დუდი 7
დაფასით ღორონთიშ საჩუქარ — სიცოცხლე
„სქანდე მოურს სიცოცხლე“ (ფსალმუნი 36:9).
1, 2. მუ ძვირფას საჩუქარ მუჩეს იეჰოვაქ?
იეჰოვაქ არძას მუჩეს ძვირფას საჩუქარ — სიცოცხლე (დაბადება 1:27). თის ოკო, გეფხარათ სიცოცხლეთ, ათეშენ მუჩეს პრინციპეფ, ნამუთ მოგურუანა, მუჭო შემლებნა მიბღათ სწორ გადაწყვეტილებეფ. ჩქი ოკო გეგმიბრინუათ თე პრინციპეფ, ნამდა ართიანშე გუვარჩუათ ჯგირ დო ფურ (ებრაელები 5:14). თეცალ მოქმედებათ იეჰოვას ვარზენთ ნებას, ქუდმოგურუან სწორ აზროვნება. მუჟამსით ფცხოვრენთ იეჰოვაშ პრინციპეფით დო ვორწყეთ, მუჭო ითირუ ჩქინ ცხოვრება უჯგუშობაშა, თენა მოხვარნა, უმოსო ქინვანჭათ სინამდვილეს, მუსხით ძვირფას რე თინა.
2 ცხოვრება იუფრაშებ დო შილებე ველუქინ ფერ მუდგარენეფქ ქუმოხვადას. მინშა თიცალ სიტუაციეფ მიკორჩქინდუ, ნამუშ გურშენ ბიბლიას კონკრეტულ მითითებეფ ვა რე მოჩამილ. მაგალთო, შილებე თიცალ გადაწყვეტილებეფქ მაჸუან მიოღებელქ, ნამუთ ოხუ მკურნალობაშ დროს ზისხირიშ გიმორნაფას. მუჭო შემლებნა თეცალ სიტუაციას ღორონთიშ მოსაწონ გადაწყვეტილებეფ მიბღათ? ბიბლიას მოჩამილ რე პრინციპეფ, სოვრეშეთ ბგებულენთ, მუნერ თვალსაზრის უღჷ ღორონთის სიცოცხლე დო ზისხირშე. მუჟამსით ჯგირო მარჩქილენა თე პრინციპეფ, შემალებენა მიბღათ სწორ გადაწყვეტილებეფ დო მაღვენნა სუფთა სინდის (იგავები 2:6—11). მორთ გუვარჩუათ თე პრინციპეფშე ნამთინე.
ღორონთიშ თვალსაზრის სიცოცხლე დო ზისხირშე
3, 4. ა) მუჭო მოძირეს იეჰოვაქ მუშ თვალსაზრის ზისხირშე? ბ) მუ რე წარმოდგენილ ზისხირით?
3 ბიბლია მოგურუანა, ნამდა ზისხირ წმინდა რე, მუშენდა თით წარმოდგენილ რე სიცოცხლე, ნამუთ ძვირფას რე იეჰოვაშო. მუჟამსით კაენქ დოჸვილ მუშ ჯიმა, იეჰოვაქ თის უწუ: „სქან ჯიმაშ ზისხირ დიხაშე ეშმოძახანს“ (დაბადება 4:10). მუჟამსით აბელიშ ზისხირიშ გურშენ რაგადანდჷ, იეჰოვა თიშ სიცოცხლეს გულისხმენდჷ.
4 წარღვნაშ უკულ ღორონთიქ ხალხის ხორციშ ჭკუმუაშ ნება ქიმეჩ, მარა თეწკუმა ართო განსაკუთრებულო გაფრთხილ: „ხორც თიშ სიცოცხლეწკუმა — ზისხირწკუმა — ართო ვა ჭკუმათ“ (დაბადება 9:4). თე მითითებაშ დაცვება ნოეშ არძა გამნარყის მეთხიებ, თინეფწკუმა ართო ჩქი ხოლო. თავრეშე ჯგირო იძირე, ნამდა იეჰოვაშ თოლს ზისხირით წარმოდგენილ რე სიცოცხლე დო თე საკითხის ჩქი ხოლო თაშ ოკო ვუჯინედათ (ფსალმუნი 36:9).
