Wayakana anoujashiikana, suluʼusü waaʼin nnojoluinjatüin kasain ooʼuleʼerüin waya suulia aʼwaajaa Jehová. Kojutusü nümüin Jehová müle pukuwaʼipa (paashajeʼera 1 Crónicas 28:9). ¿Kasa eeka süpüla ooʼuleʼerüin waya suulia wanoujain nünain Jehová? ¿Kasa waaʼinrajatka süpüla wachecheraain nünain Jehová?

1. ¿Kasa naaʼinreetka na waneinnua süpüla wooʼulaain suulia anoujaa?

Eejeena wayuu achajaakana sukuwaʼipa süpüla wooʼulaain suulia anoujaa. Naya wayuukana, ooʼulaashii naya suulia anoujaa nünain Jehová süpüla nekirajüin alawaa nüchiki jee süchiki tü nupueulosekat shiiʼiree wanaawainjatüin waaʼin namaa. Naya wayuukana apóstata münüshii. Eetaashii na shikiipüʼükana iküleesia aküjakana alawaa wachiki süpüla sükaaʼinjaain wayuu woulia. Nnojotsü anain waashajaale namaa na ekirajüliikana alawaa, waashajeʼerüle nakaraloʼuse jee wanajüle tü neʼitaakat suluʼu Internet. «Müleka nuʼuninnüle wane wayuu eekai moʼuin nütüma wane eekai moʼuinya, eeshii süpüla nojunuujiraain suluʼu ishi» müshi Jesús nachiki na ekirajakana alawaa (Mateo 15:14).

¿Jama niale wanee waʼaleewain jee wanee wapüshi ooʼulaakai suulia anoujaa? Eesüjaʼa mojule waaʼin sutuma tia jee nüpüleeruale waaʼin shiiʼiree wooʼulaain suulia anoujaa. Mayaainjeʼe müin tia, wachajaain sukuwaʼipa süpüla waneepiain waya nümaa Maleiwa (Mateo 10:37). Oonoweeshii waya nümaa Jehová müshiijeseʼe nnojoliin waʼaleewajaain namaa na wayuu ooʼulaakana suulia anoujaa (paashajeʼera (1 Corinto 5:11).

2. ¿Kasa nnojoluinjatka waaʼinrüin süpüla nnojoluin wakayalaain nuulia Jehová?

Süka alin wapüla Jehová, nnojoishii waya sünainpünaain tü iküleesia ekirajakalü alawaa nüchiki. Müshiijeseʼe nnojoliin waʼyataain shiʼipajee, nnojoluin waaʼinrüin wanee kasa sünainpünaaka jee suluʼuin waya wanee organización aʼyataaka shiʼipajee. «Jujuitta suulia Babilonia tü miyoʼusükat» müshi Jehová namüin na aʼyataashiikana nümüin. Babilonia shia süpüshuaʼa tü iküleesia ekirajakalü alawaa nüchiki (Alateetkat Mapeena [Apocalipsis] 18:2, 4, TNM).

 WEKIRAJAA SOOʼOMÜIN

3. Jalia pia noulia na ekirajüliikana alawaa

¿Kasa paaʼinrajatka paapüle wanee pütchi mojuluʼulu nachiki na Aküjaliikana pütchi? Jaashajeʼera Proverbios 14:15 otta yooto jia süchiki tüü:

• ¿Jamüsü nnojotka anain wanoujale sünain süpüshuaʼa tü aküjünakat wamüin?

Jaashajeʼera 2 Juan 10 otta yooto jia süchiki tüü:

• ¿Wanaawainjatche waaʼin namaa na ekirajakana sünain alawaa?

• Mayaainjeʼe nnojoluin yootuin waya namaa na ekirajakana sünain alawaa, ¿kasa wanaaweetka atuma waaʼin namaa?

• Wanoujale sünain pütchi mojuluʼut nüchiki Jehová jee nachiki na aʼyataashiikana nümüin, ¿jameerü naaʼin sutuma tia?

4. Waaʼinrajatka kaainjarale wanee wawala

¿Kasache waaʼinrajatka watüjaale saaʼu kaainjalain wanee wawala? Wekirajaa sünain wanee pütchi nuluwataakalü anain Maleiwa na israelitakana, wayaawateetka anainjee tü waaʼinrajatkat. Jaashajeʼera Levítico 5:1.

Maʼaka süküjain wetsiikulokot tüü, watüjaale saaʼu kaainjalain wanee wawala, waküjainjatü süchiki tia namüin na laülaashiikana. Aashajaainjanapejeʼe waya palajana nümaa chi kaainjalashikai süpüla niain aküjain süchiki tü naainjalakat namüin na laülaashiikana. Nnojorüle naaʼinrüin shia, wayeena aküjaka süchiki namüin na laülaashiikana. Waaʼinreerü tia süka niain alanaʼaleein aalin Jehová wapüla. Waaʼinrüle shia, ¿jamüsü weeʼiyataka naalin wapüla...

• ... Jehová?

• ... chi kaainjalashikai?

• ... na wawalayuukana?

 5. Nnojo sünainpünaain pia tü iküleesia ekirajakalü alawaa

 WATÜJAAITPAKA AAʼU

Süpüla waneepiain waya nümaa Jehová, nnojoliinjana aʼaleewajaain waya namaa na ooʼulaakana suulia anoujaa. Nnojoliinjana sünainpünaain waya tü iküleesia ekirajakalü alawaa.

Pusouta shiʼipajee

• ¿Jamüsü nnojoluinjatka waapajüin tü namakat na apóstatakana jee wanajüin tü neʼitaakat suluʼu Internet?

• ¿Anasüche yootule jee waaʼinrüle wanee kasa namaa na ooʼulaakana suulia anoujaa nünain Jehová?

• ¿Kasa waaʼinrajatka süpüla wojuʼitaleein suulia tü iküleesia ekirajakalü alawaa?