UKA pä mara nayrakiw Evelyn Trabert kullakampejj Galaad Escuelar sarapjjayäta (clase 4). Ukatwa Santa Ana markar khitapjjetäna. Niya 29 maranakajj kunjamsa misionerjam Diosar serviwayta uka toqet janïr qhanañchtʼkasajja, kunatsa ukham serviñ amtawayta uk parltʼapjjäma.

1923 maranwa Spokane (Washington, Estados Unidos) sat markan naciwayta. Awk taykajajj luterano sat religionankapkchïnsa, janiw infiernor creyipkänti. ‘Kamisarak mä munasir Diosasti infiernon tʼaqhesiyaspasti’ sapjjerïnwa (1 Juan 4:8). Mä panadería utanwa tatajajj trabajïna. Mä arumajja, irnaqer masipaw Diosajj janiw jaqenakar infiernon tʼaqhesiykiti sasin satayna. Qhepatjja, awk taykajajj Jehová Diosan Qhanañchirinakapampiw Bibliat yatjjatañ qalltapjjäna. Ukanwa kunsa Bibliajj cheqpachapuni jiwatanakat yatichi uk yateqapjjäna.

Llätunka maranikïskayätwa, ukampis kunja kusisitas Bibliat yatjjatasajj awk taykajajj jikjjatasipjjäna uk sum amtasta. Jehová Diosan sutip yatisinsa ukat Diosajj jan mä Trinidadätap yatisinsa, jukʼamp kusisipjjäna. Nayajj cheqa yatichäwinakjja, mä esponjar uñtataw chʼamthapiyätjja,  kunjamtï Juan 8:32 qellqatajj siskejja, uka yatichäwinakajj kʼari yatichäwit qhespiñatakiw yanaptʼistu. Wal Bibliat yatjjatañ muniriyäta, janipuniw qarirïkti. Wali ajjsarirïkchiyätsa, awk taykajamp chikaw yatiyir saririyäta. Jupanakajj 1934 maranwa bautisasipjjäna, nayasti 16 maraniw 1939 maran bautisasirakta.

1940 julio phajjsinjja, awk taykajajj ut aljapjjäna, ukat Coeur dʼAlene (Idaho) markaruw jakir sarjjapjjayäta, ukanwa precursorjam serviñ qalltapjjayäta. Alquilat mä altus utanwa jakasipjjayäta, manqhansti autonak askichir mä talleraw utjäna. Uka altusanwa tantachäwejj apasirïna. Uka tiemponjja, janiw tantachasiñ utanakajj waljajj utjkänti, ukhamajj waljaniw yaqha utanakana, alquilat utanakana tantachasipjjerïna.

1941 maranjja, San Luis (Misuri) markan apaskän uka jachʼa tantachäwiruw sarapjjta. Domingojj “Wawanakan urupa” satänwa, ukhamajj 5 maranit 18 marankamaw nayraqatan qontʼasipjjayäta. Discurso niya tukuyarojja, Joseph Rutherford jilatajja, nanakar uñtanisajj sänwa: “Wawanaka, niyakejjay jumanakajj Diosaru ukat Reyiru istʼaña amtapjjstajja, amp sum saytʼasipjjam” sasa. Ukham satajj taqeniw saytʼasipjjayäta. Ukjjarusti sapjjetänwa: “Uñtapjjam, Diosan Reinopat 15.000 jila machaq qhanañchirinakampiw akankasipki” sasa. Ukhatwa precursoräñ janipun jaytañ amtawayta.

Qhepatjja, Oxnard (Californiat aynach toqe) markaruw sarapjjarakta. Ukarojj mä tama uttʼayañ amtampiw sarapjjta. Ukansti llantanakan mä “utanwa” jakasipjjayäta, mä catrekiw ukan utjäna, nayrajj mä ikiñ utanïyätwa, ukampis jichhajj mä mesaruw ikiñ wakicharapipjjetäna.

