ქო, სინამდვილეს არსებენს. თინა „ქვეყნიერებაშ მართველ“ რე, სულიერ ქმნილება, ნამდგაქ უბადოთ გინირთჷ დო ღორონთიშ წინააღმდეგ მიდართჷ (იოანე 14:30; ეფესოელები 6:11, 12). ბიბლიას თინა შხვადოშხვანერო რე მოშინაფილ:

•   სატანა, მუთ ნიშნენს „მოწინააღმდეგეს“ (იობი 1:6).

•   ეშმაკ, მუთ ნიშნენს „ტყურაშ ეკმაბრალებერს“ (გამოცხადება 12:9).

•   გვერ, ნამუთ ბიბლიას გიმირინუაფ „მეტყურეშ“ მნიშვნელობათ (2 კორინთელები 11:3).

•   მაჩილითაფარ (მათე 4:3).

•   მეტყურე (იოანე 8:44).

რეალურ პიროვნება რენო ეშმაკ დოვარ უბადობა, ნამუთ ადამიანს ახასიათენს?

 ნამთინეშ აზრით ეშმაკ რეალურ პიროვნება ვა რე დო თინა უბრალოთ თი უბადობა რე, ნამუთ ადამიანს ახასიათენს. მარა ბიბლიას ინოჭარილ რე ღორონთ დო სატანაშ შქას ჩიება. მუჭო შილებედ, სრულყოფილ ღორონთ, ნამდგაშ პიროვნებას მუთუნნერ უბადობა ვა რე, თე დროს მუშ დუდის ურაგადუდკო? (კანონი 32:4; იობი 2:1—6). სატანაქ უცოდველ იესოს ხოლო დურაგადუ დო ეცად, მიოჩილითუკო თინა (მათე 4:8—10; 1 იოანე 3:5). თაშ ნამდა, მუჭოთ ბიბლიაშე ვორწყეთ, სატანა რეალურ პიროვნება რე დო ვართ ხოლო უბადობა, ნამუთ ადამიანიშ პიროვნებას რე.

 ოკო გამკვირდანიო, ნამდა ბრელს ვა ჯერს, სატანა რეალურ პიროვნება რენ? ვარ, მუშენდა ბიბლიაშე ბგებულენთ, ნამდა სატანა მუშ მიზანიშ მიოჭირნაფალო ბრელ მეთოდის გიმირინუანს (2 თესალონიკელები 2:9, 10). თიშ ართ-ართ არძაშ უდიდაშ ტყურა თინა რე, ნამდა ითამ ვა არსებენს (2 კორინთელები 4:4).

  მუჭო ფიქრენს ნამთინე: ლუციფერ სატანა ეშმაკიშ ართ-ართ სახელ რე.

 მუ რე სინამდვილე: ებრაულ სიტყვა, ნამუთ ნამთინე ბიბლიას ითარგმნუ მუჭოთ „ლუციფერ“, ნიშნენს „რწკინუნსინ ფერს“ (ესაია 14:12). კონტექსტშე იძირე, ნამდა თე სიტყვა მეუთითენს ბაბილონიშ სამეფო დინასტიაშა, ნამუთ ღორონთიქ დამდაბალ სიამაყეშ გურშენ (ესაია 14:4, 13—20). გამოთქმა „რწკინუნსინ ფერ“ ბაბილონიშ დინასტიას თიშ დამარცხებაშ უკულ დუკავშირეს.

  მუჭო ფიქრენს ნამთინე: ღორონთ სატანას ხალხიშ დასაჯებელო ირინუანს.

 მუ რე სინამდვილე: ეშმაკ ღორონთიშ ნტერ რე დო ვართ ხოლო თიშ მსახურ. თინა ოწინააღმდეგ დო ტყურას ეკაწამენს ღორონთიშ ხალხის (1 პეტრე 5:8; გამოცხადება 12:10).