5, 6. მუჭო იძირე მოსეშ კანონშე, მუნერო უჯინე იეჰოვა სიცოცხლეს დო ზისხირს?
5 კანონ, ნამუთ იეჰოვაქ მოსეშ საშვალებათ გინოჩ ისრაელეფს, აფრთხილენდჷ თინეფს, მით ზისხირს ოჭკუმუნდჷ: „ვარიას ქოფთქუანქ თიშე დო ვა ვაცოცხლენქ, მუშენდა ხორციელიშ სიცოცხლე თიშ ზისხირს რე“ (ლევიანები 17:10, 11).
6 მოსეშ კანონით, მუჟამსით ცხოველს ოჭკუმალო ჸვილუნდეს, თიშ ზისხირ დიხას ოკო ქუდაბესკო. თეთ ოძირანდეს, ნამდა ცხოველიშ სიცოცხლე ოკუთვნუდ თიშ გუმაჭყაფალს, იეჰოვას (კანონი 12:16; ეზეკიელი 18:4). მარა იეჰოვა ვეთხინდჷ თინეფშე, ნამდა ბოლო წვეთშახ გეგშუწირდესკო ცხოველიშ ხორცშე ზისხირ. მუჟამსით ირფელს გაკეთენდეს, ცხოველ ზისხირშე დოჩოლედკო, თეშ უკულ სუფთა სინდისით შეულებდეს თიშ ჭკუმუა. ცხოველიშ ზისხირიშ დაფასებათ თინეფ ოძირანდეს, ნამდა აფასენდეს იეჰოვას, სიცოცხლეშ მუმაჩამალს. თეს გეძინელ, კანონ ისრაელეფშე ითხინდჷ, ცოდვეფიშ ოპატიებელო ცხოველეფ შეწირესკო (ქოძირ დანართ 19, 20).
7. მუჭო ოძირუ დავითიქ, ნამდა აფასენდჷ ზისხირს?
7 დავითიშ მაგალითშე იძირე, მუსხით ძვირფას რე ზისხირ. ართშა ფილისტიმელეფწკუმა ჩხუპიშ დროს დავითის მანგარო ქუმაჸუმენ. თიშ ჯარიშკოჩეფქ ნტერიშ ტერიტორიაშა გეგნორთეს დო საფრთხეშა ქინიჸოთეს დუდ, ნამდა დავითშა წყარ ქუმუღალდესკო. მარა მუჟამსით ქუმუღეს, დავითიქ ვარია ქოთქუ თიშ შუმაშე დო „იეჰოვას ქუდუბ თინა“. დავითიქ თქუ: „იეჰოვა, ვა მაქიმნე თენა! მუჭო ფშვა თე კათაშ ზისხირ, ნამდგაქ მუნეფიშ სიცოცხლე საფრთხეშა ქინიჸოთეს!“. დავითის ჯგირო არჩქილედ, მუსხით ძვირფას რდუ იეჰოვაშო სიცოცხლე დო ზისხირ (2 სამუელი 23:15—17).
8, 9. მუჭო უჯინენა ამდღა ქრისტიანეფ ზისხირიშ გიმორნაფაშ საკითხის?
8 პირველ ქრისტიანეფს უკვე ვემეთხიებდეს ცხოველეფიშ შეწირუა, მარა თინეფს სწორ თვალსაზრის ოკო უღდესკო ზისხირწკუმა დაკავშირებით. „დუდ აურიდათ . . . ზისხირს“ — მოსეშ კანონშე ართ-ართ მითითება რდუ, ნამდგაშ დაცვებას იეჰოვა ქრისტიანეფშე ითხინდჷ. თე მითითება თიცალ მნიშვნელოვან რდუ, მუჭოთ უზნეობაშე დო კერპთაყვანიშცემაშე დუდიშ არიდება (საქმეები 15:28, 29).
მუჭო ევუნწყუნქ შხვეფს ჩქიმ გადაწყვეტილებას, ნამუთ ოხუ ზისხირიშ ფრაქციეფიშ გიმორნაფას?
