1-3. ¿Jarat tü waʼünüü eipiijakat waya? ¿Jamüsü waaʼin sutuma tü shikirajakat tü Wiwüliakat?

PIIPIIJÜNÜLE nutuma wanee püʼünüü katchinshi sümaa kawachirain nia puulia, pütüjaa aaʼu nuʼuteerüin paaʼin nütaʼürüle pia maʼaka nuʼutüin naaʼin na paʼaleewainkana. Mayaapejeʼe puwataain maʼin, nütaʼüleein pia. Eejaaka wanee wayuu, pülashi nia nuulia chi püʼünüükai, nükaaliinjaka pia. Süchikijee tia, anasü paaʼin.

² Shiipiijüin waya maaʼulu wanee waʼünüü müsü aka naaʼin chia. Maʼaka wekirajaain suluʼu ekirajaaya 6, waʼünüü tü ouktaakat saashin tü Wiwüliakat. Nnojoishii isain waya suulia, ouktüirü wapüshi sutuma. Akaisaʼa Jeʼwaa pülashi maʼin nia suulia tü ouktaakat. Nia Taashika atuma waya suulia. Niiʼiyatüirü eein süpüla nükanajüin tü ouktaakat otta najaʼlajeʼerüinjatü shia. Müsü tü Wiwüliakat: ‹Süchikijee nükanajüin na nüʼünüükana, ooʼulaa meeria tü ouktaakat nutuma› (1 Corinto 15:24-26). ¡Anasü maʼin tia pütchikat!

³ Jülüja waaʼin motsomüin mojuin maʼin waaʼin ouktüle wanee wayuu. Sutuma tia, watüjaajeerü aaʼu tü kasa talatüinjatkalü atuma waaʼin: nüsoʼireʼerüinjanain  Jeʼwaa na ouktüshiikana (Alateetkat Mapeena 20:12).

4. (1) ¿Jamüsü watüjaaka saaʼu nükajee Jesuu mojuin naaʼin Jeʼwaa sutuma tü ouktaakat? (2) ¿Jaralii na aleewakana amaa Jesuu?

⁴ ¿Ouktüiche püpüshi jee paʼaleewain eeka alin maʼin püpüla? Mojusü maʼin waaʼin süka isain wachiki wakaaliinjain naya. Sutuma tia, choʼujaasü maʼin sümülialüin waaʼin tü Wiwüliakat (paashajeʼera 2 Corinto 1:3, 4). Süküjüin wamüin tü Wiwüliakat mojuin naaʼin Jeʼwaa otta Jesuu sutuma tü ouktaakat. Shiiʼiyatüin mojuin maʼin naaʼin Jesuu sutuma ouktüin wanee naʼaleewain otta watüjaa aaʼu nüshatüin nukuwaʼipa chi Nüshikai (Juan 14:9). Chale nia Jerusalén, waraittapuʼushi Betaniamüin eere kepiain Lázaro sümaa María otta Marta. Aleewashi maʼin nia namaa, müsü tü Wiwüliakat: ‹Aisü maʼin nüpüla Marta, tü shimiiruakat jee müshia Lázaro› (Juan 11:5). Akaisaʼa Lázaro ouktüshi maʼaka wekirajaain suluʼu ekirajaaya 6.

5, 6. (1) ¿Jamüsü naaʼin Jesuu niʼrapa naʼyalajüin nüpüshi jee naʼaleewainyuu Lázaro? (2) ¿Jamüsü sütüleʼeraka waaʼin mojuin maʼin naaʼin Jesuu?

⁵ ¿Jamüsü naaʼin Jesuu ouktapa chi naʼaleewainkai? Saashin tü Wiwüliakat oʼunüshi nia eemüin nüpüshi jee naʼaleewainyuu Lázaro. Aʼyalajüshii naya nüpüla. Niʼrapa naya ‹mojukalaka maʼin naaʼin› otta «niʼyalajakalaka» (Juan 11:33, 35). ¿Jamüsü mojuka maʼin naaʼin Jesuu? ¿Nnojotsü nütüjaain aaʼu süsoʼiraainjatüin naaʼin Lázaro? (Juan 11:3, 4). Mayaapejeʼe müin shia mojusü maʼin naaʼin sutuma tü ouktaakat.

