1-2. (a) Ni ahabw’enki kitari kututangaza twabugana ebigezo? (b) Ni enki eki twaza kushwijuma omuri eki kicweka?

 ITWE abahereza ba Yehova, twaba turi kuraba omu bigezo tikiri kututangaza. Nitumanya ku Bibuli eri kugamba ngu: ‘Tushemerire kutaha omu Bukama bwa Ruhanga, turabire omu busaasi bwingi.’ (Byak 14:22) Nambwenu nitumanya ku bimwe omu bizibu bitarije kuhwaho okuhisa obu turitaha omu nsi ensya ya Ruhanga, eyi ‘hataribaho kufa bundi, n’obu kwakuba okucura ninga okurira ninga obusaasi.’​—Kush 21:4.

² Yehova tari kuturinda ebigezo. Konka natukwasa kubyehanganira. Reba ebi entumwa Pawulo yagambire Abakristo b’omuri Roma. Akatandika ari kubagambira ebizibu ebi we n’abandi Bakristo babire bari kubugana. Bwanyima akahandika ati: “Omuri ebyo byona tusingwire nangwa n’okukiraho ahabw’ogo owatukunzire.” (Rom 8:35-37) Eco nikimanyisa ku Yehova ari kubasa kukukwasa kugira eki wahikaho nangwa n’obu wakuba ori kuraba omu bigezo. Reka turebe oku Yehova yakwasize Yosefu kusingura n’oku n’iwe ari kubasa kukukwasa.

3. Ni biha bintu ebitungurine ebyabire ahari Yosefu?

³ Yakobo akereka ku yabire nakunda munonga omwana weye owabire ari kwetwa Yosefu. (Kut 37:3, 4) Konka, eco kikatuma batabani ba Yakobo bakuru bamugirira ihari. Ku babwine oburyo, bakaguza Yosefu aha bashubuzi b’Abamidiyani. Abo bashubuzi bakamutwara hare omuri Egiputa ahu bamugurize aha mukuru w’abarinzi ba Farawo ori kwetwa Potifari. Mazima ebyahikire ahari Yosefu bikamutungura kandi bikatuma ogo mwana owabire ari kukundwa n’ishe yaba omugaragwa w’ahaasi munonga omuri Egiputa!—Kut 39:1.

4. Ni bata oku turi kubasa kubugana ekigezo kiri nk’eca Yosefu?

 ⁴ Bibuli negamba ku abantu “bona bari kuhikwaho obwire n’ebihikirizi.” (Mub 9:11, Holy Bible—Easy-to-Read Version) Obumwe nituhikwaho n’ebigezo ebi “abantu bona” bari kubugana. (1 Kor 10:13) Ninga shi nitubasa kubonabona ahabw’okuba turi abegi ba Yesu. Ecokureberaho: Abantu nibabasa kutushecerera, batuhakanise ninga shi batuhiganise, ahabw’okwikiriza kwitu. (2 Tim 3:12) Ekigezo eki wakubugana na co cona, Yehova nabasa kukukwasa kukisingura. Ni bata oku eco yakikorire Yosefu?

5. Ni enki eki Potifari yayerebire aha bi Yosefu yabire nahikaho? (Okutandika 39:2-6)

⁵ Shoma omu Kutandika 39:2-6. Potifari akareba ku Yosefu yabire ari omusigazi ori kubasa kandi ori kukora n’amani. Nambwenu akaba namanya enshonga. Potifari akerebera ku “Yehova yahire [Yosefu] omugisha omuri byona ebi [yabire] ari kukora.” b Ogo mushija w’omuri Egiputa akahika aho yagira Yosefu omureberezi w’eka yeye. Ni enki ecarugiremu? Potifari akatunga emigisha.

6. Ni bata oku Yosefu ari kubasa kuba yeyehurire ahabw’embera ezi yabire arimu?

⁶ Gezaho kutekateka oku Yosefu yabire ari kwehurira. Ni enki eki yabire nayetenga kukira ebindi? Mbehi akaba nayenda kweyereka Potifari kugira ngu amuhe ekihembo? Yosefu nabasa kuba yabire arikwenda ngu aruge omu bugaragwa rero agaruke abonane n’ishe. N’obu Yosefu yabire ayine emirimo mirungi omu ka ya Potifali, akaba acari omugaragwa w’ogo mupagani kandi akaba ashemerire kumworobera. Yehova taratumire Potifari yarekura Yosefu. Kandi embera za Yosefu zikaba ziri kukizaho kuba mbi.