9 თაშ რე ამდღა ხოლო. ქრისტიანეფს მიჩქნა, ნამდა იეჰოვა რე სიცოცხლეშ გუმაჭყაფალ დო სიცოცხლეშ არძა ფორმა თის ოკუთვნ. თეწკუმა ართო მარჩქილენა, ნამდა ზისხირ წმინდა რე დო თინა წარმოადგინენს სიცოცხლეს. ათეშენ, მუჟამსით საქმე ოხუ თიცალ მკურნალობაშ მეთოდის, სოდეთ ითხინა ზისხირიშ გიმორნაფას, საჭირო რე ბიბლიურ პრინციპეფიშ გიმორნაფა.
ზისხირიშ გიმორნაფა მკურნალობაშ დროს
10, 11. ა) მუნერ დამოკიდებულება უღნა იეჰოვაშ მოწმეეფს ზისხირიშ დო თიშ ოთხ ძირითად კომპონენტიშ გინობუნაშე? ბ) ნამ საკითხეფ რე ქრისტიანიშ პირად გინაჭყვიდირალ?
10 იეჰოვაშ მოწმეეფს არჩქილენა, ნამდა მითითებაშა, „დუდ აურიდათ . . . ზისხირს“, უმოს მეტ მიშურს, ვინემ ზისხირიშ ჭკუმუა ვარდა შუმაშე ვარიაშ რაგად. თენა ნიშნენს, ნამდა ზისხირ ვეგნიბათ, ვართ ზისხირიშ ბანკის ჩუვაბარათ დო ვართ ფჩუათ ჩქინ ზისხირ, ნამდა უკულ კინ გეგნომბან. თენა თის ხოლო ნიშნენს, ვარია ქოფთქუათ ზისხირიშ ძირითად კომპონენტეფიშ გინობუნაშე, მუნერით რე ერითროციტეფ, ლეიკოციტეფ, თრომბოციტეფ დო პლაზმა.
11 თე ოთხ კომპონენტშე ღებულენა ზისხირიშ ფრაქციეფს. თითოულ ქრისტიანიშ გინაჭყვიდირალ რე, გეგმირინუანს დო ვარ თე ფრაქციეფს, თეს გეძინელ, თიცალ სამედიცინო პროცედურეფს, სოდეთ კინ მუშ ზისხირს გიმირინუანა. თითოულ ქრისტიანქ პირადო ოკო გინოჭყვიდას, მუჭო გიმირინუანს მუშ ზისხირს ოპერაციაშ, ანალიზეფიშ ეჭოფუაშ ვარდა მკურნალობაშ დროს (ქოძირ დანართ 21).
12. ა) მუშენ რე იეჰოვაშო მნიშვნელოვან, მუს გინობჭყვიდუნთ სინდისწკუმა დაკავშირებულ საკითხეფიშ დროს? ბ) მუჭო შემლებნა გონივრულო გინობჭყვიდათ, მკურნალობაშ ნამ მეთოდის გიშაბგორუნთ?
12 უღუნო იეჰოვაშო მნიშვნელობა, მუს გინობჭყვიდუნთ სინდისწკუმა დაკავშირებულ საკითხეფიშ დროს? მუშო ოკო რაგად, ქო. იეჰოვა დაინტერესებულ რე ჩქინ ფიქრეფით დო მოტივეფით (წეკითხ იგავები 17:3; 24:12). ათეშენ მკურნალობაქ ქიდმესაჭირეს-და, იეჰოვას ოკო ქოფთხუათ ხემძღვანელობა, მეტ ინფორმაცია მიბღათ მკურნალობაშ თე მეთოდშე დო საბოლათ ბიბლიათ გოწაფილ სინდისით მიბღათ გადაწყვეტილება. თეცალ სიტუაციას შხვეფს ოკო ვა ბკითხათ, მუჭო მიქციებდეს ჩქინ ადგილს; ვართ მითინქ ოკო ეცადას, დუგანძალას მუშ აზრიშ გათვალისწინება თე საკითხშე. ბიბლია იჩიებ, ნამდა „თითოულს მუშ ოღალ გილუღ“ (გალატელები 6:5; რომაელები 14:12).
იეჰოვაშ კანონეფშე თიშ ჸოროფას ვორწყეთ
13. მუს მოგურუანა იეჰოვაშ გურშენ ზისხირწკუმა დაკავშირებულ კანონეფ დო პრინციპეფ?
