EKICWEKA C’OKWEGA 28
ECESHONGORO CA 123 Okworobera Entebeekanisa ya Yehova ey’Obwebembezi
Mbehi okabona amazima?
‘Mwemerere, mwezirikire amazima omu nda nk’orukoba.’ —EFE 6:14.
ENTEGO
Twaza kushwijuma entanisa eri ahagati y’amazima agari kukwata ahari Yehova agu twayegire n’ebishuba ebi Sitane n’abari kutuhiganisa bari kujanjaza.
1. Noyehurira ota ahabw’okumanya amazima?
ABAHEREZA ba Yehova nibakunda amazima agari omu Kigambo ca Ruhanga. Okwikiriza kwitu kwegamire ahari ago mazima. (Rom 10:17) Nitwikiriza ku Yehova yatireho ekibina c’Abakristo ngu kibe ‘enkingi kandi kibe obuhamizo bw’amazima.’ (1 Tim 3:15) Kandi nitworobera ‘abari kutwebembera’ ngu batukwase kushoborocerwa ago mazima g’omuri Bibuli kandi batuhe n’obuhabuzi obwegamire aha bi Ruhanga ari kwenda.—Heb 13:17.
2. Tukuratize ebiri omuri Yakobo 5:19, ni biha bizibu ebi turi kubugana twamara kumanya amazima?
2 Konka na mbwanyima y’okwikiriza ku Yehova ari kukoresa ekitongore ceye omu kutuha obuhabuzi, nituba tushemerire n’okubukuratiza. (Shoma omuri Yakobo 5:19.) Sitane naba ari kwenda ngu tureke kwesiga Bibuli kandi tureke n’okwesiga obuhabuzi oburi kuruga aha kitongore ca Ruhanga.—Efe 4:14.
3. Ahabw’enki tushemerire kuhamira omu mazima? (Abefeso 6:13, 14)
3 Shoma omu Befeso 6:13, 14. Juba aha Omuregi nayija kukoresa amani geye ahabise amahanga gona kugira ngu gahiganise Yehova. (Kush 16:13, 14) Nambwenu nitubasa kwetega ku Sitane arije kukoresa amani geye ari kuhabisa n’abahereza ba Yehova. (Kush 12:9) Ni yo nshonga kiri ec’omugasho kutanisa amazima n’ebishuba kandi tukemanyiza korobera amazima. (Rom 6:17; 1 Pet 1:22) Tuzarokoka okubonabona kwingi ahabw’ago mazima!
4. Ni enki eki twaza kushwijuma omuri eki kicweka?
4 Omuri eki kicweka twaza kushwijuma emitwarize ibiri eyi turi kwetenga, kugira ngu tumanye amazima agari omu Kigambo ca Ruhanga n’okwikiriza obuhabuzi obu turi kuhebwa n’ekitongore ceye. Bwanyima nitwija kushwijuma ebintu bishatu ebi turi kubasa kutoreza ngu tugumizemu kugendera omuri ago mazima.
EMITWARIZE EYI TURI KWETENGA KUGIRA NGU TUMANYE AMAZIMA
5. Ni bata oku okutina Yehova biri kutukwasa kumanya amazima?
5 Okutina Yehova. Okutina Yehova nikimanyisa okumukunda munonga twerinda kukora ekintu cona ekiri kubasa kumushasha. Nituba twetegwire kumanya entanisa eri ahagati y’ekirungi n’ekibi, amazima n’ebishuba rero bituma twakora ebi Yehova ari kwenda. (Emi 2:3-6; Heb 5:14) Tituri kwikiriza ngu okutina abantu bikire rukundo eyi turi kukunda Yehova, ninga ngu tushemeze abantu kukira oku turi kushemeza Yehova.
