Mukalelo ononihu vina onkosihu nyambo dha vo’kwani onowiwanana na Bibilia, koona enloga Bibilia mwaha wa makani aba:

•  ● Kahiyo yabure okubanya nigakweliwa. Anamafwara a Yezu, ahunla vina ahikubanya vaddiddi sabwa ya okweliwa attu a’kwelani. (Joau 11:33-​35, 38; Merelo 8:2; 9:​39) Nona, mwa iyo, nyambo dha vo’okwani kahiyo gari ya mavego. (Kohelét 3:​1, 4; 7:​1-4) Ottiya ejo, ninona ninga gari ya olagiha ntanalo obe ologiha okwela vina wapangarhaza ena.​—Roma 12:15.

•  ● Amarafula kanubuwela, kuloga, kanziwa elo. Kintanala elemelelo obe mburo onkalihu, iyo kaninkosa dhilobo dhinlagiha wi ninorumela wila amarafula akalawovi vina anowodha oniputtula obe onikamihedha. (Kohelét 9:​5, 6, 10) eji enotaganyiheya na orabela mattanga animuttittimiha marafula, waperekela mikutto, ologa na awene obe wakumbirha dhilobo vina mattanga ankoseliwa mamukwela, iyo ninorabela dhilemelelo esi dhotene sabwani ninowiwelela nlamulo na mBibiliani ninloga: ‘Ttiyani okala na attu abo, . . . vina kamuttidde dhilobo dhokwaruliha.’​—2 Korinto 6:​17.

•  ● Nihikalawo njedhelo mwa amarafula. Bibilia onosunziha wi onele okalawo ovenyihiwa mukwani vina nasikuna okwa onele ogoma. (Merelo 24:15; Ovuhulela 21:4) Dhahene ninga mwakamihedhiwe Akristu a masaka a mundduni, njedhelo ntti ninonikamihedha ohikubanyetxa vina ohikosa dhilobo dhinimusilidha Yehova.​—1 Tesalónika 4:​13.

•  ● Bibilia onologa wi jofuneya ovipimelela. (Gano 11:2) Kaninona nyambo dha vo’kwani ninga gari ya muttu olagiha wi ‘okana kobiri vaddiddi’ obe mafumo mena. (1 Joau 2:​16) Nona kaninkosa nyambo dha vo’okwani dhinnonga kobiri yinji vina na efunelo ya attu ovegavo. Kaningula kaxau ya kobiri enddimuwa nne kaninabala guwo dhokoddela vaddiddi wila nang’aniwetxe bahi.

•  ● Kaninamagelela attu ena orumela masunziho ehu mwaha wa nyambo dha vo’kwani. Mwebaribari, ninofwara magano aba: ‘Muttu-muttu wa iyo onele ottongiwa na Mulugu mwaha wa dhiriliye.’ (Roma 14:12) Mbwenye, akala enokalawo gari, iyo ninotapulelamo dhinrumelihu ‘na oviyeviha vina nriho.’​—1 Pedro 3:​15.

 Mburo: Akala Anamudhi anogana okosa nyambo dha vo’kwani, anosakula mburo-mburovi ononani wi onele ofwanyelela, ninga motagiha, Onyumbani ya Omwene, o nyumbani ya anokwa, vatakulu, o krematoriyu obe omasiye.

 Mattanga: Vanokosiwa diskursu entapulela txini ensunziha Bibilia mwaha wa njedhelo na ovenyihiwa mukwani, wila apangarhaziwena anamudhi vina amarho. (Joau 11:25; Roma 5:​12; 2 Pedro 3:​13) Mwari mwa diskursuya, munologiwa mikalelo dhing’onovi dhana marafulaya vina txino ologa ensunza attuya na yotagiha yaye yororomeleya.—2 Samuwel 1:​17-​27.

 Enowodheya wiba jibo endela mBibiliani. (Kolosi 3:​16) Omamalelowa, ninokosiwa nlobelo wila apangaraziwena abale alivo.​—Filipi 4:​6, 7.

 Sokela obe opitxa: Kaninlogosa elobo mwaha wa mabasa a Mulugu, masiki o vo’kwani, vina kanikosa sokela mmatugumanoni ehu.​—Mateu 10:8.

 Anamewa: Attu ahili-Anamoona a Yehova, kankoddihiwa odhowa wona nyambo dha vo’kwani dhinkosiwa o Nyumbani ya Omwene. Dhahene ninga matugumano mena ehu, matugumano a nyambo dha vo’kwani kankoddihiwa muttu.

 Munamoona wa Yehova modha-modha ddungana enfwanyeliye okosa mowiwanana na etanalelo yaye eshagihiwe na Bibilia. (1 Timóteo 1:​19) Masiki dhawene, iyo kanindowa nne kaninkosa mattanga ahiniwanana na Bibilia.​—2 Korinto 6:​14-​17.