Naashin Jesús woutiisainjachi wanee wayuu süpüla nuushikajaain süchiirua nukuwaʼipa (paashajeʼera Mateo 28:19, 20). ¿Jamüsüche sukuwaʼipa tü woutiisaakat? ¿Kasa naaʼinrajatka wanee wayuu süpüla woutiisain nia?

1. ¿Jamüsüche sukuwaʼipa tü woutiisaakat?

Tü pütchikat woutiisaa, sünainjeejatü wanee pütchi griego «emetinnüshi shiroku wüin» maluʼulu. Wanaa sümaa woutiisain Jesús shiroku tü süchikat Jordán, ashaʼwalaa müshi nia süchikijee nimetinnüin shirokujee tü wüinkat (Marcos 1:9, 10). Akaʼaya woutiisapa na anoujashii shiimainshiikana, emetinnüshii naya shiroku wüin.

2. ¿Kasa atüjaanaka aaʼu nüchiki wanee wayuu woutiisapa nia?

Woutiisapa wanee wayuu, atüjaanüitpa aaʼu naapüin naaʼin nümüin Jehová. ¿Kasa naaʼinrajatka wanee wayuu süpüla naapüin naaʼin nümüin Jehová? Oʼuraajüinjachi nia nümüin, nüküjainjatü niʼyataweein waneepia nümüin. Naaʼinrajatü tia süpülapünaa nuwoutisaajünüin. Nüküjainjatü nümüin Jehová niainjachin nuʼwaajaka neʼe nümüiwaʼa otta shiainjatüin naaʼinmaaka maʼin naaʼinreein tü keeʼireekat naaʼin Maleiwa. Nüshatüinjatüin nukuwaʼipa Jesús jee naaʼinrajatüin tü nümakat. «Chi wayuu eekai tamaweein, anakaja müleka nnojorule naaʼinrüin tü nüchekakat neʼe nümüiwa. Shia anaka aluʼu müleka naaʼinrüle waneepia tü nüchekakat Maleiwa nüpüleerua» müshi Jesús (Mateo 16:24). Naapüle naaʼin wanee wayuu nümüin Jehová jee woutiisale nia, aleeweechi maʼin nia nümaa otta namaa na wayuu aʼwaajakana nia.

3. ¿Kasa naaʼinrajatka wanee wayuu süpüla woutiisain nia?

Woutiiseere pia, pikirajaa palajana nüchiki Jehová otta punouja maʼin nünain (paashajeʼera Hebreokana 11:6). Kooʼomüinre putuma punoula otta tü pütüjaakalü aaʼu nüchiki Jehová, aijeechi maʼin nia püpüla jee müsia keeʼireejeerü paaʼin püküjain pütchi jee paaʼinreein tü sümakat tü Bibliakat (2 Timoteo 4:2; 1 Juan 5:3). Kapürale naaʼin wanee wayuu tü nüküjakat chi Maleiwakai nümüin, naapeerü naaʼin nümüin jee woutiiseechi nia (Colosas 1:9, 10). a

 WEKIRAJAA SOOʼOMÜIN

4. Tü watüjakat sünainjee woutiisain Jesús

Anuu sooʼomüin tü pütüjaainjatkalü aaʼu süchiki woutiisain Jesús. Jaashajeʼera Mateo 3:13-17. Süchikijee, yooto jia süchiki tüü:

• ¿Awoutisaajünüshiche Jesús joʼuuiwaʼaya nia?

• ¿Oʼyotunüsüche wüin saaʼu nikii Jesús? ¿Jamüsü sukuwaʼipa nuwoutisaajia Jesús?

Wanaa sümaa woutiisain Jesús, oʼttushi nia sünain tü aʼyatawaa eʼitaanakat najapuluʼu nutuma Maleiwa. Jaashajeʼera Lucas 3:21-23 otta Juan 6:38 otta yooto jia süchiki tüü:

• Süchikijee woutiisain Jesús, ¿kasa aʼyatawaa naaʼinmaaka maʼin?

5. Puunteerü woutiisain pia

Eesü wainmajüle naaʼin wanee wayuu saaʼu naapüin naaʼin nümüin Maleiwa jee woutiisain nia. Ayatüle pikirajaain sooʼomüin nüchiki Jehová jee piʼraajüin nukuwaʼipa, puunteerü woutiisain pia. Süpüla pütüjaain saaʼu nachiki waneinnua wayuu ountakana tia, jünaja tü VIDEOKOT.

Jaashajeʼera Juan 17:3, TNM otta Santiago 1:5 otta yooto jia süchiki tüü:

• ¿Kasa naaʼinrajatka wanee wayuu süpüla nuuntuin woutiisain nia?

1. 1. Waapüin waaʼin nümüin Jehová wanaa sümaa waküjain nümüin waʼyataweein nümüin waneepia.

2. 2. Wanaa sümaa woutiisain waya atüjaana aaʼu waapüitpain waaʼin nümüin Maleiwa.

 6. Woutiisapa wanee wayuu müichipa Jehová nümüin maʼaka naaʼin wanee nüshi

Woutiisapa waya, wawalayuuinnapa na anoujakana nünain Jehová sainküin tü mmakat. Jaʼitashii jalejeʼewaliin waya jee jamapuʼuin maʼin tü wakuwaʼipakat, wanaawaitpa tü wanoujakalü anain jee waaʼinrüin tü sümakat tü Bibliakat. Jaashajeʼera Salmo 25:14 otta 1 Pedro 2:17 otta yooto jia süchiki tüü:

• ¿Kasa anasü weʼreetka woutiisale waya saashin tia wetsiikulokalüirua?

 WATÜJAAITPAKA AAʼU

Woutiisainjachi wanee anoujashi naashin Jesús. Süpüla nuuntuin tia, kanoulainjachi maʼin nia nünain Jehová, naaʼinrüinjatü tü nümakat otta naapüinjatü naaʼin nümüin.

Pusouta shiʼipajee

• ¿Jamüsü sukuwaʼipa tü woutiisaakat? ¿Jamüsü choʼujaaka woutiisain wanee wayuu?

• ¿Jamüsü choʼujaaka naapüin naaʼin wanee wayuu nümüin Maleiwa jee woutiisain nia?

• ¿Kasa naaʼinrajatka wanee wayuu süpülapünaa naapüin naaʼin nümüin Maleiwa jee woutiisain nia?