Ratou vesu e lima tale na tacida tagane e Ukraine ni ratou sega ni via lewena na mataivalu. Ena gauna qo, era vesu tiko e 34 na iVakadinadina i Jiova e Ukraine ena vuku ni nodra vakabauta.

Ena Janueri 2026, e kaya e dua na mataveilewai ena yasayasa o Vinnytsia ni cala o Brother Dmytro Kozhemiakin, e yabaki 37, mani tau na kena itotogi me vakatatabutaki me dua na yabaki. Ena Epereli e sega ni duavata kei na vakatulewa qori e dua na mataveilewai, mani totogitaki me tolu na yabaki e valeniveivesu. Ena ika26 ni Me, e kau me lai vesu o Dmytro. E kaya ni nodra masu na mataveitacini kei “na vakacegu ni Kalou e uasivia na vakasama kece,” e vukei koya qai vakaukauataki koya tiko ga.​—Filipai 4:7.

Ena ika28 ni Me, e kaya na mataveilewai ena yasayasa o Lviv me vesu o Brother Liubomyr Tomchuk, sa yabaki 47. Ni rogoci nona kisi, e kaya na turaganilewa ni na rawa ni sere ke sauma na ilavo, ia ena tiko ga ena keba ni mataivalu. E sega ni vakadonuya qori o Liubomyr, e vakatulewataka me vesu tiko ga. E kaya: “Au dau nuiqawaqawa niu sogolati ena rumu, qori e ka ni sasaga kina meu tu e valeniveivesu. Ia au qai vesu vata kei na dua na tacida tagane, au raica ni qori na sala e vukei au kina o Jiova. Na ituvaki qo, e vaqaqacotaka noqu nuitaki Jiova qai vukei au meu dei tiko ga.”

Ena ika3 ni June, e vakarota na mataveilewai ena yasayasa o Zakarpattia me rau vesu o Brother Mykhailo Hoshii e yabaki 49, kei Brother Bohdan Turushev e yabaki 30. E kaya na turaganilewa ni rau na sega ni sere, ke rau sauma mada ga na ilavo.

Ena Janueri, e totogitaki Brother Serhii Bashkirov e yabaki 58, e dua na mataveilewai me rua na yabaki e valeniveivesu ni sega ni via vakaitavi ena ivalu. E kerea na matanitu me veisau na itotogi kei Serhii, e mani totogitaki koya na mataveilewai levu ena Epereli me tolu na yabaki e valeniveivesu. Ia ena ika8 ni June, e tokitaki ena dua na valeniveivesu ena yasayasa o Vinnytsia. Ni bera ni vesu e vakamacalataka na ka e vukei koya me vosota. E kaya: “Au masuti Jiova me vukei au me donu noqu vakatulewa. E sauma noqu masu ni vakarautaka na veidusimaki ena nona Vosa kei na nona isoqosoqo. Era vakaraitaka na mataveitacini nira lomani au kei na noqu vuvale. Na veika kece qo, e vukei au meu lomavakacegu tiko qai kila ni vakadonui au o Jiova.”

Nira tusaqati tiko na mataveitacini e Ukraine ena vuku ni nodra vakabauta, meda masulaka me ‘taqomaki ira’ tiko ga o Jiova nira vakadeitaka mera kua ni “vakavuravura.”​—Joni 17:​15, 16.