Ena Feperueri ina Maji 2026, ratou vesu e va na tacida e Ukraine ni ratou sega ni via vakaitavi ena ivalu ena vuku ni nodratou vakabauta. Ena gauna qo, era vesu tiko e 18 na tacida ena vanua qori.

Ena ika25 ni Feperueri 2026, e vakatulewataka na mataveilewai na Peresypskyi District Court of the city of Odesa me vesu tu vakawawa o Brother Serhii Myniov, e yabaki 48. E sega tale ga ni vakadonui me sauma na ilavo me sere kina. Ia, e donu tiko ga na rai nei Serhii dina ni dredre na ituvaki e sotava, e kaya, “Au kila ni noqu vosota na veika tawadodonu e caka vei au, e ivakadinadina vei ira eso tale.”

Ena ika2 ni Maji 2026, e vakatulewataka na mataveilewai na Lychakivskyi District Court of the city of Lviv me vesu tu vakawawa o Brother Ruslan Khramtsov, e yabaki 39. E sega tale ga ni vakadonui me sauma na ilavo me sere kina. E kaya o Ruslan: “Noqu masu kei na wili iVolatabu e vukei au meu raica na sala e tokoni au kina o Jiova. Qo e vukei au meu vosota qai vaqaqacotaka noqu vakabauta.”

Ena Noveba 2025, e sega ni vakadonuya na mataveilewai na Starosambirskyi District Court of the Lviv Region me vakaitavi ena tabana ni veiqaravi raraba o Brother Dmytro Petrov, e yabaki 49 baleta ni sega ni via curu ena mataivalu. E kerea o Dmytro me rogoci tale nona kisi, ia e sega ni vakadonui. Ena ika11 ni Maji 2026, e totogitaki me tolu na yabaki e valeniveivesu. Ni bera ni vesu o Dmytro, e kaya: “Na ivakaraitaki ni nodra yalodina na dauveiqaravi ni Kalou ena gauna makawa kei na gauna qo, e vukei au meu dei tiko ga. Au vakadeitaka ni na lekaleka ga na ituvaki dredre au sotava tiko qo.”

Ena Noveba 2025, e sega ni vakadonuya na mataveilewai na Yampil District Court of the Vinnytsia Region me vakaitavi ena tabana ni veiqaravi raraba o Brother Dmytro Prodan e yabaki 32, baleta ni sega ni via curu ena mataivalu. E kerea o Dmytro me rogoci tale nona kisi, ia e sega ni vakadonui. Ena ika18 ni Maji 2026, e totogitaki me tolu na yabaki e valeniveivesu.

Meda masulaki ira tiko ga na tacida era vesu tu e Ukraine kei na nodra vuvale, wili kina o ira “kece na vakaitutu, me rawa nida bula galala tiko ga, meda vakacegu nida qarava mai vu ni lomada na Kalou, da qai yalodina kina.”​—1 Timoci 2:2.