Témwen Jéhova ka bazé sa yo ka kwè èk sa yo ka fè konsèné lètèman asou Bib-la, èk asou sé senk «5» pwen sala:

•   Lè an moun nou enmen mò, i nòmal pou nou an lapenn. Sé disip Jézi-a té pléwé an chay lè yo té ni moun yo enmen ki mò. (Jan 11:33-​35, 38; Twavay 8:2; 9:​39) Konsa, nou pa ka twété an lètèman konmsi sé an gwo fèt. (Ékléziyastis 3:​1, 4; 7:​1-4) Pito sa, Témwen Jéhova ka an lapenn épi sé moun-lan ki an lapenn-an.​—Ronm 12:15.

•   Moun ki mò pa konnèt anyen. Wi, an Ékléziyastis 9:​5, 6, 10, Bib-la di moun ki mò pa konnèt anyen, èk yo pa sa ni édé ni fè moun ki vivan ditò. Konsa, menm si nou sòti an diféwan was èk nou ni diféwan kilti, Témwen Jéhova pa kay patisipé adan anyen Bib-la pa ka sipòté. Pou ègzanp, nou pa kay tjenn lavéyé, èk nou pa kay ni an lètèman èben an annivèsè ki ka kouté hototo lajan senpliman pou nou gadé bon an zyé moun. Osi, nou pa kay limen bouji èben fè mès bay lé mò. Ni nou pa kay palé ba yo ében pwédyé ba yo. Anfen, Témwen Jéhova ka wèté lwen sé pwatik sala paski yo ka obéyi konmand-lan an 2 Kòrint 6:17 ki ka di: “Sépawé kò zòt . . . [èk] pa touché sé bagay yo-a péché ja sali-a.”

•   La ni èspwa pou moun ki ja mò. Bib-la ka di moun ki mò kay wésisité, èk lè-a ka vini lè la pa kay ni lanmò ankò. (Twavay 24:15; Wévélasyon 21:4) Témwen Jéhova ka mété lafwa an pwonmèt sala. Konsa, menm kon sé Kwityen-an an pwèmyé syèk-la, èspwa sala ka konfòté nou.​—1 Tèsalonnika 4:​13.

•   Bib-la ka ankouwajé moun pou tjenn bagay senp. (Pwovèb 11:2) Témwen Jéhova pa ka kwè an lètèman sé an tan pou moutwé moun ki moun nou yé an konmin-lan. (1 Jan 2:​16) Alò, nou ka tjenn sé lètèman nou-an senp. Konsa nou pa kay ganyen senkèy ki twò chè pou annèk gadé bon an zyé moun.

•   Nou pa ka fòsé moun pou kwè sa nou kwè konsèné lètèman. Anfen, Témwen Jéhova ka wèspèkté disizyon moun. Èk sa sé paski Ronm 14:12 di: “Nou tout kay ni pou wéponn tèt nou douvan Bondyé.” Kanmenm, népòt òpòtyounité nou jwenn épi ‘jantiyès èk wèspé’ nou ka èspityé bay moun sa nou ka kwè adan.​—1 Pita 3:​15.

Ki mannyè Témwen Jéhova ka fè lètèman yo?

 Plas-la: An fanmi pé désidé pou tjenn lètèman-an an Sal Wéyòm-lan, an kay lètèman-an, andidan an kay, ében an senmityè-a.

 Lètèman-an: An fwè kay bay an diskou pou konfòté sé moun-lan ki an lapenn-an. Èk i kay di nou sa Bi-la ka di konsèné lanmò èk wézèwèksyon-an. (Jan 11:25; Ronm 5:​12; 2 Pita 3:​13) Osi, fwè-a kay palé konsèné sé bon mannyè-a moun-lan ki mò-a té ni. Apa di sa, i kay di nou sé bon bagay-la moun-lan ki mò-a té fè an sèvis Bondyé.—2 Sanmyèl 1:​17-​27.

 Èk pou fini lètèman-an, nou ka chanté an chanson ki bazé asou Bib-la. (Kòlòsé 3:​16) Èk apwé sa, an fwè kay pwédyé.​—Filipay 4:​6, 7.

 Anmasé latjèt: Témwen Jéhova pa ka mandé lajan pou ni lètèman ni pyès lòt mitin yo ni. Èk yo pa ka janmen anmasé latjèt an sé mitin yo-a.​—Mafyou 10:8.

 Ki moun ki sa atandé?: Menm si ou pa an Témwen Jéhova, ou byen vini pou atandé népòt lètèman nou ni. Èk nou ka ankouwajé tout moun pou atandé sé lézòt mitin nou-an.

Lè lèzòt wilizyon ni lètèman, ès Témwen Jéhova ka atandé?

 Silon konsyans li, chak Témwen Jéhova kay désidé pou kò’y si i kay atandé lètèman an lòt wilizyon ka fè. (1 Timòfi 1:​19) Kanmenm, nou pa kay patisipé adan anyen sé jan wilizyon-an kay fè ki pa an ling épi Bib-la.​—2 Kòrint 6:​14-​17.