Ena ika28 ni Okosita ina ika2 ni Seviteba 2023, e vakayacori e dua na soqo na Agricultural Show e Harare, mai Zimbabwe. E vakarautaki kina e 500 na vanua ni sarasara, ra qai gole yani e sivia ni le 250,000. Ra vakarautaka na tacida na vanua me vakaraitaki kina na ivola vakaivolatabu ena vosa vakavalagi, vakaNdebele (Zimbabwe), kei na vosa vakaShona. E le 79 na tacida era vakaitavi kina ra qai veisoliyaka e voleka ni 6,300 na ivola vakaivolatabu. E le 116 era via vulica na iVolatabu.

E gole yani ena vanua ni sarasara e dua na gonetagane o Tamula. E raica sara na ivola Questions Young People Ask​—Answers That Work, Volume 1 kei na 2. Ni kila ni o ira na iVakadinadina i Jiova era dau veivakavulici wale ena iVolatabu, e taroga sara, “Rawa ni o vakamacalataka vei au e levu tale na ka ena iVolatabu?” E vakaraitaka sara vua na tacida na iwalewale ni vuli iVolatabu ena brochure, Marau me Tawamudu! E vinakata me vuli e mani tuvanaki me sikovi koya e dua na tacida tagane.

Dua na turaga e gole tale ga yani ena vanua ni sarasara, qai kaya ni uqeti koya nodra yalomalumalumu na tacida kei na nodra gugumatua ena vunau. E wilika sara na tacida na Maciu 28:​19, 20 qai vakamacalataka nida dau raica vakabibi na ivakaro i Jisu meda vunau. E kaya na turaga qori ni vinakata me yaloqaqa vakataki keda ga. E sureti koya sara na tacida me vulica na iVolatabu, e mani vakadonuya.

E gole yani e dua na marama ena vanua ni sarasara, qai vakavinavinakataka na noda itovo vinaka. E tukuni sara vua ni rawati ga qori ena noda vulica na iVolatabu qai muria sara. E vakaraitaka vua e dua na tacida yalewa na iwalewale ni vuli iVolatabu e ena brochure, Marau me Tawamudu! E qoroya na marama qori na levu ni ivola vakaivolatabu e tabaki qai sega ni saumi, wili kina na ivola me baleti ira na vuvale kei na itabagone. E taura sara eso na ivola qai vakadonuya me vuli. E kaya, “Qo e dua na iloloma talei!”

Era vunau tawalokuci tale ga na tacida ena vanua ni sarasara. Rau veitalanoa e dua na tacida tagane kei na dua na marama e tiko tale ga nona vanua ni sarasasa. E solia sara na tacida tagane vua na iVolatabu kei na ivola vakaivolatabu. E marautaka qai kaya ni vinakata tu me dua nona iVolatabu. E solia tale ga nona naba ni talevoni me rawa ni sikovi koya e dua na tacida yalewa.

E dua na tacida yalewa o Ranganai, e vakamacalataka nona vakaitavi ena vunau lavotaki qo. E kaya: “Vica na yabaki sa oti e dredre meu lai vunau ena vuku ni kequ ituvaki. Ia au vulica ke mani dredre vacava na ituvaki me donu tiko ga noqu rai. Noqu vakaitavi ena vunau lavotaki qo e dua dina na ka ni veivakalougatataki. E solia vei au na nuidei qai vakayaloqaqataki au.”

Eda marautaka na nodra ivakaraitaki na tacida e Zimbabwe kei na noda duavata meda “cakacaka vata kei na Kalou.”​—1 Korinica 3:9.