13 ირფელ, მუდგას იეჰოვა ჩქინდე ითხინს, კინ ჩქინ საჯგირობუოთ რე დო ვორწყეთ, მუჭო ვუჸორთ თის (ფსალმუნი 19:7—11). მარა ჩქი ხვალე თიშენ ვა ვომორჩილუთ ღორონთის, ნამდა თიშ მითითებეფს ჯგირობუა მოუღ, თიშენ ვომორჩილუთ, ნამდა მიჸორა თინა. იეჰოვა ქომიჸორან-და, ვარიას ქოფთქუანთ ზისხირიშ გინობუნაშე (საქმეები 15:20). ზისხირიშ გინობუნაშე ვარიაშ რაგად ჩქინ ჯამრთელობას ხოლო უნწყუნს ხეს. ამდღა ბრელს უჩქჷ, ნამდა ზისხირიშ გინობუნას გართულებეფ მოჸუნს; თეწკუმა ართო, ექიმეფიშ უმენტაშის არჩქილე, ნამდა თი პაციენტეფს, მით ვეგნიბუნა ზისხირს, უჯგუშო გინუღნა ოპერაციეფ. არგამა რე, იეჰოვაშ პრინციპეფშე სიბრძნე დო ჸოროფა იძირე (წეკითხ ესაია 55:9; იოანე 14:21, 23).
14, 15. ა) მუ კანონეფ მეჩჷ იეჰოვაქ მუშ ხალხის, ნამდა დუთხილუდკო თინეფ? ბ) მუჭო შეილებ გიმირინუე პრინციპეფ, ნამდგაშა თე კანონეფ რე გერსხილ?
14 ღორონთიშ კანონეფს ირიათო ჯგირობუა მოუღუდ თიშ ხალხშო. მაგალთო, იეჰოვაქ ისრაელეფს მეჩჷ კანონეფ, ნამუთ თხილანდჷ თინეფს უბედურ შემთხვევეფშე. ართ-ართ კანონ ითხინდჷ, ჸუდეშ მინჯექ ჸუდეშ სწორ ორთვალს დაბალ კიდალა ქიგიაშენკო, ნამდა თევრეშე მითინქ ვეგთანთხკო (კანონი 22:8). ხოლო ართ კანონ ცხოველეფს ოხუდ. მითინს მარაგვინჯე ხოჯ ქოჸუნდ-და, მინჯექ ირფელ ოკო გაკეთკო, ნამდა თიქ მითინ ვა დაზიანკო ვარდა ვა დოჸვილკო (გამოსვლა 21:28, 29). მუჟამსით ნამთინე ისრაელ ვედემორჩილებუდ თე კანონეფს დო თეშ გურშენ კოჩ დოღურუდ, თინა დამნაშავე იჸუაფუდ თე კოჩიშ ღურას.
15 თე კანონეფშე შემლებნა ბძირათ, მუსხით ძვირფას რე იეჰოვაშო სიცოცხლე. მუჭო ოკო იმოქმედას თექ ჩქინწკუმა? სიცოცხლეს ვაფასენთ, მუჟამსით ირნერო ვოცადუთ, უსაფრთხო რდას ჩქინ ჸუდე, მანქანა, თეწკუმა ართო, ყურადღებას ვაქციენთ მანქანაშ გილაჸუნაფაშ მანერას დო გიშაგორილ გართობას. ამდღარ დროს განსაკუთრებულო ახალგაზრდეფ ფიქრენა, ნამდა თინეფს გლახა მუთუნ ვა მოხვადნა, ათეშენ რისკშა მეულა დო ყურადღებას ვაქციენა საფრთხეეფს. მარა იეჰოვა ჩქინდე ელჷ, ნამდა დუვაფასენთ, მუჭოთ ჩქინ, თეშ შხვეფიშ სიცოცხლეს (ეკლესიასტე 11:9, 10).
16. მუ დამოკიდებულება უღჷ იეჰოვას აბორტშე?
