Wlüünën ˗nu ꞊vadhɛ ˗wa ˗pö wo ˗bhɛɛ, ˈˈkɛɛ ˈwaa˗ kë ˗dhɛkpaɔyi ˈˈpɛpɛ ˈka. ˈYaa za ˈgü ꞊dhɛ wlüünën ˗nu bhë ˗an mɛn ˈbhaa ˗nu ˗wo wo ˗de dhɛɛˈˈ ˗kpɔ ˈwo˗ pö: «Bhɛɛsü bhë, mɛn zuʋ̈ˈˈ ˗kë ˗saa ˗pë ˈˈkpaan ˗mü ˗ee ɛɛnˈˈ pëwɔngbɩɩsü ˗mü ˗ee?»

•  ˈMën ˈö ˗tɔ bhɛɛsü?

•  ˗Zlan ö ˈˈtʋ ˗to kwa ˗bha bhɛɛwo ˗bha ˗ee?

•  ˈMën ˈa ˗dho bhɛɛˈˈ ˗a ˗wɔn ˈgü?

•  Pë ˈö wlüünën ˗nu ˗wa pö

 Bhɛɛsü ˈnën ˗tɔ ˈwɔn ˗blɛɛ ˗Zlan ˈö pë ꞊gban ˈˈpɛpɛ ˗da ˗a ˗dhɛ ˗sü. ꞊Bhlëëwɔn ꞊dede ˗mü! Zoova ˗yö ˈˈgbɩɩ˗ mɛnbhɩɩdhe ˗nu ˗ta ˈwɔn ꞊gban ˈˈpɛpɛ ˈgü. ˈˈKɛɛ ˈkö ˗kë ˈˈdhʋ̈, «ˈyaa mɛn ˈbha ˈka ꞊gblɛɛn.» (Këwɔn ˗nu 17:27) Biblö ˗ya ˗pö ˗Ʒiaanwo ꞊dhɛ: ‹˗Ka ꞊yɔɔn ˗Zlan ˈˈsɔɔ, yöö ˗dɩ ˈpö ˗yö ˗dho ꞊yɔɔn ka ˈˈsɔɔ.›​—Zakö 4:8.

 Ü ˗dho ꞊ɲɔɔn ˗Zlan ˗bha ˗kɔ ˗kë ꞊dhɛ?

•   ˗A ˈˈslö ˗blɛɛsü ˈö ˈdhö ˈyö ˗tɔ bhɛɛsü. ˗Kɔ ˈü ˗dho ˈwɔn blɛɛˈˈ ˗a ˈka ˗Zlan ˗dhɛ ˈyö bhë.

•   ˗A ˈˈslö ꞊plɛ ˗naan ˈnën ˗tɔ Biblö draansü. ˗Kɔ ˈö ˗Zlan ˗yö ˈwɔn ꞊blɛɛ ˗a ˈka ü ˗dhɛ ˈyö bhë.

 Kaa ˗Zlan ka ˗bha ˈwɔn ˗blɛɛ ka ˈko ˗dhɛ ˗sü ˈö ˗kë bhɛɛsü waa Biblö draansü ˈka bhë, ˗yö ˗dho ü ˗takun ˈö kaa ˗Zlan ka ˗bha ˈˈtɔŋdëdhɛ ˗gɛn ˗yö ˗gban.

 «ˈWɔn ˗blɛɛ Zoova ˗dhɛ ˗sü ˈö ˗kë dhiaŋ ˗zë ˗Zlan ˈö pë ꞊gban ˈˈplɛ ˗gɔ ˗ta ˗a ˈˈpiʋ̈ ˗sü ˈka bhë, ˈwɔn ꞊bhlëësü ꞊dede ˗mü mɛnbhɩɩdhe ˗nu kwa ˗bha ˈka.»​—Zenemi.

 «A n zuʋ̈piʋ̈wɔn ˗nu blɛɛˈˈ ˗ni ˈgü Zoova ˗dhɛ, a ˗kë n ˗de ˈgü ˗a ˈˈsɔɔ ꞊dedewo.»​—Miranda.

 ˈKö ˗kë ꞊dhɛ ü ˈdhaŋ˗ ˗bho ˗Zlan dhiʋ̈ˈˈ, ˈü ꞊bhɛɛ ˗a ˗dhɛ, ˗yö ꞊mɔɔn˗ ˗bha ˈö ˗kë ü ˈgü ꞊dhɛ ˈyaa ö ˈˈtʋ ˈto ü ˗bha bhɛɛwo ˗bha. ˈˈKɛɛ Biblö ˗ya ˗pö Zoova «˗yö ˈö ˈˈtʋ ˗to kwa ˗bha». (Psaume 65:2) ˗Yö ü ꞊faan ˗mën kö ˈü ü «˗ta bho [ü] ˗bha ˗zʋgɔndhe ˗nu ˗kwɛɛ ˈka˗ ˗ta.» ˈMën ˗kë? «˗A ˗gɛ ˗mü ꞊dhɛ ˗a ˈˈtʋ̈ŋ ˗yö [ü] ˈgü.»​—1 Piɛdhö 5:7.

