Ratou vesu e va tale na tacida tagane e Ukraine ni ratou sega ni via vakaitavi ena ivalu. Ena gauna qo, era le 37 na iVakadinadina i Jiova era vesu tiko ena vanua qori nira tawaveitovaki qai sega ni via vakaitavi ena ivalu.

Ena ika15 ni June 2026, e totogitaki me dua na yabaki e valeniveivesu o Brother Vitalii Stepaniuk, e yabaki 49. Ia e marau tiko ga, dina ni sega ni sotavi ira nona vuvale kei na nona itokani. E kaya: “E dau dredre meda vosota ni yaco eso na ituvaki, ia meda namaka nida tu qo ena iotioti ni veisiga. Ena gauna dredre qo, e vakaukauataki noqu vakabauta qai vaqaqacotaki noqu veiwekani kei Jiova.”​—1 Pita 1:7.

Ena ika16 ni June, e kaya e dua na mataveilewai ena yasayasa o Lviv me vesu tu vakawawa me yacova sara na ika14 ni Okosita o Brother Oleksii Sushko, e yabaki 34. E sega ni vakatara tale ga na mataveilewai me sere ke sauma mada ga vakailavo. E kaya o Oleksii: “Ena gauna au vesu kina, au vakila ni vukei au tiko kei watiqu o Jiova me vaka e dua na tama dauloloma. E kauta laivi sara ga na neirau lomaleqa kei na rere.”

Ena ika29 ni June, e kaya e dua na mataveilewai ena yasayasa o Chernihiv me vesu o Brother Anatolii Rashevskyi e yabaki 46, me lima na yabaki dua na vula e valeniveivesu. E kerea o Anatolii me rogoci tale nona kisi, ia ena vesu tiko ga ni waraka tiko na kena macala. E kaya ni nodra veitokoni na tacina vakayalo, e vakadeitaka kina ni vukei koya tiko o Jiova.

Ena Feperueri 2024, e kaya e dua na mataveilewai ena yasayasa o Zakarpattia ni cala o Zoltan Habor e yabaki 45, qai totogitaki me tolu na yabaki e valeniveivesu ni sega ni via vakaitavi ena ivalu. Koya gona ni sega ni iVakadinadina i Jiova ena gauna qori, e vulica na iVolatabu e valeniveivesu kei na so na tacida. Ena gauna qo e sa dautukutuku bera ni papitaiso o Zoltan qai toso vinaka tiko vakayalo.

Nida vuvale vakayalo e vuravura raraba, e uqeti keda na nodra ivakaraitaki ni yaloqaqa kei na vakabauta na tacida e Ukraine. Eda vakavinavinakataki Jiova ni tokoni ira era vesu tu kei na nodra vuvale.​—Same 34:19.