1941 diciembre phajjsin 7 urojja, Japón markaw Pearl Harbor (Hawái) markar bombamp nuwantäna. Ukatwa qhepürojj Estados Unidos markajj Payïr Jachʼa Chʼajjwäwir mantäna. Uk yatisaw Californiar sarjjapjjayäta. Niyakejjay Japón markan uma manqjjnam sariri barconakapajj uka markar wal muyuntapjjchïnjja, autoridadanakajj ‘arumanakajj luzanak jiwtʼayapjjätawa’ sasaw sapjjetäna. Ukhamajj wali chʼamakäjjepanjja, janiw kuna armampis oraqenkirinakarojj waktʼayanipkaspänti.

1942 septiembre phajjsinjja, Asamblea Teocrática del Nuevo Mundo sat jachʼa tantachäwiruw sarapjjayäta, ukajj Cleveland (Ohio) markanwa apasïna. Ukanjja, Nathan Knorr jilataw “Sumankañajja... ¿wiñayäpachäniti?” sat discurso arstʼäna. Uka jisktʼarojja, Apocalipsis 17 qellqatampiw qhanañchtʼäna. Mä cheqanjja siwa: “Ajjsarkañ animal uñjktas ukajj nayrapachajj jakkäna ukawa, jichhasti ukajj janiw jakkjjeti. Ukampis aka oraq manqhatwa mistunini” sasa (Apo. 17:8, 11). Uka ajjsarkañ animalajj Sociedad de Naciones satäki ukawa sasaw Knorr jilatajj säna, ukampis ukajj 1939 maranwa chhaqtjje sarakïnwa. Bibliarjamajja, Sociedad de Naciones sat lantejj yaqhaw uñstanini ukaw mä jukʼa sumankañ utjayarakini sasaw jilatajj säna. Ukajj ukhamapuniw phoqasïna. 1945 maran Payïr Jachʼa Chʼajjwäwejj tukusjjän ukhaw ‘uka ajjsarkañ animalajj’ wasitampi uñstanïna, Naciones Unidas sat sutimpi. Ukhat aksaruw Jehová Diosan Qhanañchirinakapajj walja markanakan jukʼamp yatiyasipki. Walipuniw Diosan markapajj jiltawayi.

Uka profeciajja, Diosan markapan walja lurañ utjatap amuyañatakiw yanaptʼawayitu. Kunapachatï Galaad Escuelaw jutïr maran utjani sasin  yatiyaskäna ukhajja, misionerjam serviñwa amtayäta. 1943 maranjja, precursorjam serviñatakiw Portland (Oregón) sat markaru khitapjjetäna. Ukanjja, gramófono sat tocadiscompiw utat uta yatiyapjjeriyäta. Mä arstʼäwi istʼayasajja, Diosan Reinopat parlki uka qellqatanak jaytañatakiw parltʼapjjerïta. Uka marpachajj misionerjam serviñat walpun lupʼirïta.

1944 maranjja, Evelynampi nayampiruw Galaad Escuelar invitapjjetäna, ¡ukajj wali kusiskañapunïnwa! Escuelan yatichir jilatanakajja, Bibliat yatjjatañajj wali sumätapwa yatichapjjetäna. Ukhamarusa, wali altʼat chuymanïpjjänwa. Awisajja, uka jilatanakaw manqʼañ horasajj meseronakjama manqʼa churapjjeritäna. Phesqa phajjsinak qhepat 1945 maranjja, misionerjam serviñatakiw enero 22 uruna khitapjjetäna.

1946 junio phajjsinwa Leo Mahan ukat Esther esposapampi ukhamaraki Evelynampi nayampejj El Salvador markar puripjjta. Ukanjja, ‘yapu apthapiñajj’ wali utjatap uñjapjjta (Juan 4:35). Mä qawqha phajjsitjja, Santa Ana markanwa pä uru jachʼa tantachäwi nayrïr kutin apapjjta. Ukar jutapjjañapatakejj waljaniruw invitapjjayäta. Niya 500 jaqenakan jutapjjatap uñjañajj wali kusiskañänwa. Ukatwa tatakuranakajj wal colerasipjjäna. Kunjamtï qalltan parltʼaniwayapksma ukhama. Ukampis janiw ukajj sustjapkitänti, jan ukasti jukʼamp Bibliat yatichañwa amtapjjayäta. Tatakuranakajj jaqenakan Biblia liyipjjañap janiw munapkänti, ukatwa jarkʼapjjäna. Mä qawqhanikiw Biblsa alasipjjarakïna. Ukhamäkchïnsa, waljaniw Bibliat yateqañ munapjjäna. ‘Jehová Diosata ukat Diosan aka Oraqetaki amtanakapat yatichañatakejja, walik español aru yateqasipktajja’ sasaw sapjjetäna.