 ˗Bhö ü ˗zota: ˈBhaa ˈˈdoodɔ ü ˈˈtɔŋdë ˗nu ˈˈpiʋ̈ ˗kplawo ˗ee? Ü ꞊mɔɔn˗ ˗bha ˈü ˈwɔn blɛɛˈˈ ˈˈdhʋ̈ ˈpö ˗Zlan ˈˈpiʋ̈. Bhɛɛˈˈ ˗a ˗dhɛ ˈˈtʋ̈ŋ ꞊gban ˈka, ˈü˗ ˈtɔ Zoova pö ü ˗bha bhɛɛsü ˈgü. (Psaumes 86:5-7; 88:9) Biblö ˗ya ˗pö ü ‹ˈgü ˈya ˈdho ga ˗bhɛa ˗Zlan ˗dhɛ ˗sü ˈka tongtongdhö.›​—1 Tesadhonikö 5:17.

 «N ˗man bhɛɛsü bhë, ˈˈdoo ˗dɔ n Dë ˈö dhaŋ˗ ˈgü ˗a ˈˈpiʋ̈ ˗sü ˗mü. Yi ˗bha ˈˈdoo ˈö ˈˈdhiʋ̈ ˗a ˈgü, a ꞊mɔɔn˗ ˗bha ˈa n zuʋ̈piʋ̈wɔn ꞊gban pö ˗a ˗dhɛ.»​—Moizɛsö

 «A ˈwɔn blɛɛˈˈ ˗ni ˈgü Zoova ˗dhɛ, a n zuʋ̈piʋ̈wɔn ꞊dede ˗blɛɛ ˗a ˗dhɛ. ˗Yö ˗kë ꞊dhɛ pë ˈa ˈwɔn blɛɛˈˈ ˗ni ˈgü n dhö ɛɛnˈˈ n ˈˈtɔŋdhe ˈˈgbɩɩ˗ ˗dhɛ ˗a ˈdhö.»​—Karɛnö

 Biblö ˗ya ˗pö:«Pë ˈtöüdhö ˈö ka ˗bha ˗wun ˗yö yö ˗a ˗bha yi ˈoo yi ˈka, ˗kaa ˗dhɛ ˗Zlan ˗gɔ ˗bhɛa ˗a ˗dhë ˗sü ꞊zuöˈ ˈplɛ ˈka waa˗ ˗a zuö pö ˗sü ˈka!»​—Fidhipö 4:6, NTBL.

 ꞊Ya kë ˈˈdhʋ̈ kö ü ꞊mɔɔn˗ ˗bha ˈü ü ˗bha ˈwɔn ˈˈgbɩɩ˗ ˗nu blɛɛˈˈ ˗a ˗dhɛ ˗ee? ꞊Ii! Biblö ˗ya ˗pö ˗Ʒiaanwo ꞊dhɛ: «˗Bhö ü ˗bha ꞊kwɛɛ˗ ˈgbinŋ˗ ˗nu ˗zuö Zoova ˗ta, ˗yö ˗dho ö ˗kɔ ˗ya ü ˗gɔ.»​—Psaume 55:22.

 ˈˈKɛɛ ü ˗bha ˗bhɛɛ ˗Zlan ˗dhɛ ˗sü ˈya ˗dho kë ü ˗bha ˈwɔn ˈˈgbɩɩ˗ ˗nu ˗blɛɛ ˗a ˗dhɛ ˗sü ˈˈkpaan ˈka. «ˈNëndhe do ˈwo˗ ˗dhɛ Shantɛlö ˗ya ˗pö: «꞊Ya kë ꞊dhɛ ˈwɔn ˈˈgbɩɩ˗ ˗ya nu n ˗ta ˈyö ˈa ꞊kun ˈwɔn blɛɛˈˈ Zoova ˗dhɛ, yi ˗bha ˈˈtɔŋdëdhɛ yö ˈti ˗dho kë ˗së. N ˗man ˈgü, n dua ˗mü kö ˈa˗ ˈˈnuɛ bho ˗blɛɛsü ˈka. N dua ˗mü kö ˈa˗ ˈˈnuɛ bho pë ꞊va ˗wɔn ˈgü.»

 ˗Bhö ü ˗zota: ˈMën ˈü ˗dho Zoova ˈˈnuɛ bho ˗a ˗wɔn ˈgü ü ˗bha ˗tosɛta ˈgü? «Pë ˗yaaga ˗mɛɛn ˈü ꞊mɔɔn˗ ˗bha ˈü Zoova ˈˈnuɛ bho ˗an ˗wɔn ˈgü ꞊dɛɛ?

 «Pë ˗bhaasü ˈö kwa˗ ˗ga ˈö ˗kë kwa ˗dhɛ ˗së ꞊dhɛ ꞊blëë ˈˈbin ˗nu ˈdhö, kwa ꞊mɔɔn˗ ˗bha ˈkwa Zoova ˈˈnuɛ bho ˗a ˈwɔn ˈgü.»​—Anita.

 «Pë ˈbha ˈö ˗kë ü ˗dhɛ ˈˈdhiaasü ˗Zlan ˗dapë ˗nu ˈgü, ɛɛnˈˈ Biblö ˈˈɲan ˈbha ˈö pa ü zuʋ̈ˈˈ ˈka ꞊dedewo, ˗bhö ü ˗zota ˗a ˈgü, kö ˈü Zoova ˈˈnuɛ bho ˗a ˗wɔn ˈgü.»​—Brian