当耶稣去到耶路撒冷嘅伯大尼嗰阵，佢嘅朋友拉撒路已经死咗四日嘞。耶稣跟住拉撒路嘅姐妹马大同马利亚，嚟到拉撒路嘅坟墓。过咗一阵，群众就聚集起嚟。你可唔可以想象到耶稣复活拉撒路嗰阵，马大同马利亚系几咁开心呢？ 请读约翰福音11:21-24,38-44

 马大早就听过同死去嘅人有关嘅好消息。佢知道耶和华会复活死去嘅人，俾佢哋喺地上再次活过嚟。 请读约伯记14:14,15

 人系用尘土造嘅。（创世记2:7；3:19）我哋身体里面冇灵魂存在。所以人死之后，唔会有不死嘅灵魂继续生存，身体嘅所有部分都会停止活动，头脑亦唔能够继续思想。所以拉撒路复活之后，从来冇提及佢死亡期间经历过咩事，因为人死后就再冇知觉。 请读诗篇146:4；传道书9:5,6,10

 上帝会唔会喺人死后用火折磨人呢？既然圣经话死咗嘅人系冇知觉嘅，佢哋又点会受苦呢？好明显，人死咗之后喺熊熊烈火嘅地狱入面受苦，呢个教义系错嘅。事实上，耶和华非常憎恨用残忍嘅手段去折磨人，地狱永火呢个讲法简直系破坏上帝嘅名声。 请读耶利米书7:31

 请观看短片《人死之后会点样呢？》

 死咗嘅人，听唔到，亦讲唔到。（诗篇115:17）但系有啲邪恶嘅天使会假扮死去嘅人，同人讲说话。（彼得后书2:4）耶和华禁止我哋求问死去嘅人。 请读申命记18:10,11

 亿万死去嘅人会喺地上再次活过嚟，包括生前唔认识上帝、做过坏事嘅人。 请读路加福音23:43；使徒行传24:15

 呢啲人复活之后，有机会学习真理，认识上帝；亦有机会对耶稣表现信心，服从佢。（启示录20:11-13）如果佢哋再次活过嚟之后做啱嘅事，就可以喺地上永远快乐噉生活落去。 请读约翰福音5:28,29

 耶和华派佢嘅独生子到地上为我哋而死，死去嘅人先有希望再次活过嚟。上帝仁慈噉赐俾我哋复活嘅希望，呢件事令我哋睇出，佢好爱我哋。当死去嘅人复活嗰时，你最想见到边个呢？ 请读约翰福音3:16；罗马书6:23