagbe Do to Wehọmẹ.)

Na nujijla lọ tindo kọdetọn dagbe wutu, Kunnudetọ lẹ dlẹnkanna ẹn gbọn otò lọ blebu mẹ. To owhe dopo daa he bọdego gblamẹ, yé gbọn wehọ voovo 830 mẹ. Na yé mọdọ wehọmẹvi po mẹplọntọ susu po wẹ to jejeji nado mọ vọkan Réveillez-vous! ehe tọn yí wutu, yé to dandannu glọ nado vọ́ Réveillez-vous! lọ zinjẹgbonu whla atọ̀n dogọ na mẹlẹpo nido sọgan mọ ẹn yí. To tintan whenu, vọkan Réveillez-vous! octobre 2012 tọn 30 000 wẹ yin zinzinjẹgbonu. Ṣigba, na mẹsusu wẹ yiwanna hosọ lọ wutu, vọkan etọn 650 000 linlán wẹ yin mimá!

E ma dẹn bọ ogán wehọmẹ tọn lẹ po mẹplọntọ lẹ po doayi e go dọ Réveillez-vous! lọ plọnnumẹ taun. Mẹplọntọ de dọmọ: “Linlinwe lọ na gọalọna wehọmẹvi mítọn lẹ nado vẹ́ po whẹndo yetọn lẹ po dogọ podọ nado dovivẹnu bo jẹ yanwle dagbe lẹ kọ̀n.” Wehọmẹ delẹ yí nudọnamẹ linlinwe lọ tọn lẹ dogọ todohukanji nupinplọn tọn yetọn. Wehọmẹ devo lẹ yí linlinwe lọ zan nado nọ hiawe to klasi. To wehọ de mẹ, wehọmẹvi lẹ yin azọ́ndena nado kàn linlin delẹ sinai do Réveillez-vous! lọ ji, podọ mẹhe wazọ́n lọ ganji lẹ mọ ajọ̀ yí.

Wehọmẹvi yọnnu de yiwanna hosọ lọ “Jeunesse et obésité​—La guerre est déclarée!,” (Lehe Jọja lẹ Sọgan Duto Kiklo Zẹjlẹgo Ji Do) he tin to linlinwe lọ mẹ. E basi zẹẹmẹ dọ mẹsusu wẹ kiklo zẹjlẹgo to tukladona, podọ họntọn etọn lẹ ma nọ voawu nado dọhona mẹdevo lẹ gandego. E dọmọ: “Mì wanu nado namẹ ayinamẹ he họnwun bo bọawu nado yí do yizan mẹ enẹlẹ.”

Mẹjitọ lẹ lọsu yọ́n pinpẹn linlinwe lọ tọn. Onọ̀ de dọnudo Kunnudetọ he dla ẹ pọ́n to owhé etọn gbè lẹ na linlinwe lọ, bo dọmọ: “Nudọnamẹ titengbe he linlinwe lọ bẹhẹn lẹ na gọalọna viyọnnu ṣie nado tindo kọdetọn dagbe to wehọmẹ.”

Pichai Petratyotin, he yin dopo to afọzedaitọ Kunnudetọ Jehovah tọn lẹ tọn mẹ to Thaïlande, dọmọ: “Réveillez-vous! nọ dohia hezeheze dọ nuyọnẹn he tin to Biblu mẹ ma nọ dohó, e nọ hẹn ale wá na gbẹtọ lẹ to egbehe nugbonugbo. Kunnudetọ Jehovah tọn lẹ yọnẹn dọ nujọnu taun wẹ wepinplọn yin, enẹwutu homẹ mítọn hùn nado hẹn linlinnamẹwe ehe tin-to-aimẹ na mẹlẹpo vọnu.”