1, 2. Gini yuguyugu kpiapai nayugo gupai fu rani nga, si naida ani duna gu kpiapai i aima sigiraha si aida ani mangi diaberã kuti ni nibipa agu apai nga ga pambori?

 WAI rengbe ani ka ino Mbori? Ya mo si naida ani wisigi agu apai dunduko dungu apambori ayugoho mbata ani kini mo ka ruho ka ino ko? Gure rengbe kadu nigasigasipai. Ka ani vura rengba arengba ka mangaha wo, wai ka ani rengbe ka rugutirani na pa gu yugopai nga ruruhe?

² Nirengo, nibipa gu dungu aberã du nibakiakia du aboro nani tipa Mbori, si naida ani duna gene berani ka ino ginigu nga rengo, nga gu du nikpiapai si aida aboro dunduko idi kuti ni. Ani yugungaha na kpiapai: Ani ya kango kuru babagaahe yo tipa bagizo kperokoo. Babagiahe nayaa si nga mitiri biata, ono gu boro nangbehe naberãha ya bagizoho kusende ti gure. Wai rengbe yo ka ruga gupai re? Ni ringbisa yo bagizo gu kperokoo re kuti wiringua mitiri.

3. Tipagine i ake Ziazia Kekeapai ti ni?

³ Ka gumbapai ni sanza, ya mo wiringua mitiri ho, nga gupai i aima sigiraha tipa manga agu adiaberã kuti ni nabipa agu apai nga ga pambori? Ii, si nga gu buku nga Ziazia Kekeapai. Mbori asa gupai nga i ke Ziazia Kekeapai tipa aboro rengbe rogo arago dunduko ka wirika rengo rogoho tipa ko. I aima keka dungu akutu amirioni awirinaha. Na i aima sa fugo ho a, singia kina paparaha gbua wa gu i ayambaha nga vovo ndiko watadu naabaha kurogo afugo susi 2,100. Si mbembedii wa aboro dunduko rengbe arengba ka geda rengo tipa Mbori rogo afugo yo wa du yo nibasasa.

4. Gini apangbangaa Ziazia Kekeapai atingida rani nani?

⁴ Ziazia Kekeapai nga kikiipa gamahe  be Mbori. Si nasakarogo agu apai ka ani arengbanga ka ino rogoyo ya wa ka si naangianga mbiko ho ya. Si nafura tipa agu aboro naraka rogo ngbii atoro. Si nafura tipa ga Mbori aberã na tipa asinoko, na tipa gako ringbisapai. Si nagumbapa gako mangaapai na aboro vuru akutu agarã. Si nafura tipa agu apai nika manga kumbatayo gizo. Na si nayugo gu gene fu rani rengbe ani ka ndu ngbaha ki gbia nyenye unga.

5. Gini kpiapai nayugo gupai nga, fugo Ziazia Kekeapai na ngbanya kuti agu apai nga ga birĩ-inohe?

⁵ Dungu nduapai gu duho nasa rani ani idi gupai nga, Ziazia Kekeapai nzunzu nga Fugo Mbori. Gu kuraha sa dagba gu dunguhe duho nga, fugo Ziazia Kekeapai atagbaganga tihe na agu apai nga ga birĩ-inohe te. Ti agu aregbo nadu bakuru kusayo, aboro rogo zegino dunduko anaberã gupai nga, kpotosende nasungo auru he. Nikpiapai, rogo Afirika pavuruhe ku Diayo, aboro aberẽhe mbata ya kpotosende nasungo auru kaikai ngiri woo, na kaikai angiriru 3,500 kuari auru kpotosende na gu kura kaikai angiriru 3,500 kidu tiihe yo. Wa si avura du wo, na ngbanya kuti birĩ-inohe, bake Ziazia Kekeapai akepai mbata fu susa agarã awere 3,500 ya Mbori ‘na’asa kpotosende gbua zanga he.’—Eyobo 26:7.

