იეჰოვაშ მოწმეეფ პოლიტიკურო ნეიტრალურეფ მუნეფიშ რწმენაშ გურშენ რენა, ნამუთ ბიბლიურ გურაფეფშა რე გერსხილ. ჩქი ვა ვოცადუთ გავლენა მიღდან ხელისუფლებაშ წარმომადგენლეფწკუმა. თეწკუმა ართო, ვართ თანამდებობაშ მეღებას ვოცადუთ დო ვართ ხელისუფლებაშ თირუას. ბჯერა, ნამდა ბიბლია მარზენა თეშ საფუძვლიან მიზეზეფს.

•   ჩქი მეპჸუნთ იესოშ მაგალითის, მიდგაქ ვარია თქუ პოლიტიკურ თანამდებობაშე (იოანე 6:15). თიქ მოწაფეეფს დაგურუ, ნამდა ვა რდესკო „თე ქიანაშ ნაწილ“ დო თეთ არგამათ ოძირუ, ნამდა პოლიტიკურ საკითხეფს ნეიტრალურეფ ჸოფედესკო (იოანე 17:14, 16; 18:36; მარკოზი 12:13—17).

•   ჩქი ღორონთიშ სამეფოშ ართგურეფ ვორეთ. იესოქ თე სამეფოშენ თქუ: „თე სახიოლო ამბეს სამეფოშ გურშენ იქადაგენა მთელ მსოფლიოს“ (მათე 24:14). ჩქი, მუჭოთ ღორონთიშ სამეფოშ წარმომადგენელეფ, ფქადაგენთ თიშ მოულაშ გურშენ, ვემშურთ ნამთინ ქიანაშ პოლიტიკაშა დო ჩქინ ქიანას ხოლო ნეიტრალურ პოზიცია მიღნა (2 კორინთელები 5:20; ეფესოელები 6:20).

•   ნეიტრალიტეტიშ დაცვება საშვალებას მარზენა შხვადოშხვა პოლიტიკურ შეხედულებაშ ხალხის თავისფალო ვუქადაგათ სახიოლო ამბე ღორონთიშ სამეფოშ გურშენ. ჩქი ვოცადუთ, სიტყვათ დო საქმეთ ვოძირათ, ნამდა ვონდუთ ღორონთიშ სამეფოს, ნამუთ გეგნოჭკირუნს მსოფლიო პრობლემეფს (ფსალმუნი 56:11).

•   პოლიტიკურო ნეიტრალურეფ ვორეთინ თენა მოხვარნა, საერთაშორისო საჯიმალოშ ნაწილ ვორდათ (კოლოსელები 3:14; 1 პეტრე 2:17). თეშ გინაწონს, რელიგიეფ, ნამუთ მონაწილებას ღებულენა პოლიტიკურ საკითხეფს, ხეს ვა უნწყუნა მუნეფიშ მიმაჸუნალეფიშ ართობას (1 კორინთელები 1:10).

 ხელისუფლებაშ პატიცემა. მართალ რე, მონაწილებას ვა ბღებულენთ პოლიტიკას, მარა თი ქიანაშ მთავრობაშ წარმომადგენელეფიშ პატიცემას გიმიფრჩქინანთ, სოდეთ ფცხოვრენთ. ზუსტას თეს მოგურუანა ბიბლია:

„არძაქ დემორჩილას ხელისუფლებას“ (რომაელები 13:1). ჩქი კანონიშ მორჩილეფ ვორეთ, ოგაფურეფს ბგაფულენთ დო ხუჯის ვუკინენთ თიცალ ღონისძიებეფს, ნამუთ ხალხიშ ჯგირობუას ომსახურ. თიშ მანგიორო, ნამდა ხელისუფლებაშ თირუა მიმდომათ, მეპჸუნთ ბიბლიურ რჩევას, ქიბლოცათ „მეფეეფშო დო არძაშო, მიდგას მაღალ მდგომარეობა უკინებ“, განსაკუთრებულო თიმწკუმა, მუჟამსით თინეფიშ გადაწყვეტილებეფქ შილებე ხე შემშალან თაყვანიშცემაშ თავისუფლებას (1 ტიმოთე 2:1, 2).

 თეს გეძინელ, პატის ფცენთ შხვეფიშ უფლებას, მუნეფიშით გეგნოჭყვიდან, მონაწილებას მიღენან დო ვარ პოლიტიკას. მაგალთო, ჩქი ვართ არჩევნეფიშ ჩატარებას ვუშალუნთ ხეს დო ვართ თი ხალხის, მიდგას არჩევნეფს მონაწილებაშ მეღება ოკო.

 ახალ მიშაღალირ რენო ნეიტრალიტეტიშ დაცვება? მუშო ოკო რაგად, ვარ. მოციქულეფს დო პირველ საუკუნეშ ქრისტიანეფს ხოლო თეცალ პოზიცია უკებდეს პოლიტიკაწკუმა დაკავშირებით. ართ წიგნის ბკითხულენთ: „მართალ რე, პირველ საუკუნეშ ქრისტიანეფს უჩქუდეს, ნამდა პატი ოკო ცესკო ხელისუფლებაშ წარმომადგენელეფს, მარა თინა ხოლო ჯგირო არჩქილედეს, ნამდა პოლიტიკაშა ოკო ვემშართესკო“ (Beyond Good Intentions). პირველ საუკუნეშ ქრისტიანეფიშ გურშენ ხოლო ართ წიგნის თეცალ აზრ რე მოჩამილ, ნამდა თინეფ „ვეკინენდეს პოლიტიკურ თანამდებობეფს“ (On the Road to Civilization).

 ხომ ვაცილ ჩქინ პოლიტიკურ ნეიტრალიტეტ ეროვნულ უსაფრთხოებას? მუშო ოკო რაგად, ვარ. ჩქი ვორეთ მშვიდობაშ მოჸოროფე ხალხ დო მუთუნნერო ვა ვოცილუთ ხელისუფლებაშ წარმომადგენელეფს. უკრაინაშ მეცნიერებაშ ეროვნულ აკადემიაშ 2001 წანაშ ანგარიშის ჩქინ პოლიტიკურ ნეიტრალიტეტიშ გურშენ თეცალ მუდგარენ ჭარუდ: „ამდღა ნამთინეს შილებე ვა მოწონდას იეჰოვაშ მოწმეეფიშ პოზიცია; ზუსტას თენა რდუ თიშ მიზეზ, ნამდა ნაცისტურ დო კომუნისტურ რეჟიმ თხოზუდ თინეფს“. მარა საბჭოთა რეპრესიეფიშ დროს ხოლო თინეფ „კანონიშ მორჩილ მოქალაქეეფ რდეს, პატიოსანო დო დუდგინოდვალირო ხანდენდეს ფერმეფს დო ქარხანეფს; თეწკუმა ართო, ვართ კომუნისტურ რეჟიმს ოცილდეს. ამდღა ხოლო, იეჰოვაშ მოწმეეფიშ რწმენა დო საქმიანობა, მუჭოთ თე ანგარიშის რე მოჩამილ, „ნამთინ სახელმწიფოშ უსაფრთხოებას დო ართობას ვაცილ“.