¿KUNANAKAS IMATÄSKI?

Diosan Arupar 100 maranakaw confiyasktanjja

ARUT ISTʼAÑATAKI

“Russell jilatar jakʼat uñkatañat sipansa, akan uñjañajj jukʼamp askiwa.” (1914 maran Foto-Drama uñtiri.)

PATAK maranakaw “Foto-Drama de la Creación” satäkis ukan uñstatapat jichhakamajj pasawayjje, ukajj videor uñtasitänwa. Ukat Bibliajj Diosan apayanit Arupawa sas confiyapjjañapatakiw lurasïna. Uka tiempon waljanirakiw Diosajj janiw utjkiti, monot jutatätanwa, janiw cheqäkiti sasin sirinakajj mayninakan iyawsäwip aynachtʼayapjjerïna, ukampis Jehová Diosaw taqe kun Lurirejja sasaw “Foto-Drama” satäkis ukajj uñachtʼayäna.

Bibliat Yatjjatirinak pʼeqtʼiri Charles T. Russell jilatajja, kunjamatsa Biblian cheqa yatichäwinakapajj wali suma ukat jankʼak yatiyasispa ukwa amuyirïna. Bibliat Yatjjatirinakajj 30 jila maranakaw Bibliat apstʼat qellqatanakamp yatiyapjjäna, ukampis jichhajj cine toqnamwa yatiyañ munapjjäna.

JACHʼA PANTALLNAMAW YATIYASJJÄNA

Khä 1890 maranakanwa nayrïr peliculanakajj uñstäna, ukan arojj janiw istʼasirïkänti. Ukat 1903 maranwa religión toqet parlir mä peliculajj Nueva York cheqan mä iglesian uñtayasïna. Kunapachatï Russell jilatajj 1912 maran “Foto-Drama” lurañ qalltkäna ukhajja, cinen ukhaw peliculanak lurañ amtasipkäna. Jupajj qellqatanakamp yatiyañat sipansa, pantallanak toqe Biblian cheqa yatichäwinakap yatiyañajj wali askïtapwa amuyäna.

Uka “Foto-Drama” uñtañatakejj kimsaqallqo horanakaw munasïna, ukatwa pusir jaljatäna. Ukansti Bibliat 96 arstʼäwinakanïnwa ukjja uka tiempon wali uñtʼat mä chachaw liytʼäna. Ukat istʼañatakejj taqenin uñtʼat musicanakanïnwa. Ukat wali yatjjattʼatanakaw Biblian utjki uka wali uñtʼat sarnaqäwinaka grabaqat arunakampi ukat musicanakampi color fotonak uñachtʼayapjjäna.

“Kunjamsa warawaranakajj qalltan lurasïna ukhat Cristojj Waranqa maranaka apnaqañ tukuykani ukhakamaw ukan uñachtʼayasïna.” (14 maran F. Stuart Barnes sat qʼajjo wayna, 1914.)

Filadelfia, Nueva York, Paris ukat Londres uka cheqanakanwa uka video jilpach filmapjjäna ukat ukanarakwa vidriot lurtʼat diapositivanaksa, peliculanaksa mayat maya pintapjjäna. Betel utan Estudio de Arte satäkis ukan irnaqtʼirinakaw uk pintapjjäna, ukat kawkïr diapositivanakatï pʼakjtkän ukanak askichapjjarakïna. Janiw uka wali yatjjattʼatanakan filmatanakapak alapkänti, jan ukasti Yonkers (Nueva York) cheqanwa Betel utan irnaqtʼir jilat kullakanakar filmapjjäna, jupanakat yaqhepajj kunjamtï Abraham, Isaac ukat kawknïr angelatï Abrahamar wawap jan loqtañapatak jarktʼkäna ukham lurapjjäna (Gén. 22:9-12).