Rosa Ascencio sat mä warmimpiw Bibliat nayraqat ukan yatjjatayäta, jupajj mä chachampiw jakäna, ukampis Bibliat yateqañ qalltjjäna ukhajja, jan casaratätap laykojj jaljtjjänwa. Mä qawqha tiempotjja, uka chachajj Bibliat yateqañwa qalltarakïna. Qhepatjja, Rosampiw casarasjjäna, panpachanirakiw bautisasjjapjjäna. Rosa kullakaw Santa Ana markan nayrïr precursorajja. *

Rosajj mä jiskʼa tiendanïnwa. Yatiyir sarañatakejj jistʼantawayirïnwa, Jehová Diosajj janiw kunsa faltaykitaniti sasaw confiyäna. Yatiyäwit kuttʼjjerïna ukhajja, waljaniw alasir jutapjjerïna, ukanwa Mateo 6:33 qellqatan phoqasitap qhan Rosajj amuyäna. Jiwañkamarakiw taqe chuyma serviwayi.

Mä kutejja, sojjtaniru alquilapkitän uka jaqeruw mä tatakurajj akham satayna: “Janitï uka jaqenakar alisnukkätajja, jumasa esposamasa iglesiat jaqsutaw uñjasipjjäta” sasa. Alquilapkitäna uka jaqejja, wali uñtʼat empresarionwa, ukham sacerdoten satapatjja, wal colerasïna, janirakiw  istʼkänti. Tatakurarojj “iglesiamat jaqsupjjetasa janisa, walikïniwa” sasaw satayna. Ukatjja, janiw alisnukupkitänti, ‘qawqha tiempos akankasipkasmawa’ sasaw sapjjetäna

San Salvador markanjja, Baltasar Perla sat mä ingenieron warmipaw mä misionerampi Bibliat yatjjatäna. Uka ingenierojj wali suma chuymanïnwa, ukampis religión pʼeqtʼirinakan jan wali luratanakap uñjasaw Diosarojj jan iyawsjjänti. Janïras jilatasäkchïnjja, uka markan sucursulajj kunjamsa lurasispa ukatakiw inaki yanaptʼäna.

Jilat kullakanakampi trabajisajja, cheqa religionäpjjatapwa Baltasar chachajj amuyäna. Ukhamasti, 1995 julio phajjsin 22 urunwa bautisasjjäna, mä qawqha tiempotjja, Paulina esposapajj bautisasjjarakïnwa. Pä yoqapas taqe chuymaw Jehová Diosarojj servisipkaraki, Baltasar sat mä yoqapajja, 49 maranakaw Brooklyn Betelan serviski, aka oraqpachan yatiyasiñapatakiw ukan yanaptʼaskaraki. Jichhajj Estados Unidos markankir sucursal sarayañanwa yanaptʼaskaraki. *

San Salvador markan kimsa uru jachʼa tantachäwi lurañ qalltapkayäta ukhajja, Perla jilataw tantachasiñatakejj mä jachʼa ejercicio lurañ uta jikjjatañ yanaptʼapjjetäna. Qalltan jukʼanikiw tantachasipjjeriyäta, ukampis marat maratjamaw jukʼampi jiljjattawayi, uka jachʼa utat jilarjjapjjayätwa. Ukham jachʼa tantachäwinakanwa nayampi Bibliat yatjjatapkäna ukanakampi jikisipjjerïta. Jupanakat yaqhepajja, “allchhinakajaruw” uñtʼayapjjerïtu, mä arunjja, jupanakampi Bibliat yatjjatasin bautisasipkatayna ukanakaruw uñtʼayapjjerïtu, ¡ukajj walpun kusisiyirïtu!

