Ekiri kushasha, ku nahikize emyaka y’obunyeto, nkatandika kucweka entege. Abu twabire turi kwega hamwe bakaba bine obugabe bwingi, kandi nkatandika kureba ku naferirwe. Nkatandika kureba ebiragiro by’abazire bange n’emisinge y’Abakristo nkebigumire, kandi natandika kureba ebintu by’omwika nk’ebiri kurusya. N’obu nabire ntari kubanganisa yaba Ruhanga ariho, nkatandika kuhurira ntine obunywani burungi na we.

Konka, nkerinda kufukirira ndi kukorera Yehova kace aku nabire ndi kubasa. Ku nabire ninza kuburira, nkaba ntari kutebekanisa, obwe rero kikaba nikingumira kutandikisa ebiganiro. Eco kikatuma ntatunga abegi, nabura okushemererwa, kandi catuma ntakunda omurimo g’okuburira. Nkaba ninyebuza ngu: ‘Ni bata oku omuntu ari kubasa kugumizamu kukora omurimo g’okuburira ashemerirwe?’

Ku nahikize emyaka 17, nkahurira ndi kwenda kwetegeka. Obwe rero, nkakwata ebintu byange nafurukira omuri Ositareliya. Abazire bange ku barebire naruga omu ka,  kikabashasha munonga. Bakaba batinire, konka bakatekateka ku nabire ndagumizemu kukorera Yehova.

Ku nahikire omuri Ositareliya, nkakizaho kucweka entege. Nkatandika kosha enterane. Nkagira abanywani ababire bari kuza omu nterane, konka oshanga erindi izoba bari kuza kunywa, kandi baza n’omu kaziniro. Ku ndi kutekateka aha byampikireho, ninshanga nabire ndi omu mazima ndi n’omu nsi, konka tihine ahu nabire ndi kushemerererwa.

Bwanyima y’emyaka ibiri, nkabugana munyanyazi owatumire natandika kutekateka ahu amagara gange gabire gari kutora. Nkaba nimba hamwe n’abandi banyanyazi batano, rero twayeta omureberezi ori kutayayira ebibina n’omukazi weye Tamara, ngu tumarane esande. Omushija weye ku yabire naza kufa aha by’ekibina, Tamara akaba naguma n’itwe kandi ari kutushesa. Kikanshemeza munonga. Akaba nayeta omu mwanya gw’abandi kandi kuganira na we kikaba corobi. Kureba omuntu okuzire omu by’omwika ori kushesa kikantangaza.

Tamara akaba natura ashemerirwe. Oku yabire ari kukunda amazima n’omurimo g’okuburira bikankora aha mutima. Akaba nashemerererwa kuha Yehova ebirungi kukira ebindi, konka nyowe nkaba ntacashemerererwa omurimo g’okuburira. Emitwarize yeye mirungi n’okushemererwa bikahindura amagara gange. Ecokureberaho ceye kikatuma natekateka ahari aga mazima: Yehova nayenda ngu twena tumuhereze ‘tushemerirwe’ kandi ‘turi kweshongora.’—Zab 100:2.

Nkaba ninyenda okushemererwa nk’oku Tamara yabire ayine, konka nkaba nshemerire kukora empinduka z’amani. Kikantwara obwire, konka mporampora nkatandika kuhinduka. Nkatandika kutebekanisa mbere y’okuza kuburira, kandi obwire bumwe nkora obupayoniya bw’omuyambi. Eco kikankwasa kutagumizamu kugira obwoba bwingi kandi natandika  kweyesiga. Oku nabire ninkizaho kukoresa Bibuli omu murimo, ni ko nanye nabire ndi kugasirwa. Bwanyima y’obwire buce, nkatandika obupayoniya bw’omuyambi obutari kwemerera.

Nkatandika kugira abanywani b’emiringo yona abari kukunda amazima kandi bari kukunda omurimo g’okuburira. Ecokureberaho cabo kikatuma nashuba kutekateka aha bintu by’omugasho kandi nagira entebekanisa ndungi y’eby’omwika. Nkatandika kukunda omurimo g’okuburira, kandi bwanyima natandika obupayoniya bw’obwire bwona. Omu myaka yona eyi nabire namara, ni bwo obu nahurire nshemerirwe kandi nturize omu kibina.

Bwanyima y’omwaka gumwe, nkabugana omusigazi murungi ori kukunda Yehova n’omurimo g’okuburira, ori kwetwa Alex. Akaba ari omuhereza omu kibina kandi amazire emyaka mukaga ari omupayoniya. Nambwenu, akaba yakorire omurimo ahari kwetengwa obuyambi omuri Malawi. Akaba yakozire omurimo n’abamishonari abari kukunda Yehova kandi bakamuhiga kugumizamu kuta eby’Obukama omu mwanya g’okubanza.

