Bia Bengaa be Yéhôva bia nye’e bia laan ajô ya mbunan a bôte ya miñyebe mise, ve bi ne teke bo éfula miñyebe, nalé a tinane na, bi ne teke bo bikôan a miñyebe mife. Bible a kate bia na, benya Bekristene ba saé a “nleme wua a ôsimesane via,” ba bo nalé amu be bili aval mbunane da. (Beéphésien 4:​16; 1 Becorinthien 1:​10; Bephilippien 2:2) Ba yem mfi ya mbamba mefulu ane nye’an, mvam, a e yeme jamé. Mbôka’a ya ñyebe wongan ô ne mbamba ñwô’ane bia wô’ô Kalate Zambe, amu mbunane wongan wo ye bo zezé nge bi teke tu’a wô’ô Kalate Zambe.​—Beromain 10:​2, 3.

 Kalate Zambe a jô na, e fulane avale bia kañe Zambe wongan a bôte ba kañe zambe wop aval afe, a ne v’ane wo futi betite be nji bi abime ngule da éboñeté jia si. (2 Becorinthien 6:​14-​17) Ajô te nde, Yésus a nji kañese na beyé’é bé be bo éfula miñyebe. (Matthieu 12:30; Jean 14:6) Avale ete fe, Metiñe Zambe a nga ve ayoñe Israël a zene ya be Moïse, me mbe me tyili’i bone b’Israël na, be kañe bezambe ya meyoñe me mbe me nyiñe’ fefele jap. (Nkôlan 34:11-​14) Mvus ya valé, b’Israëlite be nga wulu ba’aba’a a Yéhôva, be nga bene kañese bilat bi nga ye bo na, be yeñ a bôte ba kañe bezambe befe.​—Esdras 4:​1-3.

Ye bengaa be Yéhôva ba laan a bôte ya miñyebe mife?

 Ôwé. Mbu 2025, be nga laan Mejô me Zambe a bôt tañe mewolo me nkolo 1 174 370 319. Aval ane nlômane Paul, éyoñe bia kañete, bia ve ngule ya tu’a wô’ô ñyeman, asimesan, a mam ‘bôte bese’ ba buni. (1 Becorinthien 9:​19-​22) Éyoñe bia laan a be, bia ve ngule ya tôñe melebe ya Bible, mfa’a ya semé bôte bevok ‘nya nsemane.’​—1 Pierre 3:​15.