Ruhanga ow’amazima ni we yahangire ebintu byona. Tayine entandikiro kandi tayine obugarukiro. (Zaaburi 90:2) Ni we yahandikire obutumwa burungi buri omuri Bibuli. (1 Timoseo 1:11) Tushemerire kuramya Ruhanga wenka, ahabw’okuba ni we yatuhire amagara.​—Shoma omu Kushuuruurwa 4:11.

Tihine muntu wararebire Ruhanga aha kuba ni omwika. Nikimanyisa ngu nakirira kimwe ebyahangirwe byona by’omu nsi. (Yohaana 1:18; 4:24) Konka, nitubasa kumanya emitwarize yeye birabire aha bi yahangire. Nk’ecokureberaho, ebijuma n’ebimuri nibitwegesa ku Ruhanga ayine rukundo n’obwenge. Obuhango bw’iguru n’ensi nibitwereka ku Ruhanga ayine amani mingi.​—Shoma omu Barooma 1:20.

Nambwenu nitubasa kumanya emitwarize ya Ruhanga birabire aha kushoma Bibuli. Ecokureberaho, netugambira ebi Ruhanga ari kukunda n’ebi ari kwanga, oku ari kukora n’abantu n’oku ari kwehurira bakora ebirungi ninga shi ebibi.​—Shoma omuri Zaaburi 103:7-10.

Yesu akagira ngu: ‘Tata ori omu iguru, izina ryawe ryezibwe.’ (Matayo 6:9) N’obu Ruhanga ayine amazina mingi g’ekitinisa, konka izina ryeye bwite ni rimwe kusha. Nirigambwa omu buryo butari kushushana, omu ndimi nyingi. Omu Rukiga, ni “Yehova.”​—Shoma omuri Zaaburi 83:18.

Omuri Bibuli nyingi bakihamu izina rya Ruhanga, ahu ryabire riri batamu amazina g’ekitinisa nka Mukama ninga Ruhanga. Konka obu Bibuli yabire nehandikwa, izina rya Ruhanga rikaba ririmu emirundi nka 7,000. Obu Yesu yabire  acari omu nsi akamanyisa abantu Ruhanga ow’amazima kandi yabamanyisa izina ryeye.​—Shoma omuri Yohaana 17:26.

Mbwenu shi ku hariho okubonabona kwingi nikimanyisa ngu Yehova ni Ruhanga otari kutufaho? Hine abantu bari kugamba ku ari kutubonabonesa kugira ngu atugeze, konka eco ni ekishuba.​—Shoma omuri Yakobo 1:13.

Ruhanga akakunda abantu yabikiririza kweshariramu. Mbwenu shi kuhereza Ruhanga twekundire tikiri kutushemeza munonga? (Yoshua 24:15) Konka abantu bingi nibasharamu kukorera kubi abandi, rero obusasi bweyongera omu nsi. Yehova ku ari kubireba nibimushasha munonga.​—Shoma omu Kutandika 6:5, 6.

Yehova ni Ruhanga ori kutufaho. Nayenda ngu tushemererwe. Juba aha nayija kwihaho okubonabona n’abantu abari kutuma kwabaho. N’obu atakabyihireho, hariho enshonga eri kutuma yabireka bikagumaho akire kake. Omu Ishomo rya 8, turyamanya ejo nshonga.​—Shoma omuri 2 Petero 2:9; 3:7, 13.

Yehova natweta ngu tumuhike hihi turi kurabira omu kushaba. Natufaho buri omwe. (Zaaburi 65:2; 145:18) Naba ayetegwire kutusasira. Nareba ku turi kutamu amani ngu tumushemeze, n’obu hine obu turi kuremwa. Ni ahabw’eco, n’obu tutahikirire, nitubasa kugira obunywani burungi na Ruhanga.​—Shoma omuri Zaaburi 103:12-14; Yakobo 4:8.

Tushemerire kukunda Yehova kukiza ebindi byona aha kuba ni we yatuhangire. (Mako 12:30) Ku oragumizemu kwereka ku nokunda Ruhanga ori kwega ebyeye kandi ori kukora ebi ari kwenda, nayija kukukwasa kumuhika hihi.​—Shoma omuri 1 Timoseo 2:4; 1 Yohaana 5:3.