Raica sara na lewena

Keirau Vakatulewataka me Keirau Bula Rawarawa Ga

Keirau Vakatulewataka me Keirau Bula Rawarawa Ga

Rau vakaitikotiko o Madián kei Marcela ena dua na vale vinaka e Medellín, e Colombia. E sau vinaka nona cakacaka o Madián rau tiko kina ena dua vale totoka. Ia ni rau dauveiqaravi i Jiova, qo na ka e uqeti rau me rau dikeva tale nodrau isausau. Rau kaya: “Ena soqo sigadua ena 2006 e kena ulutaga, ‘Qarauna me Vinaka na Matamu,’ levu na vunau keirau rogoca e uqeti keirau me keirau bula rawarawa ga, me rawa ni keirau solia neirau vinaka kece vei Jiova. Oti na soqo, keirau liaca ni veicalati tiko na ka keirau cakava. Levu na iyaya keirau volia, levu tale ga neirau dinau.”

Oti na veivakayadrati vakayalo qori rau saga sara o Madián kei Marcela me rau bula rawarawa ga. Rau kaya: “Keirau tekivu maninitaka neirau ilavo. Keirau toki ena dua na vale lailai, volitaka neirau vale, keirau qai volia e dua na motopai.” Kuria ya, rau sa sega ni dau gole ina vanua rau na temaki kina me rau voli yaya sau levu. Rau vakayagataka e levu na gauna ena wasei ni itukutuku ena iVolatabu vei ira na tiko voleka. Rau dau maliwai ira tale ga na itokani era gumatua ni qarava na Kalou o Jiova, me vakataki ira na painia lavotaki. *

Rau mani vakatulewataka o Madián kei Marcela me rau vakarabailevutaka nodrau cakacaka vakaitalatala ena nodrau toki ina ivavakoso lalai era vinakata na veivuke. E cegu ena nona cakacaka o Madián me rawa ni rau toki. E sega ni taura rawa nona supavaisa na vu ni nona cegu. E tarogi koya sara o Madián: “E levu na ilavo o rawata, ia o bau marau?” E tukuna ni sega ni marau ena levu ni veika dredre e sotava. E kaya sara o Madián: “Kena ibalebale e sega ni bibi ena noda bula na ilavo. Na ka ga e bibi meda kila na sala meda marau kina. E vakavu marau vakalevu vei keirau vakaveiwatini neirau vakavulici ira eso tale me baleta na Kalou. Keirau via vakayagataka gona vakalevu neirau gauna ena cakacaka marautaki qo.”

Rau lomavakacegu qai marau vakalevu o Madián kei Marcela ni rau vakaliuca na veika vakayalo. Ena 13 na yabaki sa oti, rau veiqaravi tiko ena ivavakoso ena vuaira kei Colombia, na vanua e vinakati vakalevu kina na veivuke. Qo rau sa marautaka vata nodrau veiqaravi tabu vakapainia lavotaki.

^ para. 3 O ira na painia lavotaki era lesi mai na valenivolavola ni tabana ni iVakadinadina i Jiova mera vunautaka na itukutuku vinaka ena dua na vanua. E dau soli tale ga vei ira e dua na ilavo lailai me vukei ira.