Ida Yehuwa * nyumunin perkawinan ané kapertama. Cakepan Suci ngorahang Ida ngaé anak luh kapertama lan ”raris bakta Ida ka ajeng manusane”. Adam marasa liang lan ngorahang kéné: ”Nah ento tulang ane uli tulang idewek, muah isi ane uli isin ideweke.” (Purwakaning Dadi 2:22, 23) Kanti jani, Yehuwa kayun apang anaké ané ngantén marasa bagia.

Dugas ragané ngantén, minab ragané ngelah bayangan makejang lakar luung. Nanging nyatané, yapinja suami istri seken-seken saling sayangin enu masih lakar nepukin pakéweh. (1 Korintus 7:28) Di bukuné ené, ada prinsip-prinsip Cakepan Suci, yén ento jalanang, bisa ngranaang perkawinan lan kluargan ragané bagia.—⁠Kidung 19:8-11.

APA AJAHAN CAKEPAN SUCI: Suami ané dadi pamimpin kluarga.—⁠Epesus 5:23.

Yén ragané dadi suami, Yehuwa kayun apang ragané tusing kasar ajak kurenan. (1 Petrus 3:⁠7) Ida netepang kurenan apang dadi pendamping buat ragané lan Ida kayun apang ragané ngormatin lan nyayangin kurenan. (Purwakaning Dadi 2:18) Ragané patut seken-seken nyayangin kurenan kanti ragané nyadia ngutamaang kepentingan kurenan katimbang kepentingan ragané padidi.—⁠Epesus 5:25-29.

Yén ragané dadi istri, Yehuwa kayun apang ragané ngajinin suamin ragané lan nulungin ia nyalanang peran dadi suami. (1 Korintus 11:3; Epesus 5:33) Dukungja keputusan kurenané lan tuutin ia satulus ati. (Kolose 3:18) Yén ragané malaksana buka keto, ené ngranaang ragané jegeg tingalina tekén kurenan ragané lan Yehuwa.—⁠1 Petrus 3:1-6.

ANÉ BISA KAJALANANG:

• Matakonja tekén kurenan kéngkén carané apang ragané bisa dadi suami utawi istri ané lebih luung. Dingehangja lan utsahaang apang seken-seken ngaé perobahan

• Sabarja. Perlu waktu ajak dadua malajah carané apang pada-pada ngaénang bagia

APA AJAHAN CAKEPAN SUCI: Ragané patutné rungu ajak kepentingan kurenan. (Pilipi 2: 3, 4) Matimbang rasaja tekén kurenan krana ia maji pisan buat ragané, ingetang yén Yehuwa kayun apang umatné malaksana ”darma marep teken anake makejang.” (2 Timotius 2:24) ”Raose ane tuara kapinehin nyidayang natunin, patuh buka pedange, nanging raos ane wicaksana baan ngucapang, ento nyidayang nyegerang.” Dadiné, kenehang malu satondén ngomong. (Pitutur 12:18) Roh Yehuwa lakar ngewantu ragané buat ngomong ané melah lan nyenengang ati.—⁠Galatia 5:22, 23; Kolose 4:⁠6.

ANÉ BISA KAJALANANG:

• Ngastawaja malu nunas tulung apanga bisa tetep tenang lan tusing mengkeban dugas mapitungan ajak kurenan unduk masalah ané serius

• Luungang malu ngenehang apa ané lakar kaorahang lan carané ngomongang

APA AJAHAN CAKEPAN SUCI: Dugas ngantén, ragané dadi ”mawak tunggal” ajak kurenan ragané. (Matius 19:⁠5) Kéwala, ragané ajak dadua minab enu ngelah pendapat ané malénan. Dadiné ragané perlu malajah apang adung lan ngelah keneh ané patuh. (Pilipi 2:⁠2) Pada adung penting sajaan sabilang ngaé keputusan. Cakepan Suci ngajahang: ”Alihja pituture ane melah, pedas cening lakar sida karya.” (Pitutur 20:18) Anggon prinsip Cakepan Suciné dadi panuntun dugas ngaé keputusan penting bareng-bareng.—⁠Pitutur 8:32, 33.

ANÉ BISA KAJALANANG:

• Pesuangja apa dogén ané ada di kenehé, tusing tuah ngorahin utawi ngemaang pendapat

• Satondén ngaé keputusan, mapitunganja malu ajak kurenan