6. Ni bata oku okutina abantu byatumire entasi ikumi z’Abisirayeli zagamba ebishuba?
6 Twaba turi kutina abantu kukira oku turi kutina Yehova nikibasa kutuma twaruga omu mazima. Tecereza aha ntasi 12 ezagire kutata ihanga eri Yehova yabire yaraganisize Abisirayeli. Ikumi omuri ezo ntasi zikatina Abanyakanani kukira oku zabire ziri kukunda Yehova. Zikagambira Abisirayeli bagenzi babo ngu: ‘Tituri kubasa kuzayo ngu turwane na bari bantu ahabw’okuba nibatukiza amani.’ (Kub 13:27-31) Turebire nk’abantu, Abanyakanani bakaba bine amani kukiza Abisirayeli, obwe rero aha rubaju rumwe ebi bagambire bikaba biri amazima. Konka Omwisirayeli owabire ari kubasa kugamba ku babire batari kubasa kusingura abangi babo akaba atari kutecereza ahari Yehova. Eki ezo ntasi ikumi zabire zishemerire kutaho omutima ni eki Yehova yabire ari kwenda ngu Abisirayeli bakore. Nambwenu bakaba bashemerire kutecereza aha byabire biherukire kubabaho. Ebyo bikaba biratume batecereza ku amani g’Abanyakanani gabire gari busha wagageranisa n’amani ga Yehova Rukirabona. Oyihireho ezo ntasi ezabuzire okwikiriza, Yoshuwa na Karebu bakaba bari kwenda kushemeza Yehova. Bakagambira bagenzi babo ngu: ‘Yehova ku arabe natusima aryarituhisamu arituhe.’—Kub 14:6-9.
7. Ni bata oku turi kubasa kukizaho kutina Yehova? (Nambwenu reba ekishushani.)
7 Kugira ngu tukizaho kutina Yehova tushemerire kufa aha biri kumushemeza omu nsharamu ezi turi kukora. (Zab 16:8) Waba noshoma enkuru z’omuri Bibuli guma oyebuze ngu: ‘Kuri ari inye owaba ari omuri ezi mbera ni eha nsharamu eyi naba ndakore?’ Ecokureberaho: Tera akashushani kuri wabire oriho obu ezo ntasi ikumi zabire ziri kutanga amakuru mabi. Mbehi okaba orayikirize ebi bari kugamba rero bituma watina abantu, ninga rukundo eyi ori kukunda Yehova n’ecetengo eki oyine c’okumushemeza ni byo ebyabire birije omu mwanya g’okubanza? Ihanga ryona rya Isirayeli rikaremwa kwikiriza amazima agu Yoshuwa na Karebu babagambire. Ebyo bikatuma baferwa omugisha g’okutaha omu Ihanga eryaraganisibwe.—Kub 14:10, 22, 23.
Ni baha abu wabire orije kwikiriza? (Reba paragurafu ya 7)
8. Ni guha mutwarize ogu tushemerire kutaho amani kugira ngu tugugire, kandi shi ahabw’enki?
8 Obucurezi. Yehova nashururira amazima geye abacurezi. (Mat 11:25) Nitwecureza twikiriza ngu atukwase kumanya ago mazima. (Byak 8:30, 31) Konka nambwe, tushemerire kwetonda kugira ngu tutayetungura. Okwetungura nibibasa kutuma twatecereza ku oku turi kureba ebintu ari byo ebihikire, rero turemwa kugendera aha misinge y’omu Byahndikirwe n’aha buhabuzi bw’ekitongore ca Yehova.
9. Ni bata oku tushemerire kukizaho kuba abacurezi?
9 Kugira ngu tukizeho kwecureza, tushemerire kwijuka ku obushoborozi bwitu buri obwa ahaasi twabugeranisa n’obwa Yehova. (Zab 8:3, 4) Nambwenu tushemerire kushaba Yehova kungira ngu atukwase kuba abacurezi kandi twikiriza kwegesibwa. Yehova nayija kutukwasa kureba emitecerereze yeye nk’ey’omuhendo, kandi ebi turi kwega omuri Bibuli n’ebi turi kwega omu kitongore ceye tubirebe nk’eby’omuhendo. Omu kweyegesa Bibuli kwawe ogume orebe oku Yehova ari kukunda abari kwecureza akanga abari kwetungura, abari kwanga obuhabuzi n’abari kwerata. Kandi guma okizeho kwecureza, namunonga wahebwa omugisha ogurakushabe kwebembera abandi.