Mä kutejja, mä jachʼa tantachäwinwa mä jilatajj ‘jumampiw parltʼañ munta’ sasin sitäna. ‘Kunarakïpacha’ sasaw nayajj sirïta, janiw uka jilatarojj uñtʼkayätti. Jupasti sitänwa: “Santa Ana markan qalamp jaqchʼukirinakat maynïrïtwa” sasa. ¡Diosar ukham serviñ amtatapajj wal kusisiyitäna! Uka jilatan arunakapaw Diosar sapür serviñajj kunja askisa uk uñachtʼayitäna.

El Salvador markan niya 29 maraw misionerjam serviwayta. Santa Ana, Sonsonate, Santa Tecla, San Salvador markanakana. Qhepatsti, Diosar wal mayisisinsti, Spokane markar kuttʼañwa 1975 maran amtawayta. Awk taykajajj taqe chuymaw Diosar servisipkäna, ukampis wali chuymanëjjapjjänwa, yanap munapjjäna.

1979 maranwa tatajajj jiwjjäna. Mamajarusti uñjaskakiyätwa, jupajj jukʼat jukʼatwa aynachtʼjjarakïna, kimsaqallqo maranak qhepatwa, 94 marani jiwjjäna. Ukhamïpansti, llakita ukat qʼala aynachtʼataw jañchi toqensa jikjjatasiyäta. Sinti llakisiñat herpes zórter usumpiw usuntjjayäta. Ukampis oracionampi, Jehová Diosan yanaptʼapampiw aguantawayta. Kuntï Jehová Diosajj Isaías 46:4 qellqatan siski uk phoqasir uñjawayta. Diosajj chuymanëjjta ukas sum uñjawayitu.

1990 maranjja, Omak (Washington) markaruw sarawayjjta. Ukanwa español parlirinakaru Diosan Reinopat yatiyjjarakiyäta. Ukhamatwa wasitamp yanaptʼjjayäta. Yaqheparojj bautisasiñkamaw yanaptʼawayta. Qhepatjja, janiw nä sapakejj Omak markankir utaj uñjirjamajjayätti, ukatwa 2007 noviembre phajjsin Chelan sat markar sarjjayäta. Naya sapakiw aka taman jilat kullakanakat jilïrïtjja, ukhamajj español parlir jilat kullakanakajj “awichaparjamaw” sum uñjapjjetu. Ukham yanapa katoqasajj walpun kusista.

Jehová Diosar jukʼampi serviñatakejja, janiw casarasiwaykti, ni wawaniwayktsa. Akapachanjja, janiw maynejj taqe kunpun jikjjatkaspati, ukatwa nayajj Jehová Diosar taqe chuyma serviñ amtawayta. Waljaniruw Jehová Diosar uñtʼañ yanaptʼawayta, jupanakaw wawajäpkaspas ukhamajja (1Cor. 7:34, 35). Paraisonwa kunanaktï jukʼamp lurañ munkta ukanak luräjja. Salmo 145:16 (NM) qellqataw wal gustitu, ukansti Jehová Diosajj ‘taqe jakirinakaruw kuntï munapki ukjja churani’ siwa.

Jichhajj 91 maranëjjtwa, precursorjamaw serviskarakta. Ukajj tawaqokïskiristsa ukham amuyasiñatakiw yanaptʼitu, wali kusisitaw jikjjatasirakta. El Salvador markar purkayäta ukhajja, Diosan Reinopat yatiyañajj ukhaw qalltaskäna. Supayan aynachtʼayañ munatpachas nayraruw sartawayi, jichhajj uka markanjja, Jehová Diosan 39.000 Qhanañchirinakapaw utj-jje. Ukaw Diosar jukʼampi confiyañataki chʼamañchtʼawayitu. ¡Jehová Diosajj markaparojj wal yanaptʼaski!