1. ¿Jamüshii weʼraajüinjanaka maʼin na aapieekana?

WEʼRAAJÜLE wanee wayuu, weʼraajüin nüpüshi. Weʼraajüle Jeʼwaa weʼraajüin na nüpüshi chakana sirumatuʼu, na aapieekana. Saashin tü Wiwüliakat «nüchonnii naya Maleiwa» (Job 38:7, TNM). ¿Kasa niʼyateʼeraka anain naya? ¿Nakaaliinjain wayuu sümaiwa? ¿Sünainpünaashiiche naya wakuwaʼipa? Müle shia, ¿jamüsü sukuwaʼipa natuma?

2. ¿Jara kakumajalaka na aapieekana? ¿Jeʼrashii naya?

² Aashajaasü maʼin tü Wiwüliakat nachiki na aapieekana. Wekirajaa sünain süpüshi tia süpüla weʼraajüin maʼin naya. ¿Jara kakumajalaka na aapieekana? Müsü Colosas 1:16: ‹Akumajünüsü tü kasa chakat iipünaa jee tü yaakat mmoluʼu nükajee Cristo›. Nukumajala Jeʼwaa na aapieekana nükajee chi Nüchonkai. ¿Jeʼrashii na aapieekana? Wainma maʼin otta pülashii naya (2 Tesalónica 1:7). *

3. ¿Kasa shikirajaka anain waya Job 38:4-7 nachiki na aapieekana?

³ Saashin tü Wiwüliakat wanaa sümaa nukumajüin Maleiwa tü Mmakat, «aʼwaatüshii sümaa naʼwatüin najapü  napüshuaʼa na nüchonniikana Maleiwa» (Job 38:4-7, TNM). Tia shikirajüin waya eetüjüliin na aapieekana süpülapünaa sukumajünüin wayuu otta tü Mmakat. Otta müsia eein süpüla ‹talatüin na aapieekana›. Jülüja paaʼin tü münakat nachiki: ‹Talatüshii napüshuaʼa na nüchonniikana Maleiwa›. Soʼu tia, paaʼinwajiraashii napüshuaʼa na aapieekana sünain aʼyatawaa nümüin Jeʼwaa.

4. ¿Jamüsü sünüiki tü Wiwüliakat sükajee nakaaliinjeein wayuu na aapieekana?

⁴ Sukumajünaiwaʼaya wayuu, jülüjashii naya naaʼin na aapieekana otta keeʼireesü naaʼin shikeraajüin tü naainjainjatkat Maleiwa (Proverbios 8:30, 31; 1 Pedro 1:11, 12). Neʼrüin kojuya wayuu nnojotka aʼyataweein nümüin Jeʼwaa. Sutuma tia, mojusü naaʼin na aapieekana. Nüleʼejüle waneeshia wayuu nünainmüin Jeʼwaa, ‹talatüshii maʼin naya› (Lucas 15:10). Maʼaka wekirajaainnapain, jülüjasü naaʼin na aapieekana nakuwaʼipa na wayuu aʼyataakana nümüin Maleiwa. Makalaka nnojoluin ponuin waaʼin nüjütüin Jeʼwaa naya süpüla naaʼinmajüin otta natütüleʼerüin naaʼin na wayuu jaa makana nümüin (paashajeʼera Hebreokana 1:7, 14). Wekirajaa sünain süpüshi tü naainjakat na aapieekana.

5. ¿Jaralii na wayuu nakaaliinjakana na aapieekana saashin tü Wiwüliakat?

⁵ Wanaa sümaa najaʼttirüin Maleiwa tü pueulokat Sodoma otta Gomorra, katüsü noʼu Lot otta na nüchonniikana natuma piamashii aapiee (Génesis 19:15, 16). Mapa, ojutünüshi saʼaka wasashi Daniel, chi nünüikimaajachikai Maleiwa, akaisaʼa nia nnojoishi jamajüin natuma. Müshi nia: «Nuluwataain chi Tamaleiwasekai wanee aapiee otta nüsürütka naanükü na wasashikana» (Daniel 6:22, TNM). Otta Pedro ojuʼitinnüshi suluʼujee tü kaatsetkat nutuma wanee aapiee (Aluwataaushikana 12:6-11).  Otta müshia Jesuu akaaliinjünüshi nutuma wanee aapiee nuʼttapa sünain aʼyatawaa nümüin Maleiwa saaʼu tü Mmakat (Marcos 1:13). Süpülapünaa ouktüin nia, eeʼiyataashi wanee aapiee nümüin ‹süpüla nüchecherüin naaʼin› (Lucas 22:43). ¡Nüchecherüin maʼin naaʼin Jesuu sükajee nükaaliinjünüin nutuma wanee aapiee!