7. Ni bata oku embera za Yosefu zabire nizikizaho kuba mbi? (Okutandika 39:14, 15)

⁷ Nk’oku biri kugambwa omu Kutandika ekicweka ca 39, omukazi wa Potifari akarigira Yosefu, kandi emirundi myingi yaguma ari kugezaho kumwekundisaho. Burijo, Yosefu akaba ari kumwangira. Bwanyima, ogo mukazi akagirira Yosefu ekiniga kandi yamubeherera ku yagerizeho kumushambanisa  kifuba. (Shoma omu Kutandika 39:14, 15.) Potifari ku yakihurire akata Yosefu omu kihome ahu yamazire emyaka myingi. (Kut 39:19, 20) Mbehi omuri eco kihome hakaba nihashusha ki? Ekigambo c’Oruheburayo eki Yosefu yakoresize ari kumanyisa ekihome kikaba nikishoborora “ekina c’amizi” ninga shi “ekina,” ecehinguririzibwe n’omwirima mwingi. (Kut 40:15) Nambwenu, Bibuli neyereka ku amaguru ga Yosefu bagakomesize enjegeri kandi n’ebikanu byeye babita omu byoma. (Zab 105:17, 18) Mazima, embera za Yosefu zikakizaho kuba mbi munonga. Akaruga aha kuba omugaragwa ori kwesigwa, yaba omusibe w’ahaasi munonga.

8. N’obu ebizibu byakukizaho kweyongera, ni enki eki turi kubasa kwesiga?

⁸ Mbehi warabugineho embera zigumire, zikizaho kuba mbi kandi ori kushaba? Eco nikabasa kuba cakuhikireho. Yehova tari kuturinda ebizibu byona by’omuri egi nsi eri kwebemberwa na Sitane. (1 Yoh 5:19) Konka nabwe, nobasa kwesiga eki: Yehova namanya ge ebi ori kurabamu kandi nakufaho. (Mat 10:29-31; 1 Pet 5:6, 7) Nambwenu akaturaganisa ati: “Tindikusigaho, kandi tindikuhemukaho na kace.” (Heb 13:5) Yehova nabasa kukukwasa kwehangana n’obu embera ezi wakuba orimu zakuba ziri kurebeka nk’ezitarirugaho. Reka turebe oku yakikorire Yosefu.

9. Ni enki ekiri kwereka ku Yehova yabire ari hamwe na Yosefu obu yabire ari omu kihome? (Okutandika 39:21-23)

⁹ Shoma omu Kutandika 39:21-23. N’obu Yosefu yabire ari kuraba omu mbera zigumire omu kihome, Yehova akamukwasa kusingura. Bata shi? Obwire ku bwahikire, omurinzi w’ekihome akesiga Yosefu kandi yamuha ekitinisa nk’oku Potifari yabire namwesiga. Bwanyima y’obwire, ogo murinzi w’ekihome akaha Yosefu omurimo g’okureberera abandi basibe. Bibuli negamba ku ‘omurinzi w’ekihome ataragarukire kureberera ekintu cona omu bi yamukwasize.’ Yosefu akaba yatunga omurimo g’okumuhuzya. Mazima ogo murimo gukamutungura! Mbwenu shi ni bata oku omurinzi yahire omurimo nk’ogo gugumire, omusibe owatibwe omu kihome ehabw’okushambanisa kifuba omukazi w’omukuru w’amahe? Hariho enshonga emwe kusha eri kubasa kukishoborora. Nk’oku omu Kutandika 39:23 hari kubigamba, “Yehova akaba ari hamwe na we, kandi ebi yabire nakora byona, Yehova akaba nabiha omugisha.”