⁶ Sükajee mojuin maʼin naaʼin Jesuu, sütütüleʼerüin waaʼin. Sünainjee tia, watüjaa aaʼu üttüin naaʼin Jesuu otta chi Nüshikai sünain tü ouktaakat. Najaʼlajeʼereerü shia Jeʼwaa süka pülain maʼin nia. Wekirajaa sünain tü kasa pülasü naainjakat Jesuu sükajee tü nütchinkat Maleiwa.

7, 8. ¿Jamüsü nnojotka süsoʼiraainjatüin naaʼin Lázaro naashin na wayuukana? ¿Kasa naainjaka Jesuu?

⁷ Ojoitünüshi Lázaro suluʼu wanee ipa koʼusü, nuluwataaka Jesuu wayuu süpüla süsünneʼerüin tü shirousekat. Sümaka Marta: ‹Keejuuichin, alatüirü pienchi kaʼi süchikijee niʼitaanüin› (Juan 11:39). Nnojotsü asoʼiraainjatüin naaʼin Lázaro naashin na wayuukana.

⁸ Süsünneʼennapa tü shirousekat, müshi Jesuu sümaa emetuluin nünüiki: «Lázaro, pujuittaa». ¿Kasa alataka süchikijee tia? ‹Nujuʼittaakalaka Lázaro› (Juan 11:43, 44.) Talatakajasaʼa maʼin wayuu süpüshuaʼa ¿aashimüin? Natüjaa aaʼu na nuwalayuukana, na nüpüshikana, na kepiakana nüʼütpaʼa otta na naʼaleewainkana ouktüin Lázaro. Akaisaʼa nia katüsü noʼu nüchikuaʼa süpüla kepiain namaa. ¡Anakatche maʼin tia! Ojuupatünüshi nia otta talatüshii maʼin na wayuukana. ¡Akanajuusü tü ouktaakat!

9, 10. (1) ¿Kasa naainjaka Jesuu süpüla sütüjaanüin aaʼu jaralin asoʼireʼerüin naaʼin Lázaro? (2) ¿Kasa shikirajaka anain waya tü aküjünakat nachiki na asoʼireʼennakana aaʼin?

⁹ Naashin Jesuu nnojotsü naainjain nümüiwaʼa tia kasa pülasükat. Süpülapünaa nuunejüin Lázaro, aashajaashi nia nümaa Jeʼwaa süpüla sütüjaanüin aaʼu niain Jeʼwaa asoʼireʼerüin naaʼin na ouktüshiikana (paashajeʼera Juan 11:41, 42). Nnojoishi niain Lázaro asoʼireʼennüin aaʼin nümüiwaʼa. Eesü mekietsat wayuu asoʼirennaka aaʼin saashin tü Wiwüliakat. * Anasü maʼin waashajeʼerüle otta wekirajaale nachiki. Shikirajüin waya sünain wanaawain wayuu nümüin Jeʼwaa. Nüsoʼireʼerüin naaʼin tooloyuu, jieyuu, jimaʼalii, laülaayuu, israeliita otta eeka nnojoluin israeliitain. ¡Talatüshii maʼin na wayuukana sutuma tia!  Nüsoʼireʼerapa Jesuu wanee jintut, ‹ponusü maʼin naaʼin chi süshikai jee tü shiikat tü neʼrakat› (Marcos 5:42). Nnojotsü süpüla motuinjatüin naaʼin tia, talatüshii maʼin naya nutuma Jeʼwaa.

¹⁰ Ouktüshii mapa na wayuu nüsoʼireʼerakana aaʼin Jesuu. Sünainjee tia, ¿amülasü süsoʼireʼennüin naaʼin? Nnojo. Tü aküjünakat nachiki, shikirajüin tü shiimainkat nachiki na ouktüshiikana otta tü alatajatkat namüin mapeena.

11. ¿Jamüsü watüjaaka saaʼu shiimain tü sümakat Eclesiastés 9:5 sutuma tü alatakat nümüin Lázaro?