16 იეჰოვაშო ძვირფას რე არძა ადამიანიშ სიცოცხლე. თინა დაბადებულ ვა რენ ფერ ბაღანაშ სიცოცხლეს ხოლო აფასენს. მოსეშ კანონით ორსულ ოსურს მითინ შემთხვევით ქიმიოგანდჷ დო შედეგო ოსურ ვარდა ბაღანა დოღურუდ-და, თის ბრალ გიადვალუდ კოჩიშ ჸვილუას. მართალ რე, თის თენა გარძახ ვა უკეთებ, მარა სიცოცხლე სიცოცხლეთ ოკო გინუგაფუდკო (წეკითხ გამოსვლა 21:22, 23). იეჰოვაშო დიო დაბადებულ ვა რენ ფერ ბაღანა ხოლო ცოცხალ პიროვნება რე. თაშ ნამდა, სქან აზრით, მუს ფიქრენს ღორონთ აბორტშე? მუს გინაფლენს თინა, მუჟამსით ორწყე, ნამდა ირ წანას აბორტით მილიონობით ბაღანაშ სიცოცხლეს სპუნა?
17. მუ ელუკინანს გურშა თის, მიდგაქ აბორტიშ კეთებაშ უკულ გეგჷ იეჰოვაშ დამოკიდებულება თე საკითხშე?
17 მუშ რაგად შილებე თი პიროვნებაშე, მიდგაქ აბორტ გეკეთ დო უკულ გეგჷ იეჰოვაშ დამოკიდებულება თე საკითხშე? თის შეულებ დარწმუნებულ რდას, ნამდა იეჰოვაქ ქაპატუ იესოშ მსხვერპლიშ საფუძველშა (ლუკა 5:32; ეფესოელები 1:7). პიროვნება ულირს დაშებულს შურ დო გურით ქონარღენს-და, დუდ დამნაშავეთ ოკო ვეგინას. „იეჰოვა მოჭყოლოფე რე დო გურშა მეუღ შხვეფიშ გაჭირება, . . . მუჭოთ ბჟაეიოლ რე შორს ბჟადინოლშენ, თეშ დამთხინუეს თიქ ჩქინ ცოდვეფ“ (ფსალმუნი 103:8—14).
დუდ ეუჩილითე უბადო ფიქრეფს
18. მუშენ ოკო ვეცადათ, ნამდა მიფშორათ უბადო ფიქრეფ?
18 ღორონთიშ საჩუქარიშ, სიცოცხლეშ დაფასება გურშე იჭყაფ. შხვეფწკუმა სქან დამოკიდებულებაშე იძირე, ქაფასენქ დო ვარ სიცოცხლეს. მოციქულ იოანექ ჭარჷ: „მიდგას მუშ ჯიმა ჯოგჷ, მაჸვილარ რე“ (1 იოანე 3:15). შილებე შურო ვემეფხვადათ თეშ გემეჯოგან თი პიროვნებაქ, მით ართ დროს ვა მობწონდეს. მუჟამსით მითინ რჯოგჷ, შილებე თის უპატიცემლოთ მექცუე, ტყურა ქეკაწამე ვარდა თიშ ღურა ხოლო ქინატრე. იეჰოვას უჩქჷ, მუნერ დამოკიდებულება მიღნა შხვეფწკუმა (ლევიანები 19:16; კანონი 19:18—21; მათე 5:22). თეცალ ფიქრეფ ჩქინ დუც ქეშვატყვით-და, ირნერო ქივეცადათ, ნამდა მიფშორათ თინეფ (იაკობი 1:14, 15; 4:1—3).
19. მუჭო ოკო მოქმედენდას ჩქინწკუმა იეჰოვაშ დამოკიდებულება ძალადობაშე?
19 ხოლო ართ საშვალება, ნამდგათ შემლებნა ვოძირათ, ვაფასენთ სიცოცხლეს, მოჩამილ რე ფსალმუნიშ 11:5-ის. თავრეშე ბგურაფლენთ, ნამდა იეჰოვას ჯოგჷ „ძალადობაშ მოჸოროფე“. მუჟამსით თიცალ გართობას გიშებგორუნთ, სოდეთ ძალადობა რე, ვოძირანთ, ნამდა მიჸორა ძალადობა. მოკონანო, ჩქინ გონება ევოფშათ თიცალ სიტყვეფით, აზრეფით დო სცენეფით, სოდეთ ძალადობა რე? თეშ მანგიორო, ირნერო ოკო ვეცადათ, ჩქინ გონება წმინდა დო მშვიდობიან აზრეფით ევოფშათ (წეკითხ ფილიპელები 4:8, 9).