6. (1) ¿Kasa naaʼinmajaka oulia na aapieekana na aʼyataakana maaʼulu nümüin Maleiwa? (2) ¿Jarat tü pütchi wekirajaainjatkalü anain?

⁶ Nnojoishii weʼrüin maaʼulu na aapieekana sükajee nnojoluinnapain neeʼiyataain wamüin. Akanasaʼa naya, ayatüshii naaʼinmajüin na aʼyataakana nümüin Maleiwa suulia mojujain nakuwaʼipa nümaa. Müsü tü Wiwüliakat: ‹Aluwataanüshii na aapieekana nutuma Maleiwa süpüla nakaaliinjain na wayuukana› (Hebreokana 1:14). ¿Jamüsü sütütüleʼerüinjatka waaʼin tia? Shia süka eein waneeinnua meʼrujusalii mojulaashii, namojujeʼereein wakuwaʼipa. ¿Jaralii naya? ¿Jalejeejana naya? ¿Kasa naainjaka süpüla mojuin wakuwaʼipa natuma? Süpüla watüjaain saaʼu tia, wekirajaa süchiki tü alatakat suʼttaiwaʼaya wayuu.

7. ¿Jeʼrasü wayuu nükatalaka Satanaa nuulia Maleiwa?

⁷ Maʼaka wekirajaain suluʼu ekirajaaya 3, eeshi wanee aapiee aluwataweeshi. Sutuma tia, nüʼünüükalaka nia Maleiwa. Mapa, Satanaa otta Yolujaa nümünaka (Alateetkat Mapeena 12:9). Süchikijee nimeejüin Eva, wainma wayuu nükatalaka nuulia Maleiwa soʼutpünaa 1.600 juya. Palitchon na oonookana waneepia sümaa nünüiki Maleiwa maʼaka naaʼin Abel, Enoc otta Noé (Hebreokana 11:4, 5, 7).

8. (1) ¿Jamüshii yolujaaka waneeinnua aapiee? (2) ¿Kasa naainjaka na yolujaakana süpüla katüin noʼu soʼu tü juya miyoʼushaatakat?

⁸ Soʼu nükalia Noé, eeshii waneeinnua aapiee eʼrüliijaashii wayumüin nümüin Jeʼwaa. Nayouktüin tü eʼitaanakalü  apüla naya sirumatuʼu otta ashakatüshii Mmapaʼamüin süpüla wayuuyaain naya. ¿Jamüsü naainjaka tia? Müsü Génesis 6:1, 2: ‹Keejiasü namüin tü majayünnüükat süka anasüchoin maʼi shiairua. Müshiijeseʼe naapaain eekai nacheküin süpüleerua naʼwayuuseinjatüin›. Aapieekana naainnua namojujain nakuwaʼipa na wayuukana, akaisaʼa Jeʼwaa nnojotsü nuuʼulaainjatüin tia. Makalaka nüʼitirüin wanee juya miyoʼushaata süpüla najaʼttirüin na mojulaashiikana. Na katakana oʼu naya na jaa makana nümüin waneepia (Génesis 7:17, 23). Süpüla katüin noʼu na aapiee mojulaashiikana, nnojoluinnapa wayuuyaain otta aleʼejüshii sirumatuʼumüin sümaa meʼrujuin naya. Sükajee tia, neeʼiyatüin nümaain naya  Satanaa, ‹chi sülaülashikai tü yolujaakalüirua› (Mateo 9:34).

9. (1) ¿Kasa alataka namüin na aapiee mojulaashiikana naleʼejapa sirumatuʼumüin? (2) ¿Kasa wekirajaainjatka nachiki na yolujaakana?

⁹ Naleʼejapa sirumatuʼumüin na aapiee mojulaashiikana nnojoishii naʼakain na aapiee anamiakana maʼaka naainjain Jeʼwaa nüka Satanaa (Judas 6). Mayaapejeʼe nnojoluin wayuuyaain naya maaʼulu, ayatüshii sünainpünaain sukuwaʼipa wayuu. Nakajee na yolujaakana, ‹niʼikeʼerüin Satanaa wayuu sainküin tü mmakat› (Alateetkat Mapeena 12:9; 1 Juan 5:19). ¿Jamüsü sukuwaʼipa nutuma? Wainma shimeejia wayuu natuma (paashajeʼera 2 Corinto 2:11). Wekirajaa sünain süpüshi tia.

10. ¿Kasa wayuu tü naaʼinrakat na outshiikana?

¹⁰ Na yolujaakana nemeejüin wayuu süka tü naaʼinrakat na outshiikana. Tia shia tü kasa aainjünakat süpüla naashajaanüin amaa na yolujaakana, eesü saainjünüle nükajee wanee ooʼulaküi. Mojusü tia saashin tü Wiwüliakat otta nnojoluinjana waya sünainpünaain (Galacia 5:19-21). Tü naaʼinrakat na outshiikana müsü aka saaʼin shimeejia jime. Süpüla nulojuin jime wanee wayuu, wainma shimeejia nutuma. Müshiʼiya na yolujaakana, wainma sukuwaʼipa natuma tü naaʼinrakat na outshiikana süpüla naainjirüin waya tü keeʼireekat naaʼin.