¹¹ Saashin tü Wiwüliakat «na ouktüshiikana nnojotsü kasain natüjaain aaʼu», nnojotsü katüin noʼu. Watüjaa aaʼu shiimain tia sükajee tü alatakat nümüin Lázaro. Katapa noʼu nüchikuaʼa, ¿nüküjüinche namüin na wayuukana tü niʼrakat sirumatuʼu? ¿Niimolojuinche naya süchiki wanee siki eere müliain wayuu? Nnojo. Tia nnojotsü süküjüin tü Wiwüliakat. Wanaa sümaa ouktüin Lázaro soʼu pienchi kaʼi ‹nnojotsü kasain nütüjaain aaʼu› (Eclesiastés 9:5, TNM). Atunküshi neʼe nia (Juan 11:11).

12. ¿Jamüsü watüjaaka saaʼu shiimain süsoʼiraain naaʼin Lázaro?

¹² Tü alatakat nümüin Lázaro shiiʼiyatüin shiimain süsoʼiraainjatüin naaʼin na ouktüshiikana. Nüsoʼireʼerüin naaʼin Jesuu Lázaro suʼupala wainma wayuu. Mayaapejeʼe üttüin naaʼin nünain Jesuu na laülaashiikana naʼakajee na sacerdootekana, nnojotsü nounjulajüin tü kasa pülasü naainjakat. Müshii naya: ‹¿Kasa waaʼinrajatka nüka? Naaʼinrüin wainma kasa anasü nütüjakat apüleerua Maleiwa nümüiwaʼa› (Juan 11:47). Wainma na wayuu anoujakana nünain Jesuu wanaa sümaa nanaʼlaain nümüin Lázaro. Natüjaaichipa aaʼu niain Jesuu chi nüjünalakai Maleiwa. Sutuma tia, ouktünee aaʼinchi nia nümaa Lázaro  natuma na laülaashiikana naʼakajee na sacerdootekana (Juan 11:53; 12:9-11).

13. ¿Jamüsü watüjaaka saaʼu nüsoʼireʼerüinjatüin Jeʼwaa naaʼin na ouktüshiikana?

¹³ ¿Mojusü anoujaa sünain süsoʼiraainjatüin naaʼin na ouktüshiikana? Nnojotsü mojuin. Naashin Jesuu anteerü wanee kaʼi eere süsoʼiraainjatüin saaʼin «süpüshua tü wayuu ouktüsükalüirua» (Juan 5:28). Sükajee niain Jeʼwaa kakumajalain tü kasakalüirua, ¿kapüleesüche nümüin nukumajüin shia süchikuaʼa? Süpüla naainjain tia sotuinjana naaʼin. ¿Soteenache naaʼin na wapüshi ouktakana? Jülüja paaʼin tüü: ¡Nütüjaa aaʼu kasaichin sünülia süpüshuaʼa tü jolotsükalüirua! (Isaías 40:26.) Makalaka eein süpüla sotuin naaʼin Jeʼwaa süpüshuaʼa nakuwaʼipa na wapüshi ouktakana otta keeʼireesü naaʼin katüin noʼu nachikuaʼa nutuma.

14, 15. ¿Keeʼireesü maʼin naaʼin Jeʼwaa nüsoʼireʼerüin naaʼin na ouktüshiikana sükajee tü nümakat Job?

¹⁴ ¿Keeʼireesü maʼin naaʼin Jeʼwaa nüsoʼireʼerüin naaʼin na ouktüshiikana? Naainjeein maʼin shia saashin tü Wiwüliakat. Müshi Job: ‹Ouktüle wanee wayuu, ¿kateetche noʼu nüchikuaʼa?›. Naashin Job naʼatapajüinjatü nüsoʼireʼennüin aaʼin nutuma Maleiwa. Makalaka nümüin mayaa: ‹Puunejeechi taya otta asoukteechi taya. Keeʼireesü maʼin paaʼin paainjain shia süka pukumajalain taya› (Job 14:13-15, TNM).

¹⁵ Jülüja paaʼin keeʼireein maʼin naaʼin Jeʼwaa nüsoʼireʼerüin naaʼin na ouktüshiikana. Sütütüleʼerüin waaʼin tia ¿aashimüin? ¿Jamüinjatü sukuwaʼipa nutuma? ¿Jaralii na asoʼiraainjanakana aaʼin? ¿Jalainjatü asoʼiraain naaʼin?

16. ¿Jamüinjatü nakuwaʼipa na ouktüshiikana süsoʼiraapa naaʼin?

