O Cei e Vakavuna Tiko na ca Kece?

NI RAICA na komada ni mataivalu ni Matabose kei Vuravura e Rwanda ni sega ni tarovi na veivakamatematei ena 1994, a tukuna ni vaka sara ga e raica na tevoro. E kaya tale e dua me baleta na veika vakadomobula ena gauna oya: “Ke cakitaki Setani tiko ga e dua, meu kauti koya mada ina dua na ibulubulu vakaitamera e Rwanda.” E vakavuna dina na Tevoro na veika vakaloloma va qori?

Era sega ni vakabauta e levu ni dua na kabula vakayalo ca e vakavuna tiko me caka vakaveitalia na ivalavala voravora kei na veivakalolomataki. E levu era nanuma ni veika qori e vu ga mai na ca eda sucukaya mai kei na noda gagadre kocokoco. Eso tale era nanuma ni dua na ilawalawa vutuniyau ra qai rogo, era lewe ni dua na matailawalawa vuni era vakacalai ira tiko na tamata ena sagavulu na yabaki sa oti mera lewa kina na vuravura. Era tiko tale ga eso era beitaka na matanitu kei ira na kena iliuliu nira vakavuna tiko na veika tawadodonu kei na rarawa.

Na cava mada o nanuma? Na cava sa rui takalevu kina nikua e veiyasa i vuravura na ca, veivakalolomataki, veivakamatematei, kei na rarawa ni sagai tiko mada ga me vakalailaitaki? Na cava era guta tiko ga kina na tamata na ivakarau ni bula era kila ni na vakaleqai ira ga? E tiko beka e dua e vakavuna tiko mera cakava qori? O cei sara mada e liutaka tiko na vuravura? O na rairai kurabuitaka na isau ni taro qori.