Miavaka fomba fitilin̈an’ny voan’ny folera beroberoko. Izio miala amy lohan’ny folera iô koa fa tsofin’ny tsiko, ke mitilin̈y karaha parachute madiniky hely. Baka ambany oe raha aby io manomboko mitilin̈y, fa ndray zen̈y sasany amindrô mahavita miteky kilometra araiky na mandilatran’izen̈y. Nan̈ino irô mahavita mitilin̈y elabe karaha zen̈y? Vo tsy ela, manam-pahaizan̈a aby io nahita fa mahitsy tsara sady tsy mihetsiketsiky voan’ny folera io koa fa mitilin̈y, ke hita fa izio mahomby lavitry tozay parachute.

 Diniha hely baka: Voan’ny folera io tsiaraikiaraiky misy tahony hely, amy tendron’izio misy raha karaha volovolo matify kahian̈a pappus. Man̈ano karaha parachute in̈y amy zay asan’ny pappus io, ke zen̈y mahavy voan’ny folera io mahavita mitilin̈y ela.

 Fa tsy zen̈y fo asan’ny raha karaha volovolo matify io. Misy tsiko mandalo man̈odidin̈y izio ndreky miditry an̈elan̈elan’izio, tsiko io amy zay mihodinkodin̈y ke mifôron̈o gôsy an̈abon’ny pappus io. Malemy tsiko ambanin’ny gôsy io ke voantsoriny manonga pappus io. Baka amy zen̈y mahavy izy tsy malaky latsaka.

 Milamin̈y tsara fomba fipitrahan’ny raha karaha volovolo aby io. Zen̈y mahavy pappus io mety hidiran’ny tsiko, karaha parachute fo, ke mahomby tsara fomba fitilin̈any sady mahitsy tsara. Folo isan-jaton’ny pappus io fo misy volovolo madiniky aby io, fa ankoatran’izen̈y tsisy raha! Ke hely fo dikan’izen̈y raha mampitilin̈y izy.

 Irô manam-pahaizan̈a aby io tihamôron̈o raha mahavita mitilin̈y karaha voan’ny folera beroberoko. An̈isan’izen̈y iziô drôny madiniky mandeha courant hely fo na tsy mila foeky, ke lôso mihen̈y fampiasan̈a courant. Drôny karaha zen̈y mety ampiasain̈y amy raha samihafa, ohatra iziô, lera mizaha asa madio tsiko sa maloto.

 Akôry ho anao? Fomba fitilin̈an’ny voan’ny folera beroberoko milamin̈y be io ma baka amin’ny evôlision? Sa izio nisy namôron̈o?