11. ¿Kasa wayuu tü ooʼulakaakat? ¿Jamüshii nnojoluinjanaka waya sünainpünaain?

¹¹ Wanee shimeejia wayuu natuma na yolujaakana shia tü ooʼulakaakat. Tia shia tü kasa aainjünakat süpüla sütüjaanüin aaʼu tü alatajatkat mapeena. Maʼaka saaʼin ooʼulakaa süka tü jolotsükalüirua, maraaja koʼoyoosü, waraaja, ajapüü, yüi, süka iita asia kepein otta ayaawataa saaʼu jamaluʼuluin wanee lapü. Mayaapejeʼe nnojoluin mojuin tia naashin na wayuukana, na ooʼulaküliikana  aʼyataashii namaa na yolujaakana saashin tü Wiwüliakat. Maʼaka tü sümakat Aluwataaushikana 16:16-18: Eesü ‹wane wayuu ooʼulaküt süka tü süseyuukat›. Nujuʼitinnapa chi yolujaakai suulia, isaitpa süchiki ooʼulakaa.

12. ¿Jamüsü mojuka waashajaale namaa na ouktüshiikana?

¹² Tü wanee shimeejiakat wayuu shia naashajeʼerüin naya namaa na ouktüshiikana. Anoujinnüshii na ouktakana apüshi sünain kasa nnojotka shiimain nachiki na ouktüshiikana. Eeshi nüküjüle chi ooʼulaküikai wanee kasa nnojotka natüjaain aaʼu nüpüshi chi ouktüshikai jee nüshatayaale nünüiki. Sutuma tia, wainma wayuu anoujaka sünain katüin noʼu na ouktüshiikana otta naashajaale namaa amülialaajeerü naaʼin naashin. Akatsaʼa alawaain tia otta mojusü shia. ¿Jamüsü mojuka shia? Shia süka nashatüin na yolujaakana nanüiki na ouktüshiikana otta naküjüin namüin na ooʼulaküliikana kasa nachiki na ouktüshiikana (1 Samuel 28:3-19). Maʼaka wekirajaain suluʼu ekirajaaya 6, ouktapa wanee wayuu,  nnojoluichipa eein nia (Salmo 115:17). Na «aashajaakana namaa na ouktüshiikana» emeejünüshii natuma na yolujaakana otta mojusü tia nümüin Maleiwa (paashajeʼera Deuteronomio 18:10, 11; Isaías 8:19). Sutuma tia, nnojo sünainpünaain pia tü shimeejiakat wayuu natuma na yolujaakana.

13. ¿Kasa naainjaka na wayuu mmotpuʼukana neema na yolujaakana?

¹³ Emeejüshii otta eimmolojushii wayuu na yolujaakana. Nütüjaa aaʼu Satanaa otta na yolujaakana ‹sülüʼülüin nakalia› süpüla noʼutünüin aaʼin; makalaka naainjain maʼin kasa mojusü (Alateetkat Mapeena 12:12, 17). Mayaapejeʼe naainjain tia, wainmashaata maʼin wayuu taashika noulia süchikijee mmotpuʼuin naya neema. ¿Kasa naainjaka süpüla tia? ¿Kasa waainjainjatka süpüla taashin waya noulia na yolujaakana?

14. ¿Kasa waainjainjatka süpüla waʼleejüin na yolujaakana maʼaka naaʼin na anoujashii chajanakana Éfeso?

¹⁴ Süküjüin tü Wiwüliakat tü waainjainjatkat süpüla waʼleejüin otta taashin waya noulia na yolujaakana. Wekirajaa sünain tü naainjakat na anoujashii chajanakana Éfeso soʼu nükalia Jesuu. Süpülapünaa nanoujain, naaʼinrapuʼuin tü saaʼinrakat outsü. ¿Kasa naainjaka nooʼulaainjatpa tia? Müsü tü Wiwüliakat: ‹Kojuya na aʼyataapuʼukana sünain outsü, nantirüin tü nakaralouktse sukuwaʼipamaajatkat outsü süpüla naʼajüin shia› (Aluwataaushikana 19:19). Wayuukana naainnua, naʼajüin tü nakaralouktse sukuwaʼipamaajatkat outsü. Anasü maʼin tia süpüla nashatüin na aʼleejeekana na yolujaakana. Na aʼyataweekana nümüin Jeʼwaa naʼajüinjatü tü kasa sukuwaʼipamaajatkat outsü namaʼanaka. Maʼaka saaʼin karaloukta, peliikula otta kasee, jaʼitairü anain maʼin shiyolojo. Jee müsia lania otta waneeirua kasa süpülajatka nnojoluin mojuin akuwaʼipaa (1 Corinto 10:20).