6. Gu babakere gopai kisusi nayugo gupai nga, Ziazia Kekeapai aye be Mbori nga gine?

⁶ Gu babakere gopai kisusi nayugo gupai nga, Ziazia Kekeapai aye nzunzu be Mbori, si nga gu gaha kekeapai nafura tipa apai kumbatayo. Anga fugo Mbori wa sangba soroka nga ga aboro te, nirengo, ko ima ino agu apai du kumbatayo; agu apai dunduko ko naagumbaha namanga amanga a wa ko naapehe.

7. Gine nga bete sangba agu anebi nga ga Ziazia Kekeapai yo nadu nidigisidigisihe bakuru kusayo?

⁷ Dungu akama sangba agu anebi nga ga Ziazia Kekeapai yo adu nidigisidigisihe ti agu aregbo nadu mbata. Nikpiapai, mbata fu agarã 700 kumbatayo kindi, Ziazia Kekeapai afura zukazuka ya i avunga Yesu rogo gu gbata nga Betereme, na gure nangia gupai namangi. (Mika 5:2; Matayo 2:3-9) Kupati gu kura sangbaanebi nadu tipa Yesu, Ziazia Kekeapai afura tipa ko ya ngasu dee nika batika ko na i ki kusi ko fu asogo ko niyangaraha tipa azau feda 30. Gu sangbaanebi re amangi wo nirengo a. Nirengo, anga boro ho rogo zegino ka rengbe ka gumba agu apai re kumbatayo wa gure te!—Yesaya 7:14; Zekaraya 11:12, 13; Matayo 1:22, 23; 27:3-5.

8. Gine nga bete sangba agu anebi nga ga Ziazia Kekeapai yo nga gu du nidigisidigisihe ti gi gaani regbo re, na gine agi apai re ayugoho?

 ⁸ Dungu sangba agu anebi nga ga Ziazia Kekeapai yo nadigo ti gi gaani regbo re a. Betehe gere:

•   “Rika aboro azínga [ni vura] kuti gu rika aboro, ngbi ki zingi kuti gu ngbi. Kpotosende adú ni zigizozigizo ho bakere, angbongi ki du na gberãngbi rogo agu arago.”—Ruka 21:10, 11.

•   “Ingapai amaa pai amaa.”—Matayo 24:12.

•   “Rogo kusa rago . . . aboro akpi kina nyemu tiyo, ki du ni airakpinyemumarã, . . . abasasangba avunguyo, . . . airazanga rugatise, airaerã, akpi nga nyemu wene pai ya, . . . airaabiatise, i akpí nyemu sangba borose susi nyemu Mbori.”—2 Timoteo 3:1-5.

 Oni aidanga ha ya agi apai re namanga ti gi gaani regbo re tee? Padu sangba agu anebi nga ga Ziazia Kekeapai yo nirengo na kidu zukazuka nayugo gupai nga, Ziazia Kekeapai nga kungbo buku te. Si nga gu Fugo Mbori gako toro adu kugiipa kehe!—2 Timoteo 3:16.

9, 10. Gine nayugo gupai nga, Mbori ambunga aboro i aria fugo Ziazia Kekeapai te?

⁹ Ani yaa oni nga baira gu basunge nambakada ahe, na oni atangara arugute ti kpewaraga ki bangaha kuti vuro bambu tipa gaoni abamangisunge naamanga apai ringbisihe kuti ni. Ka kura sogo roni aria gupai oni akehe re, ginipai ka oni mangihe? Oni mbakadinga gupai gu boro a’ariaha re tee? Rogo kina gu bangisa gene re, Mbori ambunga aboro i aria gu rengo du rogo Fugo ko nga Ziazia Kekeapai te.

¹⁰ Agu aboro na’asadi tiyo ka aria agu apai Fugo Mbori ayugoho adunga na diabese te. Ho ani aringbisa sangba gu Ziazia Kekeapai ni du berani areme na gu mbaku awirinaha nadu mbata, ani nabihe nga, fugoho kina sa. Gipai re nayugo gupai nga, fugo Ziazia Kekeapai a’arianga tihe vuru gu dungu agarã si naraki rogoho te.