Omu mwaka gwa 2003, Alex nanye tukagitwa, twagumizamu kuhereza hamwe omu murimo g’obwire bwona. Tukega ebintu byingi kandi Yehova akatuha emigisha myingi.

Omu mwaka gwa 2009, tukaba abamishonari twaza kukorera omuri Timor-Leste, akacweka kace k’omuri Indonejiya. Kikatutangaza, twashemererwa, konka na bwo twagiramu obwoba. Bwanyima y’amezi atano, tukahika omu tawuni nkuru ya Dili.

Ku twahikireyo embera zikahinduka. Tukaba tushemerire kwega omucwe musya, orurimi, ebyokurya, n’oburyo bw’okubaho. Omu murimo g’okuburira tukaba nitubugana abantu b’aboro, abatashomire kandi abari kutwarizibwa  kubi. Kandi tukaba nitubona abantu bingi abine enkojo z’aha mubiri n’ez’aha mutima ahabw’entaro. *

Omurimo gukaba nigushemeza munonga! Ecokureberaho: Izoba rimwe nkabugana omuhara w’emyaka 13 ori kwetwa Maria, owabire ayine ekiniga. * Hakaba hahwireho obwire buce nyina afire kandi ishe akaba atari kukira kuba omu ka. Maria akaba atine masiko gona, nk’oku abandi bana bingi b’orwingano rweye babire bari. Izoba rimwe akangambira oku yabire ari kwehurira kandi yarira. Konka nkaba ntari kuhurira ebi ari kungambira ahakuba nkaba ntari kumanya ge orurimi rwabo. Nkashaba Yehova ngu anyambe mbase kumugumya, rero namushomera ebyahandikirwe by’okumuhumuriza. Bwanyima y’emyaka mice, nkareba amazima gari kuhindura emitwarize ya Maria, n’amagara geye. Akabatizibwa kandi hati na we ayine abegi ba Bibuli. Hati Maria ayine eka mpango y’eby’omwika kandi nahurira akunzirwe.

Yehova akatuha emigisha ahabw’omurimo ogu twamukorire omuri Timor-Leste. N’obu abingi babatizibwe omu myaka ikumi ehwire, abingi omuri bo ni abapayoniya, abahereza b’ekibina, ninga abazehe. Abandi nibakora ahari ofisi y’obuhinduzi y’omu kacweka ka hare, omu kutebekanisa ebyokurya by’omwika omu ndimi zabo. Nikinshemeza munonga kuhurira bari kweshongora omu nterane, okubareba bashemerirwe, n’oku bari kukura omu by’omwika.

Omurimo gwitu g’omuri Timor-Leste nigutanira kimwe n’og’omuri Ositareliya, konka nigushemeza munonga. Hine obu twabire turi kugenda omu motoka eyabire erimu abantu bingi, erimu ebyenyanja n’emizigo ebyaruga omu katare. Hine obu twabire turi kwegeseza omuntu omu kaju kace karimu obutagasi bwingi kandi kine oburofa, n’enkoko zijagarire. N’obu twabire nitubugana ebyo bizibu byona, emirundi myingi nkaba nimpurira nshemerirwe!

Ku ndi kugarura amisho enyima, ninshemererwa ahabw’okuba abazire bange bakakora eki bari kubasa banyegesa ebya Yehova, kandi n’omu myaka y’obunyeto bakamba hihi. Nkerebera ku ebigambo by’omu Nfumu 22:6 biri amazima. Abazire bange nibashemererwa munonga ku bari kureba nyowe n’omushija wange turi kuhereza Yehova. Okwiha omu mwaka gwa 2016, tukakorera omurimo g’okutayayira ebibina omuri teritori eri kwebemberwa na ofisi ya Ositareliya.

Nobasa kutikiriza ku hine obwire obu nabire ntari kushemerererwa omurimo g’okuburira. Hati ninkunda omurimo! Nkerebera ku ekizibu eki twakubugana cona, twahereza Yehova n’omutima gwitu gona ari bwo turi kushemererwa. Mazima, omu myaka 18 eyi namara ndi kuhereza Yehova ndi n’omushija wange Alex, nkatungiramu okushemererwa kwingi. Hati nindeba ku ebi bigambo ebi Dawudi, omuhandiki wa Zaaburi, yagambire ahari Yehova biri amazima: ‘Bona abari kukuhungiraho bashemererwe, bagume batere akari, kandi n’abakunda izina ryawe bashemerererwe omuri iwe.’—Zab 5:11.