Ombian̈a tapitry fitorian̈a vaovao tsara io?

Jesosy nivolan̈a: “Hitorian̈a amy tany jiaby vaovao tsara momba Fanjakan̈a ty, amy zen̈y firenena jiaby haharen̈y, zay vo ho avy farany.” (Mat. 24:14) Volan̈a griky teʹlos, nadika “farany” amin’ny andininy io ndreky amin’ ny andininy faha-6, aviô andininy faha-13. Teʹlos io ivolan̈ana faran’ny donian’i Satana amin’ny Aramagedona. (Apok. 16:14, 16) Ke zen̈y mahavy atsika mbala hitory vaovao tsara fo, firaka aloha helin’ny Aramagedona. Zen̈y man̈itsy fahatakarantsika taloha in̈y.

Taloha atsika nihevitry fa ho vita fitorian̈a vaovao tsara io, izikoa fa manomboko fahorian̈a be amy fandravanan̈a Babylony Be. (Apok. 17:3, 5, 15, 16) Atsika nino fa amy zen̈y hifaran̈a “taon̈o fan̈aboahan’i Jehovah fankasitrahan̈a.” (Isaia 61:2) Atsika nihevitry fa lan̈iany olo tafitsaka amy fahorian̈a be io, efa nan̈aporofo fa irô nanompo Jehovah ke tsy nivadiky taminany, talohan’ny fahorian̈a be manomboko. Irô io nampiran̈intsika tamindrô Jiosy tafitsaka tamy nandravanan̈a Jerosalema, tamy 607 T.K. Efa navoa lamariky baka ho tafitsaka velon̈o irô io talohan’izen̈y, fôtony nanompo Jehovah ndreky tsy tia ny ratsy. (Ezek. 5:11; 9:4) Fa fampitahan̈a zen̈y tsy mifan̈araka amy volan̈an’i Jesosy amy Matio 24:14, fôtony hita amizio fa olo mety mbala afaka han̈eky vaovao tsara, firaka aloha helin’ny farany amin’ny Aramagedona.

Fan̈itsian̈a fomba fazahoantsika Matio 24:14 koa man̈itsy fazahoantsika hafatra momba havandra koran̈in’ny Apokalypsy 16:21. Izikoa fa natao fandinihan̈a, hita fa mifameno irô andininy aroe io. Nan̈ino? Valin’izen̈y mifandray amy fomba handraisan’olo hafatra momba Fanjakan̈an’ny Zan̈ahary. “Amindrô olo hivonjen̈a aby io” nivolan̈in’i Paoly, hafatra io vaovao tsara, “han̈itry tsara.” Fa amindrô fahavalon’ny Zan̈ahary aby io ndraiky izio vaovao ratsy, “fôfokon’ny fahafatesan̈a.” (2 Kor. 2:15, 16) Tsy tiandrô hafatra momba Fanjakan̈a io, fôtony abaribarin’izio haratsian’ny donia ty: Izio ratsy, anjakan’i Satana, baka iô hiravan̈iny.​—Jaona 7:7; 1 Jaona 2:17; 5:19.

Aleva onon̈o koa fa havandra koran̈in’ny Apokalypsy io maventy be, fa “tsy karaha mahazatra.” Zen̈y ahitan̈a fa amy fahorian̈a be, hahaihivantan̈a fo hafatra torintsika, sady ho maro mare koa olo haharen̈y izio lombolombon’ny taloha. Ke vokany, ho marobe olo hahay an̈aran’i Jehovah. (Ezek. 39:7) Afaran’ny fandravanan̈a Babylony Be, ho hisy olo ma ho tia hafatra momba Fanjakan̈a io, karaha han̈itry tsara in̈y? Mety ho hisy. Irô mety hahatsiaro na hahita fa efa taon̈o maro nan̈ambaran’ny Vavolombelon̈on’i Jehovah fa ho ravan̈a fivavahan̈a diso.

Raha zen̈y mira raha nandalo ta Ezipty, tafaran’ny Antambo Folo in̈y. Jehovah koa fa ‘nampihatra didim-pitsaran̈a tamy zan̈ahary jiabin’i Ezipty’, ‘naro olo tsy Israelita’ nan̈araka irô Israelita aby io. (Eks. 12:12, 37, 38) Irô olo aby io nety nilan̈y tamy Jehovah, izikoa fa hitandrô fa tanteraka Antambo Folo nivolan̈in’i Mosesy in̈y.

Lan̈iany olo milan̈y amy Jehovah afaran’ny fandravanan̈a Babylony Be afaka hanan̈a tombontsoa han̈ano ny tsara amindrô rahalahin’i Kristy, mbala ambony tany eto amy zen̈y. (Mat. 25:34-36, 40) Mazava ho azy fa ho vita fan̈avahan̈a ôndrikôndriky, aloha helin’ny Aramagedona, izikoa irô voahosotro mbala tavela aby io efa mahazo hatsaran̈a nindrô an-dan̈itry an̈y.

Fan̈itsian̈a zen̈y ahitan̈a tsarabe karakôry habezan’ny fitiavan̈a ndreky famindram-pôn’i Jehovah. Marin̈y ankitin̈y fa “tsisy olo tiany ho ripaka fa tiany olo jiaby hibebaka.”​—2 Pet. 3:9.