Zusega ase’a boi mɛ, ti Naayinɛ ka lɛregera ba. To geele yɛla ayi n wan basɛ ti Naayinɛ kan kelese to zusega.

1. Zusega n ka makɛ la Naayinɛ puti’irɛ

 Naayinɛ ka leregere zusega se’a n ka makɛ la a puti’irɛ. Naayinɛ puti’irɛ boi la Baabule la poan. (1 Yon 5:14) Makerɛ, Baabule la pa’alɛ ti, la ka nari ti to nyiɣera. Kɛkɛ ŋmɛ’a me basɛ ti nɛreba tara la nyika. (1 Korint 6:​9, 10) Bala la ho san zusɛ Naayinɛ ti a soŋɛ hɔ ti ho di loto, a kan soŋɛ hɔ. Naayinɛ daɣɛ nɛra ti ho wan ta’an pɛregɛ en ti a eŋɛ sɛla ti ho bɔta. To puurɛ pee mɛ la Naayinɛ n ka ani wuu nɛresaala la. San daɣena bala, nɛreba n wan yele ni Naayinɛ ti a eŋɛ sɛla bo ba la kan ana soŋa.​—Yames 4:3.

2. Nɛra tuba san kpa ge ti a zusa Naayinɛ

 Naayinɛ ka keleseri sɛba n nyiiri a sunsɔa. Makerɛ, Naayinɛ yuun yele sɛba n pareni ti ba pu’useri en mɛ ge ti ba tuba kpa la yeti: “Ya san puɣum zusa yuura la se’em, n kan kelese; ya nu’usi lerum mɛ la be’em.” (Isaiah 1:15) Ge ba yuun san tee ge “malum maalɛ yɛla” la Naayinɛ, a wan kelese ba zusega la.​—Isaiah 1:18.