KA INO rengo tipa ginipai? Rengo tipa gu nyanyakipa asanahe aboro naasanaha. Isoke oni avura sana ngbatunga agu asanahe duwa gere:

• Ya mo Mbori nangera angera nirengo fuo rani?

• Ya mo avura gbiati arungo atingidi nyasi?

• Ya mo boro naaraka kindi fuo kpioni?

• Ya mo maabangirise ho nga kpikpi aboro araka araka berewe?

• Wai ka mi kparikpee fu Mbori ko ki gi gimi kpee?

• Ginipai ka mi mangihe tipa ka gbia ngbarago rogo gimi raka?

Wari rengbe oni ni ka gbia akaragapai sa agi asanahe re? Ka oni sana dungu aboro, oni gbia akaragapai nibakiakia. Ka oni vura sana airatatamana watadu kikindigi pa aboro, agu akaragapai i ka fuhe natagbagatihe atagbaga. Agu akuraha nawira wa ruhe aru ti gu regbo i afuhe, ono ngbutuko i ki bihe nga runga ha te i ki mbuhe.

Ono tie, buku duho duna agu akaragapai rogoho rengbe boro ka kido kuti ni. Si nga gu buku nga ga rengo. Yesu aya fu Mbori rogo kpee yo wee: “Ga pai nga rengo.” (Yoane 17:17) Gu ga Mbori Pai re nga Ziazia Kekeapai. Rogo agu akpewaraga naye re, oni nika bi bete agu akaragapai nga ga Ziazia Kekeapai kuti agu asanahe du kuari re, nga agu akaragapai nga rengo du ziazia.

NDU GUPAI ABORO NAASANA GU SANAHE RE TI NI: Ani naraka rogo gu zegino hi be gbegberẽ asino gbiati iraira mangaapai. Dungu aboro-pambori nayawee Mbori du naye na agu apai ani arungo behe.

GUPAI ZIAZIA KEKEAPAI AYUGOHO TIPA GIPAI RE: Mbori ayengo na gbegberẽ apai kurii aboro te. Eyobo 34:10 nayaa: “Ka manga gbegberepai, si turũ ti Mbori, na ti gu Ko du na tandu apai dũ, ka manga irairapai.” Mbori na ringbisapai nga ga nyemuse beko tipa aboro. Si nga ndu gupai Yesu ayugupai furani ti ni ani naakparakpee kini yaa: “Barani du ngbangbaturũ yo, . . . Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Matayo 6:9, 10) Mbori nangera angera fuo rani bakere gbe si du ko aguari ti ni ka tona manga agu apai nika digiso gako ringbisapai​.—Yoane 3:16.

Oni zara Bambata Pai 1:26-28; Yakoba 1:13; na 1 Petero 5:6, 7.

NDU GUPAI ABORO NAASANA GU SANAHE RE TI NI: Dungu aboro nakpiko be avura. Ani dunduko naima digo nimbu be arungo.

GUPAI ZIAZIA KEKEAPAI AYUGOHO TIPA GIPAI RE: Mbori afura kumbatayo tipa gu regbo ko ka sigira zereda ti ni auru kpotosende. Tiibe gako Kindo, nga gu zogarago nga ga ngbangbaturũ, aboro “awírika nga pa sovura berewe . . . te.” Kuba gure, “i atá gayo abasape ni marã sopabino.” (Yesaya 2:4) Mbori nika digiso iraira sarangbangaa gbiati arungo. Ziazia Kekeapai nakidohe niyaa: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai [nga gu nakoda iraira mangaapai gbiati arungo] aima nyasa.”—Yugoti 21:3, 4.

Oni bi Atambuahe 37:10, 11; 46:9; na Mika 4:1-4.

NDU GUPAI ABORO NAASANA GU SANAHE RE TI NI: Agu aboro du rogo apambori, badunguyo nayugo gupai ngawee he gudu ho rogo boro yo naraka kindi fuo kpioni. Gu kura aboro nayawee kpikpi aboro rengbe arengba ka imisa unga aboro, na Mbori nafu mbusa fu gbegberẽ aboro nizoko yó nyeanye kindi rogo ba i ayambaha nga iferno.

GUPAI ZIAZIA KEKEAPAI AYUGOHO TIPA GIPAI RE: Ho boro akpi ni, gure nga ungani ima nyasa. Batungusipai 9:5 nayawee “kpikpi aboro aina nga pai te.” Wa duhe nga kpikpi aboro ainongo pai te, i arengbanga ka imisa aboro te watadu ka undo aboro a te mbiko i ti ni te.​—Atambuahe 146:3, 4.

Oni bi Bambata Pai 3:19 na Batungusipai 9:6, 10.

NDU GUPAI ABORO NAASANA GU SANAHE RE TI NI: Ani naida kadu niunga rani, na ani naida ka gbia ngbarago be raka na agu aboro ani akpinyemuyo. Sidu, ani na nyemu ka bi agu abadiangbarani naakpiki.

GUPAI ZIAZIA KEKEAPAI AYUGOHO TIPA GIPAI RE: Mbori nika zingisa dungu agu aboro nakpiki. Yesu akidohe ki yawee aboro ‘agia fugoko rogo amurã yo kini kuru.’ (Yoane 5:28, 29) Ringbisihe kuti gu ringbisapai Mbori adu nani ho ko akusi aboro ni, ko azingisa kura aboro i raki rogo paradizo auru kpotosende. (Ruka 23:43) Gi raka fura yó tipaha kumbatayo re, si nika koda wene kpotose gbiati nyenye unga tipa agu aboro nga agisangba. Ziazia Kekeapai nayaa: “Ruru aboro adía kumbo ringara, ki nye anye kindi.”​—Atambuahe 37:29.

