Waljaniw ukham jisktʼasipjje. Isaías profetajja, Diosan Arupajj ‘wiñayatakiw jakani’ sasaw säna (Isaías 40:8). ¿Diosan promesanakapajj janipuniw akchʼas mayjtʼayasiwaykiti sasajj kunatsa sissna?

Diosajja, Arup janipun khitis mayjtʼayapjjañapatakejj chʼamaniwa. Nayrajj sagrado qellqatanakajj amparamp copiaskäna ukhajja, jan yaptʼañatakisa, jan cambiañatakisa, jan apaqañatakisa, Diosan Arup copierinakajj wali amuyumpiw letranak mayat may jaktʼapjjerïna. Ukhamäkchïnsa jaqenakajj pantjasirïpjjtanwa, ukatwa yaqhep copierinakajj mä jukʼanak pantjasipjjäna.

Sagrado Qellqatanakat amparampi copiaqat walja nayra qellqatanakaw utji. Uka copianakat mayajj mayjäspa ukhajja, jankʼakiw pantjatati janicha uk yatiñatakejj mayni copianakamp igualtʼayasispa (uka toqet jukʼamp yatiñatakejja, Internetan jw.org cheqar mantasaw “¿Se ha cambiado o manipulado la Biblia?” siski uka yatichäwi liytʼasma).

Rollos del mar Muerto sasin uñtʼatäki uka nayra documentonakat amuytʼañäni, uka rollonakjja, beduinos (wasaran viajiri arabenaka) jaqenakaw 1947 maran qollo pʼiyanakan jikjjatapjjäna, Mar Muerto sat cheqa jakʼana. Uka nayra qellqatanakajja, Sagrado Qellqatanakaniwa, pä waranqa maranak nayraw qellqasïna. Uka toqet yatjjatatanakajja, uka rollonakampiw jichha tiempon utjkistu uka Sagrado Qellqatanak igualtʼayapjjäna. ¿Kunsa jikjjatapjjäna?

‘Jichha tiempon utjkistu uka Diosan Arupajj nayra qellqatanakarjam luratawa’ sasaw uka yatjjatatanakajj sapjjäna. * Amparamp qellqaskäna uka nayra qellqatanakat sum yatjjatasajja, jichhürun utjkistu uka Sagrado Qellqatanakajj Diosan cheqpach arunakapätapwa amuysna. Cheqas Diosaw Arup jan mayjtʼayasiñapatakejj encargasiwayi, ukhamat jichhürkam utjañapataki.

Ukhamajja kuntï Diosan Arupan liyktan ukajj confiykañawa, janiw pächasiñasäkiti. Ukanakat yatjjatasajja, profetanakajj kunsa Diosat yatichistu uk uñjapjjañäni.