Ena Julai 2026, rau sere e rua na tacida mai na valeniveivesu e Rusia. Rau a vakatatabutaki tu e vale, ia qo sa mai cava na kedrau itotogi

Brother Aleksandr Filatov

A vesu tu vakawawa me rua na yabaki o Aleksandr. Ena ika28 ni Tiseba 2022, e totogitaki me ono na yabaki e valeniveivesu. Ena ika9 ni Julai 2026, e sere mai valeniveivesu.

Voleka ni lima na yabaki nona yawaki ratou na nona vuvale o Aleksandr, na luvena gone duadua e se qai yabaki rua vula ono ena gauna e vesu kina. Dina ni yaco na ituvaki qori, e ratou dau veitokoni tu ga na nona lewenivuvale. E kaya na watina o Yelena: “Me vaka ni rau se gone sara na luvei keirau e noqu itavi meu raica me rau karoni. Au saga ena noqu vinaka taucoko me tiko na gauna meu vakavulici rau kina ena ka me baleti Jiova, au vakaraitaka vei Aleksandr na ituvaki keitou sotava tiko me rawa ni masulaka sara ga na ka keitou gadreva, qai volavola mai vei rau na gone me vakadeitaka ni lomani rau. Keitou yalodina vei Jiova qai veivolekati vakavuvale ena vuku ni nodra loloma kei na veitokoni na mataveitacini.”

Brother Vladimir Maladyka

A vesu tu vakawawa o Vladimir me dua na yabaki ono na vula, oti e vakatatabutaki tu i vale me sivia ni ciwa na vula. Ena ika6 ni Okotova 2022, e totogitaki me ono na yabaki e valeniveivesu. Ena ika28 ni Julai 2026, e sere mai valeniveivesu.

Ena gauna e vesu tu kina e saga me vakaraitaka tiko ga na itovo vakarisito, dina ni sotava na ituvaki dredre. E kaya: “Au masuti Jiova me vukei au me vinaka noqu veimaliwai kei ira e valeniveivesu. Niu veitalanoa kei ira, au dau vakasamataka vinaka na ka meu tukuna, baleta meu cavuta na vosa e veidokai. Au saga tale ga meu veikidavaki niu sotava e dua, baleta ni dredre mera cakava qori e levu. Toso na gauna au rogoca ni kaya e dua na ovisa vua e dua na kaivesu, ‘Yadra vinaka.’Au kurabui sara ga! Oti ra sa cakava tale ga qori na kena vo. Dua na ka na levu ni noqu marau ni ka au tukuna qai cakava e lagiti kina o Jiova.”

Eda marau nida kila ni rau sa sota tale kei na nodrau vuvale o Aleksandr kei Vladimir. Na nodrau yalodina kei na vosota e vakadeitaka ni o Jiova ena “vakaraitaka na nona kaukaua vei ira e taucoko vua na lomadra.”​—2 Veigauna 16:9.