“Yẹn Ma Yọ́n Nususu Gando Jiwheyẹwhe Go”

“Na owhe he wayi lẹ, Kunnudetọ Jehovah tọn lẹ ko nọ dla mi pọ́n bo nọ má owẹ̀n jiawu Ahọluduta Jiwheyẹwhe tọn tọn hẹ mi. Yẹn ko yin Katoliki na owhe ṣinatọ̀n, ṣigba yẹn ma yọ́n nususu gando Jiwheyẹwhe go gba. To owhe dopo ehe gblamẹ, yẹn ko plọn nususu,” wẹ dawe de he nọ nọ̀ Kerala, Inde, wlan. E zindonukọn dọmọ: “Homẹ ṣie hùn taun nado yọnẹn dọ Atọ̀họ̀-Nuhihọ́ lọ Tọn nọ yin zinzinjẹgbonu to ogbè 139 mẹ [todin 146], podọ nupaṣamẹ wẹ e yin dọ pipli ogbè lẹpo tọn wẹ to wiwọ̀ wá nado se owẹ̀n Jiwheyẹwhe tọn.”

Dile etlẹ yindọ tamẹnuplọnmẹtọ susu sọalọakọ́n dọ Jiwheyẹwhe ma sọgan yin yinyọnẹn, apọsteli Paulu hẹn ẹn họnwun dọ ehe yọnbasi. To whenuena e mọ Atẹninu delẹ he to sinsẹ̀n-basi to agbà heyin kinklandowiwe hlan “Jiwheyẹwhe Mayọnẹn de” kọ̀n, Paulu dọmọ: “Mẹhe mì to sinsẹ̀n to wunvi mẹ, ewọ lọ wẹ yẹn to lilá hlan mì. Jiwheyẹwhe he basi aihọn po nuhe tin to e mẹ lẹpo po . . . wẹ yí ogbẹ̀ na omẹ pó, po gbọfufu po, po onú lẹpo po; e sọ yí ohùn dopo do dá akọta gbẹtọ lẹpo tọn na nado nọ̀ aigba nukunmẹ lẹpo ji.”—Owalọ lẹ 17:23-26.

Paulu dotuhomẹna hosetọ etọn lẹ nado dín nado yọ́n Mẹdatọ lọ, na “e ma tlẹ dẹn sọn dopodopo mítọn dè gba.” (Owalọ lẹ 17:27) Homẹ Kunnudetọ Jehovah tọn lẹ tọn na hùn nado gọalọna we nado yọ́n Jiwheyẹwhe nugbo lọ po jẹhẹnu dagbe etọn lẹ po.