ორგანიზაციეფ, ნამუთ ვაფასენა სიცოცხლეს
20—22. ა) მუს აბრალუაფ იეჰოვა სატანაშ ქიანას? ბ) მუჭო ოძირანს ღორონთიშ ხალხ, ნამდა ვა რე „თე ქიანაშ ნაწილ“?
20 სატანაშ ქიანა ვაფასენს სიცოცხლეს, ათეშენ იეჰოვა ზისხირიშ დობუნას თის გედვანს ბრალს. პოლიტიკურ ძალეფ საუკუნეეფიშ დინახალე ხეს უნწყუნდჷ მილიონობით კოჩიშ, თინეფ შქას იეჰოვაშ ბრელ მსახურიშ, სიცოცხლეშ მოსპუალას. ბიბლიას თე პოლიტიკურ ძალეფ ვარდა მთავრობეფ გაჟღამებულ მხეცეფს რენა შედარებულ (დანიელი 8:3, 4, 20—22; გამოცხადება 13:1, 2, 7, 8). ამდღარ დროს იარაღეფიშ გიმოჩამა დიდ ბიზნეს რე დო ხალხ თეთ ბრელ ფარას შიბულენს. არგამა რე, ნამდა „მთელ ქიანა უბადოშ ხეს რე“ (1 იოანე 5:19).
21 მარა ჭეშმარიტ ქრისტიანეფ ვა რენა „თე ქიანაშ ნაწილ“. იეჰოვაშ ხალხ ნეიტრალურ რე პოლიტიკურ საკითხეფს დო ჩხუპიშ დროს. თინეფ ვართ იარაღის ეჭოფნა შხვეფიშ ოჸვილარო დო ვართ თიცალ ორგანიზაციეფს უკინენა ხუც, ნამუთ ხეს უნწყუნს ზისხირიშ დობუნას (იოანე 15:19; 17:16). თიმწკუმა ხოლო, მუჟამსით ღორონთიშ მსახურეფს თხოზუნა, თინეფ ძალადობას ძალადობათ ვა პასუხენა. იესოქ დუმოგურეს, ნამდა ნტერეფ ხოლო ოკო მიჸორდან (მათე 5:44; რომაელები 12:17—21).
22 რელიგიეფს ხოლო მიშუძნა ბრალ მილიონობით კათაშ მოსპუალას. „დიდ ბაბილონიშ“, ტყურა რელიგიაშ გურშენ ბიბლია იჩიებ: „თექ ქოძირეს დედამიწას ჸვილირ წინასწარმეტყველეფიშ, წმინდეფიშ დო არძა ჸვილირიშ ზისხირ“. დეფიქრ, მუშენ მარზენა იეჰოვა თე მითითებას, „ჩქიმ ხალხ, გეგშართით დიდ ბაბილონშე“? იეჰოვაშ მსახურეფს მუთუნნერ კავშირ ვა უღნა ტყურა რელიგიაწკუმა (გამოცხადება 17:6; 18:2, 4, 24).
23. მუს ნიშნენს „დიდ ბაბილონშე“ გიშულა?
23 „დიდ ბაბილონშე“ გიშულა ნიშნენს, მუთუნნერ კავშირ ვა მიღდან თიწკუმა. მაგალთო, უმოს მეტ რე საჭირო, ვინემ ხვალე თიშა დარწმუნება, ნამდა ვა ვორეთ თიშ წევრეფ. საჭირო რე, გიბჯოგუათ დო ვარია ქოფთქუათ თი გლახა საქმეეფშე, მუდგას ტყურა რელიგია ორთჷ. თინა ხეს უნწყუნს უზნეობას, ჰარამობას დო მონაწილენს პოლიტიკას (წეკითხ ფსალმუნი 97:10; გამოცხადება 18:7, 9, 11—17). საუკუნეეფ რე, თე ირფელიშ შედეგო, მილიონობით კათაშ სიცოცხლე ისპუ.
24, 25. მუჭო შეულებ იეჰოვაშ გაჩინებაფას, მომღან სიმშვიდე დო სუფთა სინდის?
