DIOSAR JAKʼACHASIPJJAM
“¡Diosajj [...] jakirinakan Diosapawa!”
¿Diosajj jiwañjjar chʼamaniti? ¡Jïsa chʼamaniwa! Janiw jiwañas ni kuna ‘uñisiris’ ‘Taqe chʼamani Diosat’ sipan jukʼamp chʼamanïkaspati (1 Corintios 15:26; Éxodo 6:3). Diosajj jiwatanakar jaktayasaw jiwañarojj atipji ukat paraíso oraqenjja, jiwatanakarojj jaktayäwa sasaw arsuwayaraki. * ¿Uka arsutaparojj confiysnati? Kuntï Diosan Yoqap Jesús pachpajj siski ukaw mä suytʼäw churistu. (Mateo 22:31, 32 liytʼäta.)
Saduceonakajj janiw jaktañajj utjkiti sasaw sapjjerïna ukatwa Jesusajj jupanakar akham säna: “Jiwatanakan jaktañapatsti, ¿janit jumanakajj leetʼapkta kunjämtï Diosajj siski ukjja? Akhampï sänjja: ‘Nayajj Abrahaman, Isaacan, Jacobumpin Diosapätwa’ sasa. ¡Diosajj janiw jiwatanakan Diosapäkiti, jan ukasti jakirinakan Diosapawa!” sasa. Uka qellqatajja, 1514 nayra pacha maranakan Moisesajj zarza sat chʼaphi alinak taypin Diosamp parlkäna uka toqetwa Jesusajj parlaskäna (Éxodo 3:1-6). Ukat “Nayajj Abrahaman, Isaacan, Jacobumpin Diosapätwa” sasin Diosajj siskäna ukajja, jaktañajj cheqapuniw utjani sasin atinisiñatakiw yanaptʼistu. ¿Kunatsa ukham sistanjja?
Jehová Diosajj Moisesamp parlkäna ukhajja, Abraham, Isaac ukat Jacob jupanakajja, walja maranakaw jiwatäjjapjjäna, Abrahamajj 329 maranak nayraw jiwatäjjäna, Isaacajj 224, ukat Jacobojj 197 maranak nayrarakiw jiwatäjjäna. Ukampis Jehová Diosajj janiw “Nayajj Diosapäyätwa” sasajj siskänti antisas uka nayra loqtirinakapajj jakasipkaspas ukhamwa “Nayajj Diosapätwa” sasajj säna. ¿Kunatsa?
“¡[Jehová] Diosajj janiw jiwatanakan Diosapäkiti, jan ukasti jakirinakan Diosapawa!” sasaw Jesusajj qhanañchäna. Uka arunakajj kamsañs muni uk amuytʼañäni. Jaktañatï jan utjkaspajja, Abraham, Isaac ukat Jacob jupanakajja, wiñayaw jiwatakïsipkaspa ukat Jehová Diosajj jiwatanakan Diosapäkaspas ukhamäspawa. Ukampejja, Jupat jan jitheqtas loqtirinakapar jiwañat qhespiyañatakejj janis chʼamanïkaspa ukat jiwañas Jupat sipan jukʼamp chʼamanïkaspa ukhamarakïspawa.
Ukhamajja, Abraham, Isaac, Jacob ukat Diosat jan jitheqtas loqtawayapki uka jiwatanakat ¿kamsaraksnasa? Jesusajj aka arunakampiw uka toqet qhanañchäna: “Jupatakisti taqeniw jakasipki” sasa (Lucas 20:38). Jehová Diosajj jiwatanakar jaktayäwa sasin arsuwayki ukjja phoqhapuniniwa, ukatwa Jupat jan jitheqtas loqtirinakapatjja, janis jiwatäpkäspa ukham amuyi (Romanos 4:16, 17). Jupajja, jan tukuskir amuyuparuw imaski jaktayañ uru puriniñapkama, mä arunjja, janiw jupanakat armaskiti jaktayaniwa.
Jehová Diosajj jiwañat sipanjja, wali chʼamaniwa
¿Jiwatäjjapjje uka familiaman jan ukajj munat masinakaman jaktanipjjañap suyaraktati? Jehová Diosajj jiwañat sipanjja, wali chʼamaniwa uk janipun armañäniti. Ukat jiwatanakar jaktayäwa siski ukjja, janiw kunas jarkʼkaniti phoqhapuniniwa. ¿Kuntï Diosajj arsuwayki uka toqet jukʼamp yatjjatañ munasmati? Yatjjatäta ukhajja, Jukʼampiw ‘jakirinakan Diosaparojj’ mä arunjja, Jehová Diosarojj jakʼachasïta.
Aka phajjsin Bibliat liytʼañataki:
Mateo 22-28 jaljat Marcos 1-8 jaljakama
^ Jiwatanakatakejj kuna suytʼäwis utji uk jukʼamp yatjjatañatakejja, ¿Kunsa Bibliax chiqpachapuni yatichi? sat libron 7 jaljap uñjjattʼäta, ukajj Jehová Diosan Qhanañchirinakapan luratawa.