10. Shoborora enshonga ezabire ziri kubasa kutuma Yosefu yahurira ku ebi yabire nakora byona bitari kugenda ge.

¹⁰ Shuba otecereze oku Yosefu yabire ari kwehurira. Mbehi ku yamazire kubehererwa kandi akatebwa omu kihome ,notecereza ngu akahurira yasingura ebintu byona? Ni enki eki Yosefu yabire ari kwetenga munonga? Mbehi akaba ari kwenda ngu omurinzi w’ekihome amusime? Hatariho okubanganisa, Yosefu akaba ari kwenda ngu arekurwe. Akashaba ondijo musibe owabire waza kukomororwa kugira ngu ayije kumushabira ahari Farawo ngu amwihe omu kihome. (Kut 40:14) Konka ogo musibe, tarahikire ari kubigambira Farawo. Eco kikatuma Yosefu yamara endijo myaka ibiri omu kihome. (Kut 40:23; 41:1, 14) Konka Yehova akatuma ebi Yosefu yabire nakora byona byagenda ge. Bata shi?

11. Ni buha bushoborozi bw’omutano obu Yehova yahire Yosefu, kandi shi ni bata oku catumire Yehova yahikiriza ekigendererwa ceye?

¹¹ Obu Yosefu yabire ari omu kihome, Yehova akatuma omugabe wa Egiputa yarota ebiroto bibiri bibi. Farawo akaba ari kwenda  kumanya eki biri kumanyisa. Ogo mugabe ku yamanyire ngu Yosefu nabasa kushoborora ebiroto, akamutumaho. Yehova akakwasa Yosefu yashoborora ebyo biroto, kandi Farawo akatangara ahabw’obuhabuzi obu yamuhire. Farawo ku yarebire ku Yehova yabire ari n’ogo musigazi, akahika nataho Yosefu ngu abe omwebembezi w’ebyokurya omu ihanga ryona rya Egiputa. (Kut 41:38, 41-44) Bwanyima, enjara y’amani ekatera omu ihanga rya Egiputa, konka nambwenu yatera omu ihanga rya Kanani, ahu ab’eka ya Yosefu babire batwire. Hati akaba ari omu mwanya murungi g’okuyamba ab’omu ka yeye kandi eco kikarinda orukuratane rw’omuryango gweye ogu Mesiya yabire arakomokemu.

12. Ni bata oku Yehova yatumire Yosefu yagira ebi yahikaho?

¹² Tecereza aha bintu ebitashangirwe byona ebyahikire ahari Yosefu. Mbwenu shi ni oha owatumire Potifari yayijuka Yosefu omugaragwa owabire ari ahaasi munonga? Ni oha owatumire omurinzi w’ekihome yagira Yosefu omukuru w’abasibe kandi yabire ari omuntu oyorobize? Ni oha owatumire Farawo yarota ebiroto ebyamwemerize omutika kandi akaha Yosefu obushoborozi bw’okubishoborora? Ni oha owatumire Farawo yataho Yosefu ngu abe omwebembezi w’ebyokurya omu ihanga rya Egiputa? (Kut 45:5) Nikirebeka ku Yehova ari we owatumire Yosefu yahika ahari ebyo byona. Bwanyima, kikija kurebeka ku Yehova ari we owatumire ebi benishe ba Yosefu bamukorire byarugamu omugisha kugira ngu ahikirize ekigendererwa ceye.

13. Mbehi Yehova natwihiraho buri kizibu cona eki turi kubugana? Shoborora.

¹³ Enkuru ya Yosefu netwegesa ki? Mbehi Yehova natwihiraho ebizibu byona ebi twabugana? Mbehi ebibi byona ebiri kutuhikaho, nagira eki yabikoraho kugira ngu birugemu ebirungi? Ingaha, Bibuli teri kushagika eco kitecerezo. (Mub 8:9; 9:11) Konka, eki turi kumanya ni eki: Twabugana ekigezo, Yehova naba ari kukimanya kandi natuhurira twamutakira. (Zab 34:15; 55:22; Isa. 59:1) Ekiri kukiraho, Yehova nabasa kutukwasa  kwehanganira embera mbi kandi tugira eki twahikaho. Bata shi?