¹⁶ Waashajeʼerüle nachiki na wayuu asoʼiraakana aaʼin namaiwa, watüjaa aaʼu tü alatajatkat mapeena. Na  asoʼiraakana aaʼin kepiashii nachikuaʼa Mmapaʼa sümaa napüshi. Meerü nakuwaʼipa na ouktüshiikana süsoʼiraapa naaʼin mapeena, akatsaʼa analeejeeriain maʼin shia. Maʼaka wekirajaain suluʼu ekirajaaya 3, paʼaraiisüinjatü süpüshuaʼa tü Mmakat. Nnojoluinjana kepiain nachikuaʼa na ouktüshiikana suluʼu wanee mma eere jouluin atkawaa, kaainjalaa otta ayuulii. Kepieena naya Mmapaʼa sümaa jimatüin naaʼin otta talateena waneepia.

17. ¿Jeʼrashii na wayuu asoʼiraainjanakana aaʼin?

¹⁷ ¿Jaralii na asoʼiraainjanakana aaʼin? Müshi Jesuu: «Saapeerü tanüiki süpüshua tü wayuu ouktüsükalüirua sümaa sujuitteerüin mmaapüjee» (Juan 5:28, 29). Saashin Alateetkat Mapeena 20:13 ‹ojuʼitinneerü wayuu eekat ouktüin shiroku tü palaakat jee tü wayuu suluʼujatkat tü Hadeskat›. «Tü Hadeskat» shia süpülee tü ouktüsükalüirua. (Paashajeʼera tü pütchikat «¿Jamaluʼulu tü pütchikat Seol otta Hades?».) Tia Hadeskat maluʼuinjatü süsoʼiraapa naaʼin na ouktüshii suluʼukana. Müshi Pablo: ‹Asoʼiraajeerü saaʼin wayuu eekai saaʼinrüin tü anasükat otta eekai saaʼinrüin tü mojusükat› (Aluwataaushikana 24:15). ¿Jamaluʼulu tia?

18. ¿Jaralii na wayuu ‹aaʼinrakana tü anasükat› asoʼiraainjanaka aaʼin? ¿Jamüsü pukuwaʼipa sutuma tia?

¹⁸ Naʼaka na wayuu ‹aaʼinrakana tü anasükat› eeshii na yaajanakana Mmapaʼa süpülapünaa nüntüin Jesuu maʼaka naaʼin Noé, Abraham, Sara, Moisés, Rut, Ester otta waneeinnua aashajaanaka achiki suluʼu Hebreokana kapiitulo 11. Jee müsia eeshii na aʼyataakana nümüin Jeʼwaa ouktakana maaʼulu. Sükajee süsoʼiraainjatüin naaʼin na ouktüshiikana, nnojoleena mmoluin waya seema ouktaa (Hebreokana 2:15).

19. ¿Jaralii na wayuu ‹aaʼinrakana tü mojusükat›? ¿Jameena naya nutuma Jeʼwaa?

¹⁹ Wainmashaata wayuu nnojoliika eʼraajüin Jeʼwaa kataiwaʼaya noʼu, nnojoishii aʼyataain nümüin jee naainjain  tü keeʼireekat naaʼin. ¿Kaseerü alataka namüin? Nnojoleena motuin naaʼin Jeʼwaa. Nüsoʼireʼereerü naaʼin na ‹aaʼinrakana tü mojusükat› süpüla neʼraajüin nia otta naʼyataain nümüin. Soʼutpünaa tü miitkat juya asoʼiraajeerü naaʼin na ouktüshiikana otta namaajeena naya na aʼyataakana nümüin Jeʼwaa Mmapaʼa. Anashaateerü maʼin tia, sünülia sutuma tü Wiwüliakat: Tü Kaʼi kasalajaneetkat oʼu saainjala wayuu. *

20. ¿Kasa wayuu tü Gehenakat? ¿Jaralii na chainjanakana suluʼu?

²⁰ ¿Asoʼiraainjatche naaʼin napüshuaʼa na ouktüshiikana? Nnojo. Saashin tü Wiwüliakat eeshii eeka suluʼuin «tü Gehenakat» (Lucas 12:5, TNM). Tü Gehenakat ojotulee kasa yarüttüsü otta aʼajülee wayuu ouktüsü, anuuipaʼa sünain Jerusalén. ¿Jaralii na aʼajünakana yala? Naya na mojutükana süpüla ojoitünaa otta asoʼireʼennaa aaʼin. Tü Gehenakat shiyaakuasü ouktaleeinjatüin wayuu. Süsalainjatü wayuu saainjala nutuma Jesuu, akaisaʼa Jeʼwaa nia chi Aluwataainjachikai sünain tia (Aluwataaushikana 10:42). Na eekana natüjaain saaʼu mojulaain naya sümaa nnojoluin neeʼiranajaweein nakuwaʼipa, nnojoleena asoʼireʼennüin aaʼin.