OKU ORI KUBASA KUGUMIZAMU KUGENDERA OMU MAZIMA
10. Ni baha abu Yehova yakoresize omu kuha obuhabuzi n’okwebembera abahereza beye?
10 Gumizamu kwesiga obuhabuzi obu turi kuhebwa n’ekitongore kitu. Omuri Isirayeli ya kare, Yehova akaba nakoresa Musa na Yoshuwa kugira ngu ahe obuhabuzi abahereza beye. (Yos 1:16, 17) Abisirayeli bakaba nibatunga emigisha ku babire nibareba abo bashija nk’abemererire Yehova Ruhanga. Bwanyima y’ebinyigana byingi ekibina c’Abakristo kitandikireho, entumwa 12 nizo ezabire nizitanga obuhabuzi. (Byak 8:14, 15) Bwanyima ogo mutwe gukakizaho kweyongera hatebwamu n’abakuru b’omuri Yerusalemu. Ku babire niborobera obwo buhabuzi bw’abo bazehe abari kwesigwa, ‘ebibina bikaba nibigumibwa omu kwikiriza kandi bigumizamu kweyongera burizoba.’ (Byak 16:4, 5) N’omuri obu bwire Yehova natuha emigisha twakuratiza obuhabuzi obu turi kuhebwa n’ekitongore ceye. Konka shi Yehova nayehurira ata twayanga korobera abu yatorine? Kugira ngu tugarukemu eco kibuzo reka tubanze tushwijume ebyahikire aha Bisirayeli obu babire bari kuza omu Ihanga eryaraganisibwe.
11. Ni enki ecahikire aha Bisirayeli b’omu bwire bwa kare abayangire kwikiriza Musa owu Ruhanga yabire atireho ngu abebembere? (Nambwenu reba ekishushani.)
11 Izoba rimwe obu Abisirayeli babire bari omu rugendo bari kuza omu Ihanga eryaraganisibwe, hine abashija abayetombitire Musa n’omurimo ogu Yehova yabire yamuhire. Bakagamba ngu: ‘Abantu b’ihanga ryona [atari Musa wenka] ni abari kwera buri omwe omuri bo, kandi Yehova ari omuri bo.’ (Kub 16:1-3) Ni amazima omu misho ga Yehova ‘bona’ bakaba bari abari kwera, konka Yehova akaba yatorine Musa ngu ayebembere abahereza beye. (Kub 16:28) Abo bantu ababire bari kwetombitira Musa bakaba bari nk’abari kwetombitira Yehova. Tibaratire omutima aha bi Yehova yabire ari kwenda, ahobwe bakata omutima aha bi babire bari kweyendera ni okugamba kugira obugabe. Ruhanga akahika ari kucwecereza ababire bari kwegomeka n’abandi bantu bingi ababire bakwatanisize na bo. (Kub 16:30-35, 41, 49) Obwe rero n’omuri obu bwire nitubasa kwesiga tutari kubanganisa ku Yehova atari kwikiriza abari kugomera entebekanisa y’ekitongore ceye.
Ni baha abu wabire orije kushagika? (Reba paragurafu ya 11)
12. Ahabw’enki tushemerire kwesiga tutari kubanganisa ekitongore ca Yehova?
12 Nitubasa kukizaho kwesiga ekitongore ca Yehova. Haba hariho enyegesa eyi turi kwetenga kushoborocerwa y’omuri Bibuli ninga ekwatirine n’oku omurimo g’Obukama guri kukorwa, abari kwebembera nibahika bari kukora cona ekiri kubasika kugira ngu bakore eyo mpinduka. (Emi 4:18) Eco nibakikora ahabw’okuba nibaba bari kwenda kushemeza Yehova. Nambwenu nibakora cona eki bari kubasa ngu ensharamu ezi bari kukora zibe zegamire aha Kigambo ceye ni okugamba emisinge eyi abahereza ba Yehova bona bashemerire kugenderaho.
13. ‘Ecokureberaho c’ebigambo by’amazima’ ni enki kandi shi nibitukwasa bita kuhamira omu mazima?
13 ‘Gumizamu kukuratira ecokureberaho c’ebigambo by’amazima.’ (2 Tim 1:13) ‘Ecokureberaho c’ebigambo by’amazima’ nikimanyisa enyegesa z’Abakristo eziri omuri Bibuli. (Yoh 17:17) Enyegesa nk’ezo ni go musinge gw’ebi turi kwikiriza. Ekitongore ca Yehova nikitwegesa kuhamira ahari ezo nyegesa. Eco twakikora nitwija kutunga emigisha.