14. Ni bata oku Yehova ari kutukwasa omu bwire obugumire?

¹⁴ Oburyo bumwe obu Yehova ari kutukwasamu, ni okutuhumuriza kandi akatuha n’amani omu bwire obuhikire. (2 Kor 1:3, 4) Eco ni co ecahikire ahari mwenetata w’omuri Takimenisitani ori kwetwa Eziz, owamazire emyaka ebiri omu kihome ahabw’okwikiriza kweye. Akagamba ati: “Ah’izoba eri nabire ndacwererwe orubanja, mwenetata akanyereka ecahandikirwe c’omuri Isaya 30:15, ahari kugamba ngu: ‘Omu kutuza n’omu kwesiga ni mwo amani ganyu gariruga.’ Oru runyiriri, rukankwasa kuguma nturize n’okwesiga Yehova omu bintu byona burijo. Kutecereza ahari orwo runyiriri, kikankwasa munonga omu bwire obu namazire omu kihome.” Mbehi n’iwe nobasa kutecereza aha bwire obu Yehova yakukwasize ari kukuhumuriza kandi akakuha amani omu bwire obu wabire ori kubyetenga munonga?

15-16. Ni enki eki ori kwegera aha byahikire ahari Tori?

¹⁵ Obwire bwingi ku turi kugarura amisho enyima ni bwo obu turi kwijuka oku Yehova yatukwasize kuraba omu mbeza ezigumire. Munyanyazi ori kwetwa Tori akacerebera. Mutabani weye ori kwetwa Mason, akamara emyaka mukaga arwire kansa kandi bwanyima akahika aho yafa. Nk’oku n’iwe ori kubasa kukihurira, Tori akagira obusaasi bwingi. Akagira ati: “Nyowe nk’omuzire, nintecereza ku hatariho ekindi kintu ecanshashire nk’eco.” Akongeraho ati: Ninyesiga ku abazire bona bari kukikiriza. Okureba omwana wawe ari kubonabona nikishasha munonga okukira oku iwe wakuba ori kubonabona.”

¹⁶ N’obu Tori yabire ari kuraba omu kigezo kigumire, akija kwerebera oku Yehova yamukwasize  kucehanganira. Akagamba ati: “Ku ndi kugarura amisho enyima, ninyerebera oku Yehova yagumizemu kutukunda obu omwana wange yabire arwire. Ecokureberaho: Obu Mason yabire arwire munonga atari kubasa n’okureba abayija kumutayayira, benetata bakaba nibavuga amashaha abiri kugira ngu bije kumureba ah’irwariro. Obwe rero omu kishenge k’irwariro hakaba nihatura harimu omuntu otegerize kutuhumuriza. Nabwenu, bakaba nibatuha ebi turi kwetenga by’omubiri. N’obu twarabire omu biro bigumire, tihine eki twabuzirwe.” Yehova akaha Tori ebi yabire ari kwetenga kugira ngu ayehangane kandi ni co eki yakorire na Mason.​—Reba akashanduku akari kugira ngu: “ Yehova akatuha byona ebi twabire turi kwetenga.”

17-18. Ni enki eki Yehova arije kutukwasa kureba omu bwire bw’ekigezo kandi akatukwasa? (Zaburi 40:5)

¹⁷ Shoma omuri Zaburi ya 40:5. Omuntu ori kutemba omushozi naba ayine entego y’okuhika ah’iguru yago. Konka, hine ahu ari kuhika ayemerera ayetegereza ahu yaruga. Omu buryo nk’obwo, burijo guma ogarure amisho enyima orebe oku Yehova yakukwasize kugira ebi wahikaho n’obu wabire ori omu bigezo bigumire. Aha muheru gw’izoba guma oyebuze ngu: ‘N’obu ekigezo eki nyine kicariho, ni bata oku Yehova yankwasa kucehanganira? Burizoba guma oyetegereze orene yaba hariho omugisha ogu Yehova yakuha, ogwakukwasa kugira eki wahikaho.

¹⁸ Nobasa kuba ori kushaba ngu ekigezo cawe kirugeho. Eco nikihurirwa kandi toyine enshobe. (Fil 4:6) Konka nambwenu, tushemerire kugumizamu kwetegereza emigisha eyi turi kutunga hati. Kandi ni amazima, Yehova akaturaganisa ku arije kugumizamu kutuha amani kandi akatukwasa kwehangana. Obwe rero otayebwa kugumizamu kusima Yehova ahabw’obwo buyambi obu ari kutuha. Ku orakikore basoya, noyija kwerebera ku Yehova ari kukukwasa kugira ebi wahikaho omu bwire bw’ebigezo nk’oku yakikozire ahari Yosefu.​—Kut 41:51, 52.