“Au sa Vakatakila na Yacamuni”

“Au sa vakatakila na yacamuni vei iratou oni solia vei au e vuravura . . . Au sa vakatakila vei iratou na yacamuni au na vakatakila tiko ga.”​—JONI 17:6, 26.

Kena iBalebale: A vakatakila o Jisu na yaca ni Kalou ni dau vakayagataka ena cakacaka vakaitalatala. A kena ivakarau me wilika na iVolatabu o Jisu, ena dau cavuta gona na yaca ni Kalou. (Luke 4:16-21) A vakavulici ira na nona imuri mera masuta: “Tamai keimami, me dokai na yacamuni.”​—Luke 11:2.

Lotu vaKarisito Taumada: A tukuna vei ratou na qase mai Jerusalemi na yapositolo o Pita ni digitaka mai na veimatanitu na Kalou “e dua na ilawalawa me vakatokai ena yacana.” (Cakacaka 15:14) Eratou vunautaka na yapositolo kei na so tale nira “na bula o ira kece era masuta na yaca i Jiova.” (Cakacaka 2:21; Roma 10:13) Eratou vakayagataka tale ga na yapositolo na yaca ni Kalou ena iVolatabu vaKirisi vaKarisito. Na Tosefta, se na ikuri ni lawa a vakacavari na kena volai ena rauta na 300 S.K., e tukuna me baleta na nodra vakama na dauveitusaqati na ka era vola na lotu vaKarisito: “E sega ni tarovi na kena vakamai na nodra ivola na Evangelist kei na minim [nanumi nira Jiu lotu vaKarisito]. Era vakamai na ivola ena vanua ga era tu kina, . . . oka kina na ivola e volai kina na yaca ni Kalou.”

O Cei Nikua Era Vakataki Ira na Lotu vaKarisito Taumada? E tukuni ena ivakamacala taumada ni iVolatabu na Revised Standard Version e vakadonuya na National Council of the Churches of Christ mai Merika: “A sega ni vakabauti nira tu eso tale na kalou, sega ni gadrevi kina me vakayagataki e dua na yaca e veiganiti me vakaduiduitaka na Kalou dina duadua ga. A mani muduki na ivakarau qori vei ira na lotu vakaJiu ni bera na lotu vaKarisito, e sega ni veiganiti mera vakayagataka raraba na veimatalotu vaKarisito.” A mani sosomitaki na yaca ni Kalou ena icavuti, “TURAGA.” Dua na gauna ga qo, a vakaroti ira na bisovi na Vatikani: “Me kua ni vakayagataki se cavuti ena gauna ni lagasere se masu na yaca ni Kalou e volai ena va na matuavosa vakaIperiu YHWH. *”

O cei nikua era vakayagataka qai vakatakila tiko na yaca ni Kalou? Ni se itabagone o Sergey mai Kyrgyzstan, a sarava e dua na iyaloyalo e tukuni kina ni yaca ni Kalou o Jiova. A sega ni rogoca tale na yaca ni Kalou me rauta na tini na yabaki. A qai toki i Merika o Sergey, rau sikovi koya sara e rua na iVakadinadina i Jiova rau qai vakaraitaka vua mai na iVolatabu na yaca ni Kalou. A marau o Sergey ni kila ni tiko e dua na ilawalawa era vakayagataka na yaca, Jiova. Na ivolavosa mada ga na Webster’s Third New International Dictionary e vakamacalataka na matavosa “Kalou o Jiova” me “kalou cecere era kila ra qai qarava duadua ga na iVakadinadina i Jiova.”

[iVakamacala e ra]