14. Ni bata oku Abakristo bamwe barekire ‘kukuratira ecokureberaho c’ebigambo by’amazima’?
14 Ni enki ekiri kubaho twareka ‘kukuratira ecokureberaho c’ebigambo by’amazima’? Reka tukwate ecokureberaho. Omu kinyigana c’okubanza bamwe omu Bakristo bakaba nibajanjaza ebishuba bari kugamba ku ekiro ca Yehova cahikire. Hakaba hariho ebaruha eyi babire bari kutecereza ku yahandikirwe na Pawulo eyabire eri kugamba ebyo bishuba. Ahabw’okutakwata obwire bw’okushwijuma ebihamya, bamwe omu Bakristo b’omuri Tesalonika bakikiriza ebyo bishuba kandi batandika n’okubigambira abandi. Kuri babire bari kwijuka ebintu ebi Pawulo yabire yabegesize obu yabire acari na bo, bakaba batarije kubihwabihwa n’ebyo bishuba. (2 Tes 2:1-5) Pawulo akaba yarabwire benetata na banyanyazi ku babire batashemerire kwikiriza buri kintu cona eki babire bari kuhurira. Kandi kugira ngu Pawulo abakwase omu biro by’omu misho, akahendera ebaruha yeye ya kabiri y’Abatesalonika n’ebigambo ebiri kugira ngu: ‘Nyowe Pawulo, nahandika endamusyo egi n’omukono gwange nyenka. Ni ko kamanyiso omu baruha yange yona; oko ni ko mpandika.’—2 Tes 3:17.
15. Ni bata oku turi kubasa kwerinda enkuru z’ebishuba eziri kurebeka nk’ezihikire? Gamba ecokureberaho. (Nambwenu reba ekishushani.)
15 Ni enki eki turi kubasa kwegera aha bigambo ebi Pawulo yahandikire Abatesalonika? Twaguma kuhurira ekintu ekiri kutana n’amazima agu twayegire omuri Bibuli, ninga tukahurira enkuru z’ebishuba, tushemerire kukoresa obushoborozi bwitu bw’okutecereza. Omu mahanga agabire gebembirwe n’Abasoviyeti, abangi bitu hine obu bahandikire ebaruha, rero bagambira benetata na banyanyazi ku eyo baruha yaruga ahari ofisi yitu nkuru. Eyo baruha ekaba nehiga benetata na banyanyazi kwetanisa n’ekitongore ca Yehova. Eyo baruha ekaba nerebeka nk’ey’amazima. Konka benetata na banyanyazi babesigwa tibarahabisibwe na yo. Bakabasa kwetegereza ku ebi eyo baruha yabire eri kugamba bitari kubugana n’ebi babire bayegesibwe. Omuri obu bwire, abangi b’amazima nibakoresa oburyo buhikirweho bwa karimagezi kugira ngu batuhabise ninga batume twayecwamu ebicweka. Omu mwanya g’‘okurahuka kuhahaza omutima’ nitubasa kwerinda turi kushwijuma yaba ebi twahurira ninga ebi twashoma biri kushushana n’amazima agu twayegire.—2 Tes 2:2; 1 Yoh 4:1.
Otaribihwabihwa n’amakuru g’ebishuba agari kurebeka nk’agahikire (Reba paragurafu ya 15) a
16. Tukuratize ebiri omu Baroma 16:17, 18, ni enki eki tushemerire kukora hagira owaruga omu mazima?
16 Guma oyekwatanise n’abantu b’abesigwa ahari Yehova. Ruhanga nayenda ngu tumuramize hamwe omu bumwe na benetata na banyanyazi. Nitwija kuguma twine obumwe twahamira omu mazima. Omuntu wena ori kutandika kwikiriza ebishuba naba ari kwetanisa n’ekibina kandi Ruhanga naturabura ngu ‘twetantare abantu nk’abo.’ Eco twaba tutakikozire nitubasa kutandika kwikiriza ebintu ebitahikire kandi kituma twaremwa kuba abesigwa ahari Yehova.—Shoma omu Baroma 16:17, 18.
17. Ni bata oku turi kugasirwa twamanya amazima kandi tukagahimaramu?
17 Twamanya amazima kandi tukagahamiramu, nikituma twahika hihi ya Yehova kandi tugira okwikiriza kugumire. (Efe 4:15, 16) Nikija kuturinda enyegesa z’ebishuba za Sitane kandi Yehova nayija kugumizamu kuturinda n’okutufaho omu bwire bw’okubonabona kwingi. Gumizamu kuhamira omu mazima ‘kandi Ruhanga w’obusinge aryaguma ni iwe.’—Fil 4:8, 9.
ECESHONGORO CA 122 Muhame, Mutatengyetsibwa!
a EKISHUSHANI C’AHARI PEJI YA 12: Ebintu ebyazanirwe ebiri kwereka ebyabireho omu myaka eyahwire obu benetata b’omu mahanga agabire gebembirwe na Abasoviyeti babwine ebaruha eyabire eri nk’eyaruga ahari ofisi nkuru konka erugire ah’abangi bitu. Omuri obu bwire abangi bitu nibakoresa intaneti omu kujanjaza amakuru agatahikire agari kugamba aha kitongore kitu.
