Koumannyè Témwen Jéhova Ka Gadé Dévòs?

JWÉ

Témwen Jéhova ka swiv sa Bib-la ka di konsèné mawiyaj èk dévòs. Bon, sé Bondyé ki fè mawiyaj, èk i vlé an mawi èk madanm wèsté ansanm pou tout tan. Anfen, sèl wézon-an Bib-la ka bay pou moun dévòsé, sé si madanm-lan ében mawi-a fè adiltè.—Mafyou 19:5, 6, 9.

Ès Témwen Jéhova ka édé moun ki ni pwòblenm an mawiyaj yo?

Wi, Témwen Jéhova ka édé moun ki ni pwòblenm an mawiyaj yo an plizyè diféwan mannyè. Annou diskité twa «3» an sé mannyè sala.

Bagay moun sa li ében kouté. Témwen Jéhova toujou ni atik ki ni bon enfòmasyon ki ka édé moun pou fòtifyé mawiyaj yo. Sé atik sala ka jis édé moun ki kwè mawiyaj yo ja tou fini. Pou ègzanp, ou sa li ében kouté sé atik sala: “Maintaining Commitment in Your Marriage”, “How to Forgive”, èk “Rebuilding Trust in a Marriage”.
Mitin Témwen Jéhova. Témwen Jéhova ni mitin toulé simenn èvèk yo ka osi tjenn asanblé, èk konvansyon diwan lanné-a. Èk an tout sé mitin sala, yo ka diskité konsèy Bib ki ka édé moun pou ni on bon mawiyaj.
Sé ansyen-an. Sé ansyen-an an sé kongwigasyon-an ka sèvi sé lévanjil-la pou édé moun ki mayé. Pou ègzanp, yo ka sèvi lévanjil tèl kon Èfésòs 5:22-25.

Si an Témwen Jéhova vlé dévòsé, ès sé ansyen-an ni pou ba’y pèwmisyon?

Menm si sé ansyen-an ka édé moun ki ni pwòblenm an mawiyaj yo, yo pa ni dwa-a pou di fwè èben sè-a sa pou fè. (Galécha 6:5) Kanmenm silon Bib-la, si an moun dévòsé èk sé pa pou adiltè, moun sala pa ni dwa-a pou mayé ankò.—1 Timòfi 3:1, 5, 12.

Ès an Témwen Jéhova sa sépawé épi moun-lan i mayé épi-a?

Bib-la ka enkouwajé moun ki mayé pou twavay wèd pou wèsté ansanm menm si bagay pa twò bèl. (1 Kòrint 7:10-16) Byen souvan moun ki mayé sa wanjé an chay an sé pwòblenm yo-a. Èk yo sa fè sa lè yo pwédyé ansanm, swiv konsèy Bib, èk moutwé yonn a lòt lanmityé.—1 Kòrint 13:4-8; Galécha 5:22.

Kanmenm, an Kwityen pé désidé pou sépawé épi moun-lan i mayé épi-a paski sitiwasyon’y byen mové. Pou ègzanp:

Mawi-a ében madanm-lan pa vlé potjiwé ba fanmi’y.—1 Timòfi 5:8.
Mawi-a ka blésé madanm li èben ka mété lavi’y an wis, èben madanm-lan ka fè mawi’y menm bagay-la.—Sam 11:5.
Mawi-a ében madanm-lan ka fè’y byen wèd pou moun-lan i mayé épi-a adowé Bondyé. Pou ègzanp, an mawi pé éséyé fòsé madanm li pou kasé koumandman Bondyé. Konsa madanm-lan pé désidé pou sépawé épi mawi’y paski i vlé obéyi Bondyé.—Twavay 5:29.