Uñtapjjañapatakejj uka toqet yatjjattʼatanakaw uñachtʼayapjjäna, ukanjja kimsa kilometronakat jila peliculanaka, 26 grabaqat arunaka, ukat phesqa patak vidriot lurat diapositivanakaw utjarakïna

Kunatï luraskän uka toqet jisktʼapkäna ukanakarojj akham sasaw Russell jilatan mä yanapiripajj säna: “Kunanakatï religión toqet yatjjatapjjañapatak jichhakamajj lurasiwayki ukanakat sipansa, aka toqejj walja jaqenakaw Bibliat yatjjatañ munapjjani” sasa. ¿Kunjamakis tatakuranakajj jikjjatasipjjpachäna? ¿Ajay toqen aynachtʼatanakar yanaptʼañataki ukham lurasitapat kusisipjjpachänti? Janiwa, iglesia pʼeqtʼirinakajja jan walinakwa uka “Foto-Drama” apsusitapat parlapjjäna. Jupanakat yaqhepajj kunayman toqenakatwa jaqenakan jan uñtapjjañapatak lurapjjäna. Mä cheqanjja iglesia pʼeqtʼirinakajj jan luzan kunwa uñjasiyapjjäna.

Uka jakʼankir tamankirinakaw katoqapjjerïna ukat Escenario sat librjja, millón millonaw jan kun mayis lakirasïna, ukansti “Foto-Drama” satäkis uka fotonakaw uñstäna

Saririnakajj mä insignia katoqapjjäna, ukan Jesusaw uñstäna, “Pax” arus uñstarakïnwa. Ukajj “sumankayirin wawapäñapwa” amtayäna

Ukhamsa lurapkchïnjja, “Foto-Drama” uñtañatakejj teatronakarojj sarasipkakïnwa ukat ukhamak mantapjjäna. Estados Unidos markanjja, kunatï uñtayaskäna uka pachpajj 80 cheqanakanwa uka pachpa horasan uñtayasirakïna. Ukankirinakajj janipuniw ukham película uñtapjjerïkänti. Walja fotonak janïrjat suma wakichtʼasitapatjja, kunjamsa mä chhiwchejj kʼawnat mistuniñampïski ukat panqaras niya panqarañampïski ukanakaw uñjasïna. Ciencia toqe yanaptʼayasisajj qawqha yatiñanisa Jehová Diosajj ukwa ukampejj uñachtʼayäna. Kunjamtï qalltan saniwayktanjja, Russell jilatar pantallan uka “Foto-Drama” sarayir uñjasajja mä uñtirejj akham sänwa: “Russell jilatar jakʼat uñkatañat sipansa, akan uñjañajj jukʼamp askiwa” sasa.

BIBLIAT JAN ARMKAYA YATICHÄWINAKA

“Foto-Drama” ukajj enero 11, 1914 maranwa Nueva York markan aka teatron nayrïr kuti uñtasïna, ukhatakejj Oraqpachan Bibliat Yatjjatirinakankjjänwa, ukat jupanakaw uñjapjjäna

Cine toqet yatjjattʼat Tim Dirks chachajj “Foto-Drama” satäkis ukjjat akham sänwa: “Uka videojj grabat arunakampi, fotonakampi ukat coloranakampi lurtʼat diapositivanakanïnwa, ukhamajj janipuniw uñjasirïkiti”. “Foto-Drama” satäkis ukat nayra mistkäna uka peliculanakajj niya ukham lurtʼatarakïnwa, ukampis janiw mayar apthapitäkänti, yamas Biblia toqet parlir ukham videojj janipuniw uñjasirïkänti. Ukat nayrïr kuti uñachtʼayaskän uka maranjja, Norteamérica, Europa, Australia ukat Nueva Zelanda cheqanakanwa llätunka millón jaqenakajj uka video uñtapjjäna, janipuniw yaqha videonak ukham uñtapjjerïkänti.

Khä 1914 maran enero phajjsit 11 urunak saraqataruw Nueva York markan “Foto-Drama” ukajj nayrïr kuti uñtasïna. Ukat paqallqo phajjsirojj Nayrïri Jachʼa Chʼajjwäwiw qalltasïna. Ukhampachasa jaqenakajj oraqpachan uka “Foto-Drama” uñtirejj sarasipkakïnwa, ukanwa Diosan Reinopajj kuna askinaktï apankani ukanak uñtasajj chuymachtʼata jikjjatasipjjäna. “Foto-Drama” satäkis ukajj 1914 maratakejj wali amtkayapunïnwa.