El contestacion del Biblia

 Maskin pa nuay menciona na Biblia maga especifico detalle acerca na este topico, nuay este prohibi con el usada de makeup, alajas y otro pa maga adorno na cuerpo. Pero, ta anima el Biblia que tene kita el “adorno que gendeh ta queda malo que amo el calmao y amable personalidad” en vez de pensa ya lang con el diaton ichura.—1 Pedro 3:3, 4, New World Translation.

Gendeh ta prohibi con el usada del maga adorno na cuerpo

•   Ya usa adorno el maga fiel mujer na Biblia. Si Rebeca, quien ya casa con Isaac, ya usa con el anillo de oro que ta pone na naris, con el maga pulseras de oro y otro pa maga de caro alajas que ya ricibi le como un regalo estaba con Abraham, quien ya queda de suyu suegro na uliji. (Genesis 24:22, 30, 53) Cuando ya iscuji con Ester para queda uno del maga quien posible queda reina na Imperio de Persia, ya dale con ele “maga cosas de pampa-bonita” y ya acepta le con ese. (Ester 2:7, 9, 12) Posible, incluido na maga cosas de pampa-bonita amo el usada de “maga producto que ta hace pasa na cuerpo” o “diferente clase de producto que ta hace pasa na cara.”—New International Version; Easy-to-Read Version.

•   Ya usa con el maga alajas como maga ilustracion na Biblia para refiri na maga cosas que positivo. Por ejemplo, ya compara na “aretes de oro” con el un persona quien ta dale buen consejo “con el un persona quien ta oi.” (Proverbio 25:12) Ya compara tambien el Dios con el de suyu tratamiento con el nacion de Israel na un marido quien ta dale pulseras, cadenita y aretes na de suyu mujer. Por causa na tratamiento de Jehova, ya queda “bien bonita” el nacion de Israel.—Ezequiel 16:11-13.

Maga gendeh justo idea acerca na makeup y alajas

 Gendeh justo idea: Ya pinta negro el mal reina, si Jesabel, con el de suyu ojos o ya usa le eye shadow. Ta dale se mira que gendeh bueno usa makeup.—2 Rey 9:30.

 Verdad: Un mal reina si Jesabel por causa na maga mal cosas que ta hace le, gendeh por causa na de suyu ichura.—2 Rey 9:7, 22, 36, 37.