Di mboñ biliya i éba hiki mut gwéha, loñgeñem, di tinak ki bo lipém. Ndi kii di yé di mboñ i ngéda Mbôgi Yéhôva yada i nyoñ ha bé ngaba i likalô, to lo i makoda, a di nla kwélés nye, di kal nye le di ngwés nye, di hôla ki nye i tiimba bana maada malam ni Yéhôva.​—Lukas 15:4-7.

 Ndi, ngim mangéda, maboñok ma mut ma yé le ma boñ le ba héya nye i likoda. (1 Korintô 5:13) Jon, kiki di ngwés lôk kéé ngandak, ni wongut di yé di noode hôla mboñbéba le ba héya bañ nye i likoda. Ndi, to ibale ba nhéya nye i likoda, kiki Bibel i nkal bés le, di yan bañ nye, di kee ni bisu i ti nye lipém.​—Markô 12:31; 1 Pétrô 2:17.

Kii i yé i boñ le ba nhéya mut i likoda?

 Bibel i nkal loñge loñge le, ibale kristen i mboñ béba keñi ndi i tam bé yo, ba nlama héya nye i likoda. b (1 Korintô 5:11-13) Bibel i nsima bibéba bikeñi bi ibale mut a mboñ, ba nla héya nye i likoda. Kiki hihéga, bibéba kiki bo, ndéñg, lihiua, manola, bisañ ni wip.​—1 Korintô 6:9, 10; Galatia 5:19-21; 1 Timôtéô 1:9, 10.

 Ndi, to hala, i mut a mboñ béba ikeñi ba yé ba héya bé nye kunda yada i likoda. Mimañ c mi likoda mi yé mi noode hôla nye le a nhéñha. (Rôma 2:4) Ba mboñ biliya gwobisôna i nhôla nye ni ñemlima, ni loñgeñem ni gwéha. (Galatia 6:1) I ngéda mimañ mi mboñ hala, hala a nla tinde mboñbéba i héñha mahoñol mé ni i tam béba yé. (2 Timôtéô 2:24-26) Ndi, ibale a nai ni libak jé libe, a tjél héñha, to tam toi béba yé, ba nhéya nye i likoda. Ha ni nyen mimañ mi ga legel le a ta ha bé Mbôgi Yéhôva.

 Inyuki hala a yé nseñ i héya mut i likoda i ngéda a nai i boñ béba? Pog, maboñok mé ma ga hoo jôl li likoda mahindi, a yé ki le a tinde lôk kéé ipe i boñ kiki nye. (1 Korintô 5:6; 15:33; 1 Pétrô 1:16) Iba, kiki a gwé ha bé maada ni mut numpe, hala a nla hôla nye i tehe ikepam limbe likala a nke haa ni Yéhôva, kayéle hala a wéha nye nyuu, a tinde ki nye i hiel ñem.​—Lôk Héber 12:11.

Lelaa Mbôgi Yéhôva i ntehe i bet ba héya i likoda?

 Bibel i nkal bikristen le ba “kiha ha bañ” ni mut nu ba héya i likoda, ‘to i je lôñni i nya mut i.’ (1 Korintô 5:11) Jon, di nkiha ha bé ni nya mut i. Ndi, hala a nsômbôl bé kal le di nlama yan nye. Di nke ni bisu i ti nye lipém. To i ngéda a nlo i likoda, ibale di ngwés di nla yéga nye. d I mut nu ba héya i likoda, a nla yak bat mahôla ma mimañ.

 Kii i yé i bôña i ngéda ba nhéya mankéé nu munlôm i likoda, ndi nwaa ni bon ba ngi yii Mbôgi Yéhôva? Mam ma mbuu ma ga tagbe ha bé i lihaa jé kiki ma bé bôña, ndi hala a nkobla bé le a ta ha bé isañ mbai. Kiki a niñ i nlélém ndap, a nlama ke ni bisu i gwés lihaa jé.

 I mut ba héya i likoda, a nla bat mimañ le mi yuuga nye. Ni gwéha yosôna, mi ga ti nye maéba ma ma mpémél i Bibel, mi ti ki nye makénd le a tam béba yé, ni le a témb yak Yéhôva. (Sakaria 1:3) Ibale a ntjôô béba yé, a unda ki le a ntam toi yo, a ntémb a yila Mbôgi Yéhôva. Likoda li ga “nwéhél nye, li ti ki nye hogbe,” kiki bikristen bi Korintô bi bi boñ, i ngéda mboñbéba a bi tjôô béba yé.​—2 Korintô 2:6-8.

Kii i bet ba yé ba témb yak Yéhôva ba nôgda?

 Di emble i yom ngim Mbôgi Yéhôva i i bi pam i likoda, i mbus ba témb ki yak Yéhôva i nkal.

 “I ngéda me bi kit le me ntémb yak Yéhôva, me bé hoñol le mimañ mi ga bat me i mam me bi boñ mu i nwii mi nwominsôna. Ndi, ni minyaô ba bi kal ndik me le: ‘ Nano di ngwés le u béñge i mam ma yé we i bisu he i mam ma bi tagbe bé.’ I mbus, me bi nôgda hogbe.”​—Maria, i Amérika.

 “I ngéda ba bi legel i likoda le me ntémb me yila Mbôgi Yéhôva, lôk kéé i bi kon maséé ngandak. Me bi nôgda le me ngi yii nseñ. Bilôk bikéé bi bi hôla me i nok le Yéhôva a nwéhél me, ni le me béñge ha bañ ni mbus. Mimañ mi bé ha hiki ngéda inyu hôla me le, me témb me léba mbôô wem i pes mbuu. Ba bi hôgbaha me, ba hôla ki me i nok le, me ngi yii nseñ i mis ma Yéhôva, ni le a ngi gwéhék ki me.”​—Malcom, i Sierra Leone.

 “Me yé maséé i yi le Yéhôva a ngwés litén jé, inyu hala nyen a ngwés le ntôñ wé u ba mapubi. Ngim mangéda inyu bôt bape, ba nla hoñol le di nlôôha ba ndéñ ndéñ, ki le i maliga ngim maboñok i yé yimbne i gwéha. Me nti Tata wem Nungingii mayéga, nu a yé Djob li gwéha, a bak ki bebee i nwéhél.”​—Sandi, i Amérika.