24 ართ დროს, სოიშახ იეჰოვას გეფჩინებაფუანდით, სატანაშ ქიანას მუდგარენით ჩქი ხოლო ვუკინენდით ხუც. მარა ასე დოფთირეთ ცხოვრებაშ წეს, გიშაჸიდირალიშ რწმენა გეგმიფრჩქინით დო დუდ მევუძღვინით ღორონთის. ჩქინო ქუმორთ „გიშაცოცხლებაშ დროქ იეჰოვაშე“, მუთ თის ნიშნენს, ნამდა მიღნა შინაგან სიმშვიდე დო სუფთა სინდის, მუშენდა მიჩქნა, იეჰოვას გურს ვუხარენთ (საქმეები 3:19; ესაია 1:18).
25 შილებე ართ დროს თიცალ ორგანიზაციაშ წევრ ვორდით, ნამუთ ვაფასენდჷ სიცოცხლეს, მარა გიშაჸიდირალიშ ჭყოლოფათ იეჰოვას შეულებ მაპატუან. ჩქი მთელ გურით ვაფასენთ ღორონთიშ ნაჩუქერ სიცოცხლეს. იეჰოვაშ მარდულობას გიმოფხანტუნთ, მუჟამსით ირნერო ვოცადუთ, ქიმვეხვარათ ხალხის, გეჩინებაფუან ღორონთ, ქიდიტუან სატანაშ ქიანა დო გეხარან ღორონთწკუმა ხოლოშიან ურთიერთობათ (2 კორინთელები 6:1, 2).
არძას გაუცხად სამეფოშ ამბე
26—28. ა) მუ განსაკუთრებულ დავალება მეჩჷ იეჰოვაქ ეზეკიელს? ბ) მუ დავალებას მარზენა იეჰოვა ამდღა?
26 ჯვეშო იეჰოვაქ წინასწარმეტყველ ეზეკიელს დავალ, გაფრთხილკო ისრაელ ხალხ, ნამდა მალას მოსპუნდ იერუსალიმს დო გეუნწყუკო, მუჭო შეულებდეს გინოსქილადა. ეზეკიელ თაშ ვემიქციებუდ-და, ღორონთ ხალხიშ ზისხირს თის მოთხინდჷ (ეზეკიელი 33:7—9). წინასწარმეტყველ აფასენდჷ ხალხიშ სიცოცხლეს, ათეშენ ირფელ გაკეთ, ნამდა გეგნოჩკო თინეფს თე მნიშვნელოვან ამბე.
27 იეჰოვაქ ჩქი ხოლო დუმავალეს, გუვაფრთხილათ ხალხ, ნამდა მალას სატანაშ ქიანას მოსპუნს. ათეშენ საჭირო რე, ქიმვეხვარათ თინეფს, გეჩინებაფუან იეჰოვა, გინასქიდან დო იცხოვრან ახალ ქიანას (ესაია 61:2; მათე 24:14). ჩქი მოკონა, მუთ შემლებნა ირფელ გუვაკეთათ, ნამდა არძას გეგნოფჩათ თე ამბე დო პავლეცალო ფთქუათ: „სუფთა ვორექ არძაშ ზისხირშე. დუც ვა ბზოგენდჷ თქვანო დო გიცხადენდით ირფელს, მუთ ღორონთის ულამ“ (საქმეები 20:26, 27).
28 მარა რე შხვა მხარეეფ ხოლო, სოდეთ საჭირო რე სიწმინდეშ შენარჩუნება. თე საკითხის უკულიან დუც გუვარჩიენთ.
შილებე თექ ხოლო მიგეწონან
ᲑᲠᲔᲚᲨᲐ ᲓᲝᲡᲣᲛᲐᲚᲘᲠ ᲙᲘᲗᲮᲕᲔᲤᲘ
მუშენ ვეგნიბუნა იეჰოვაშ მოწმეეფ ზისხირს?
არსებენს ბრელ არასწორ თვალსაზრის იეჰოვაშ მოწმეეფშე დო ზისხირიშ გინობუნაშე. ქიგეგით სწორ ინფორმაცია თე საკითხწკუმა ჩქინ დამოკიდებულებაშე.
გინაჯინალ კოშკი (ოგურაფალ გიშაშკუმალა)
თინეფქ ცრუ რელიგიაშე გიშელეს
მუჟამს გეთავისუფალ ღორონთიშ ხალხიქ დიდ ბაბილონიშ ტყვეობაშე?