15. ¿Kasa waainjainjatka süpüla waʼleejüin na yolujaakana?

 ¹⁵ Süchikijee naʼajüin na anoujashii chajanakana Éfeso tü nakaralouktse sukuwaʼipamaajatkat outsü, müshi Pablo: ‹Atkaashii waya sümaa tü yolujaakalüirua› (Éfeso 6:12). Shiiʼiyatüin tia ayatüin na yolujaakana naainjireein kasa mojusü na anoujashiikana. ¿Kasa tü wanee naainjainjatkat na anoujashiikana? Müshi Pablo: ‹Anakaja jüchecherüle jaaʼin sünain anoujaa süpüla jiyouktüinjatüin tü mojusü nüchekakat Satanaa süpüleerua jaaʼinrüin› (Éfeso 6:16). Wachecherüle waaʼin sünain anoujaa, waʼleejeena na yolujaakana (Mateo 17:20).

16. ¿Kasa waainjainjatka süpüla wachecherüin waaʼin sünain anoujaa?

¹⁶ ¿Kasa waainjainjatka süpüla wachecherüin waaʼin sünain anoujaa? Wekirajaainjatü anain tü Wiwüliakat. Süpüla ichein maʼin süsepü wanee piichi, icheinjatü suuʼui. Müshiʼiya waya, süpüla wachecherüin waaʼin sünain anoujaa, watüjaainjatü aaʼu tü shiimain suluʼukat tü Wiwüliakat otta waashajeʼerüinjatü shia weinshi. Maʼaka ichein maʼin süsepü wanee piichi meena waya sünain anoujaa. Sutuma tia, nnojoleerü waaʼinrüin tü nachekakat na yolujaakana (1 Juan 5:5).

17. ¿Kasa waainjainjatka süpüla waaʼinmajüin wakuwaʼipa noulia na yolujaakana?

¹⁷ ¿Kasa tü wanee naainjainjatkat na anoujashii chajanakana Éfeso? Aainjünapuʼusü maʼin tü naaʼinrakat na outshiikana eepuʼule kepiain naya, makalaka naaʼinmajüinjatüin nakuwaʼipa suulia. Müshi Pablo namüin: ‹Anakaja juchuntüle nümüin Maleiwa› (Éfeso 6:18). Müsia maaʼulu, aainjünüsü maʼin tü naaʼinrakat na outshiikana. Süpüla eejiraain waya sümaa tü neʼitaakat na yolujaakana, anashii wachuntüle nümüin Jeʼwaa süpüla naaʼinmajüin waya. Anasü maʼin wachuntüle nünülia Jeʼwaa waashajaapa nümaa (paashajeʼera Proverbios 18:10). Acheküsü wachuntüin nümüin Jeʼwaa weinshi  süpüla ‹nuʼtteʼerüin waya nuulia Satanaa› (Mateo 6:13). Shiimain naapeerüin Maleiwa wanüiki (1 Pedro 3:12).

18, 19. (1) ¿Jamüsü watüjaaka saaʼu wakanajeenain na yolujaakana? (2) ¿Kasa wekirajaainjatka anain suluʼu tü wanee ekirajaayakat?

¹⁸ Mojulaashii na yolujaakana. Nnojoluinjana waya mmoluin neema chi Yolujaakai, maʼaka waʼleejüle nia otta warütkaale nünainmüin Maleiwa sümaa waainjain tü keeʼireekat naaʼin (paashajeʼera Santiago 4:7, 8). Nnojoishii pülain maʼin na yolujaakana. Soʼu nükalia Noé püreesashii na yolujaakana saʼaka piyuushi otta süsaleena naya naainjala mapeena (Judas 6). Soto paaʼin naaʼinmajüin waya na aapiee nümaajanakana Jeʼwaa (Aluwataaushikana 12:6-11). Jülüjasü naaʼin eejiraain waya namaa na yolujaakana otta keeʼireesü naaʼin wakanajüin naya. Naʼwatüin najapü süpüla natütüleʼerüin waaʼin. Ayata paaʼinwajiraain waya nümaa Jeʼwaa otta namaa na aapiee jaa makana waneepia nümüin. Nnojo sünainpünaain waya tü naaʼinrakat na outshiikana otta waainja waneepia tü sümakat tü Wiwüliakat (1 Pedro 5:6, 7; 2 Pedro 2:9). Müle shia watuma, wakanajeena na yolujaakana.

¹⁹ ¿Jamüsü nuuʼulaaka Maleiwa eein na yolujaakana sümaa tü kasa mojusü müliakat maʼin atuma waaʼin? Wekirajaajeerü anain tia suluʼu tü wanee ekirajaayakat.