Oni bi Eyobo 14:14, 15; Ruka 7:11-17; na Amokedi 24:15.

NDU GUPAI ABORO NAASANA GU SANAHE RE TI NI: Aboro rogo arago dunduko ninaakparakpee fu Mbori. Ono tie, dunguyo nabihe nga Mbori agianga gayó akpee te.

GUPAI ZIAZIA KEKEAPAI AYUGOHO TIPA GIPAI RE: Yesu aya furani wee ka ani nyenga kuti dogoda bangisapai sa nikpee ya. Ko ayaa: “Wa oni akpara ka oni kpari nga ni dogodi gu kpe ni ba sa sa . . . ya.” (Matayo 6:7) Ka ani aida Mbori degetuko kuti gaani akpee, si naida ani kparikpee ngba gu gene ko aidaha. Tipa ani rengbe ka mangaha wo, si naida ani wiriki gupai Mbori akpinyemuhe na kini kparikpee ringbisihe kuti ni. Bambata Yoane 5:14 nayaa: “Ani ini ka ani ho gu he ku sangba gako nyemuhe yo, ko gi pa rani agia.”

Oni bi Atambuahe 65:2; Yoane 14:6, 14; na 1 Yoane 3:22.

NDU GUPAI ABORO NAASANA GU SANAHE RE TI NI: Dungu aboro idi kuti gupai ngawee, marã, wo rimo boro, watadu ngbanya kpotose rengbe ka sa boro ní du na ngbarago. Si ki tadu were, i kini merefuo ngbatunga agu apai re ono ka i agbianga gu ngbarago i aidaha ya.

GUPAI ZIAZIA KEKEAPAI AYUGOHO TIPA GIPAI RE: Yesu afura tipa ngbarago ho ko ayani wee: “Aboro ngbarago nga agu aboro inipa gu gayó azingo nga ga toro.” (Matayo 5:3, NW) Ani rengbe ka gbia ndikidi ngbarago kinaho sa ka ani guari ni ka mangapai tipa ka mbiisa gu zingo du ani nani, nga gu gomoro nga ga toro tipa gu rengo du tipa Mbori na tipa gu gako ringbisapai du tipa rani. Gu rengo re rogo Ziazia Kekeapai. Pa ino ani gu rengo re rengbe ka undo rani ani kparia agu apai nzunzu nyakipaha na gu anyakanga paha ya. Ka ani mbu Ziazia Kekeapai si niiyugu gene furani tipa gaani adiaberã, si nika ndu na ani sa gu raka duna maabangirise rogoho.—Ruka 11:28.

Oni bi Asanza 3:5, 6, 13-18 na 1 Timoteo 6:9, 10.

 Gupai gumba ani he re, si gbua nga guru bipai tipa agu akaragapai du tipa asanahe sita. Oni naida agu akuraha susi gure? Kangia oni dagba agu aboro “inipa gu gayó azingo nga ga toro,” si nirengo nga oni naida aida ka ino kura apai rogo Ziazia Kekeapai. Isoke oni na baka kina bangironi na agu asanahe duwa: “Kangia Mbori naberãpa rani aberã, tipagine ko ambu gene ti ni fu gbegberẽ apai gbiati arungo si niimangi aboro tipa gbanga regbo? Wai rengbe mi ka mbakada gimi ramukporo?’ Ziazia Kekeapai nafu wene akaragapai sa agu asanahe re na agu akuraha.

Ono tie, dungu aboro areme namanga kina ndundu ti zara Ziazia Kekeapai. I nabihe wa kikii buku ka boro agianga rogoyo ya. Oni naida boro undo roni oni gbia akaragapai rogo Ziazia Kekeapai? ADezire Yekova na aũsunge beyo ue rengbe ka undo roni.

Nibambatapai, gu waraga nga Gini Apai Nzunzu Ziazia Kekeapai Ayugoho? i ambakadihe tipa agu aboro adunga regbo beyo ya i tona wisigo agu akaragapai nga ga Ziazia Kekeapai du ziazia kuti nyanyakipa asanahe. Gu ue ũsunge nga, gu mbakadapai du tipa wisigo Ziazia Kekeapai na boro kpuni yo. Gu boro ini Ziazia Kekeapai wenengai, ní rengbe ka ye fuo roni ka tona wisigoho na oni zanga oni tumo tipaha na oni kini mangihe kporo fuo roni yo watadu gu ba ngbaa bangironi. Oni nikaa dia bete regbo rogo aposo nibasasa tipa ka manga gu wisigopai re rogo Ziazia Kekeapai. Dungu amirioni aboro rogo zegino ima gbia undo be gi mbakadapai re. Dungu yo kini pe gupai nga: “Mi ima gbia rengo!”

Anga kumuko ho kiingo paha ki susi gure te. Gu rengo nga ga Ziazia Kekeapai nazaka gorani be manga sangbaatoro, be unzugurounzuguro apai, na be gunde. Si nafu maabangirise gbiati ngbarago fu boro. Yesu ayaa: “Oni aína rengo aina, ki ra ni rironi be rengo.”​—Yoane 8:32.