21, 22. (1) ¿Jarat tü wanee asoʼirawaa aaʼin eekat saashin tü Wiwüliakat? (2) ¿Jarai chi asoʼireʼennakai aaʼin palajana süpüla kepiaa sirumatuʼu?

²¹ Eesü wanee asoʼirawaa aaʼin saashin tü Wiwüliakat. Shia tü asoʼirawaakat aaʼin süpüla kepiaa sirumatuʼu. Saashin tü Wiwüliakat eeshi wanee wayuu asoʼiraaka aaʼin süpüla kepiaa sirumatuʼu: nia Jesukürisüto.

²² Ouktüshi Jesuu. Akaisaʼa Jeʼwaa nnojoishi nuuʼulaain nia suluʼu tü woowirakat (Aluwataaushikana 13:34, 35).  Nüsoʼireʼerüin naaʼin sümaa meʼrujuin nia. Naashin Pedro ‹ouktüsü neʼe tü niʼirukukat. Katoʼuchi nia nüchikuaʼa [sümaa meʼrujuin nia, TNM]› (1 Pedro 3:18). ¡Anakatche maʼin tia! Asoʼiraasü naaʼin Jesuu maʼaka naaʼin wanee meʼrujusai (paashajeʼera 1 Corinto 15:3-6). Nia asoʼireʼennaka aaʼin palajana sümaa müin nukuwaʼipa (Juan 3:13). Akaisaʼa nia, nnojoishi niainjachin neʼe nümüiwaʼa.

23, 24. ¿Jaralii na «aaʼinmajuushikana tatüma» nümaka amüin Jesuu? ¿Jeʼrashii naya?

²³ Sükajee nülüʼülüin süpüla nuʼunüin sirumatuʼumüin, müshi Jesuu namüin na nikirajüinkana: ‹Yapeerü tatuma tü paükalüirua jüpüla› (Juan 14:2). Nanülia nutuma Jesuu na chainjanakana sirumatuʼu: «Aaʼinmajuushikana tatüma [palitchon anneerü, TNM]» (Lucas 12:32). ¿Jeʼrashii naya? Naashin Juan suluʼu Alateetkat Mapeena 14:1 ‹niʼrüin chi Anneetchonkai [Jesukürisüto] shaʼwatüin saaʼu tü wutai kanüliakat Sión sümaa watta saalii wayuu maʼaka 144.000›.

²⁴ Na 144.000 wayuuinnua asoʼiraainjatü naaʼin nutuma Maleiwa süpüla kepiaa sirumatuʼu. ¿Joujeerü tia? Naashin Pablo eeinjatü tia soʼu tü kaʼi niitaainjateetkalü oʼu Kürisüto (1 Corinto 15:23). Kepiashii waya soʼu kaʼikat tia, wekirajaajeerü anain tia suluʼu tü ekirajaayakat 9. Maaʼulu, palitchon na 144.000 wayuuinnua apütaakana. Ouktapa naya, asoʼiraamaateerü naaʼin süpüla kepiaa sirumatuʼu (1 Corinto 15:51-55). Na wanee wayuukana asoʼiraajeerü naaʼin süpüla kepiaa suluʼu tü Mmakat paraiisüpa shia.

25. ¿Kasa wekirajaainjatka anain suluʼu tü wanee ekirajaayakat?

²⁵ Shiimain nükanajeerüin Jeʼwaa tü ouktaakat, müiria nnojoluin shia nutuma (paashajeʼera 1 Corinto 15:54). Eesü püsakirüle paaʼin: «Na asoʼiraainjanakana aaʼin süpüla kepiaa sirumatuʼu, ¿kasa naainjainjatka chaaʼaya?». Sünainpünaainjana naya wanee Aluwataaya. Suluʼu tü wanee ekirajaayakat, wekirajaajeerü anain tia Aluwataayakat.