წერმიდგინით, მუზეუმს რეთ დო ჯვეშ ქანდაკებას ათვალიერენთ. თინეფიშ უმენტაშ დაზიანებულ ვარდა აკოცუმილ რე. მარა ნამთინე ჯგირო რე ჩუალირ დო ჯგირო ირწყებე თიშ თითოულ დეტალ. თქვან გიდის ოკითხუთ: „თენა შხვა ქანდაკებეფს შქას უმოს ახალ ქანდაკება რენო?“. თინა გირაგადნა: „თენა უჯვეშაშ ქანდაკება რე დო რეკონსტრუქცია დღას ვადასაჭირებ“. თქვა ოკითხუთ: „ქო მარა, მუჭო? სოთინ განსაკუთრებულ ადგილს რდუო ჩუალირ?“. გიდ გირაგადნა: „ვარ, თიქ მანგარ ჭვემეფს დო ქარბორიეფს გურზჷ დო თეწკუმა ართო, მუსხირენშა მინდომეს თიშ დაზიანება“. ალბათ გაკვირებულ ქიკითხენთ: „ნოტე, მუ მასალაშე რე კეთებულ?“.

თეშნერო, ბიბლია ხოლო შემლებნა შევადარათ თეცალ განსაკუთრებულ მონუმენტის. თინა არძაშ უჯვეშაშ წიგნ რე. მუშო ოკო რაგად, შხვა უჯვეშაშ წიგნეფ ხოლო არსებენს. ჟიშე მოშინაფილ ნამთინე დაზიანებულ ქანდაკებაცალო დროშ მიკულაქ თე წიგნეფს ხოლო ქიგიტუ მუშ კვალ. მაგალთო, მეცნიერულ საკითხეფშე თექ მოჩამილ აზრეფ ოწინააღმდეგ თანამედროვე ფაქტეფს. თეწკუმა ართო, თექ მოჩამილ სამედიცინო რჩევეფიშ მეჸუნა კოჩის უმოსო აზარალენს, ვინემ ორგუ. თე უჯვეშაშ ხეშნაჭარეფშე ხვალე ფრაგმენტეფ რე დოსქილადირ, მუშენდა თინეფიშ უმენტაშიქ გვალო მედინ ვარდა დეზიან.

ბიბლია გენესხვავებ თე ხეშნაჭარეფშე. ბიბლიაშ ჭარუაქ 3 500 წანაშ წოხოლე დიჭყჷ, მარა თიქ ამდღარშახ თირელ ვა რენ თეშ ქუმორთჷ. საუკუნეეფიშ განმავლობას ბიბლიას ბრელ ნტერ ჸუნდჷ, თის ჭუნდეს, აკრძალურ აფდეს დო აკრიტიკენდეს. თანამედროვე ფაქტეფქ ოძირუ, ნამდა შხვა უჯვეშაშ წიგნეფიშ გინაწონს ბიბლია ირიათო გიწმულუანდჷ დროს (ქოძირით ჩარჩო „ჯვეშ წიგნ რენო ბიბლია დოვარ დროს გიწმულუანს?“).

შილებე ფიქრენდათ, ქორენ დო ვარ ბიბლიურ გურაფეფ ამდღა ხოლო პრაქტიკულ? პასუხიშ მიოღებელო ქოკითხით თქვან დუდის: მუ პრობლემეფიშ წოხოლე გერე კაცობრიობა? ნამ რე თინეფშე არძაშ უმოს ოშქურანჯ? თენეფ შილებე რდას ომეფ, გარემოშ დაბინძურება, დამნაშავეობა დო კორუფცია. მორთ გუვარჩუათ ნამთინე ბიბლიურ გურაფეფ. ქოკითხით თქვან დუდის: ადამიანეფ ბიბლიურ პრინციპეფით ქიცხოვრენან-და, ქიჸუაფუნო მსოფლიოს უჯგუშ მდგომარეობა?

მშვიდობაშ ჸოროფა

„ბედნერეფ რენა მშვიდობაშ ხეშ შემანწყუალეფ, მუშენდა თინეფს ღორონთიშ სქუალეფს ქუდუძახუნა“ (მათე 5:9). „თქვან მხარეშე მუსხით შეიოლებერ რენ, მშვიდობიანო რდათ არძაწკუმა“ (რომაელები 12:18).

ჭყოლოფა, პატიება

„ბედნერეფ რენა თინეფ მით ჭყოლოფას გიმირჩქინანა, მუშენდა თინეფს ხოლო ქიჭყოლოფუანა“ (მათე 5:7). „მუთვინით დო მთელ გურით ქაპატით ართიანს, თიმწკუმა ხოლო, მუჟამსით მიდგაინიშ წინააღმდეგ ჩიულიშ მიზეზ გიღნა. მუჭოთ იეჰოვაქ * გაპატის მთელ გურით, თქვა ხოლო თეშ ქაპატით ართიანს“ (კოლოსელები 3:13).

შხვადოშხვა ეროვნებაშ კათაშ ართობა

ღორონთიქ „ართ კოჩშე გაჭყჷ არძა ერი, ნამდა მთელ დედამიწას ქიდიხორესკო“ (საქმეები 17:26). „ღორონთ ვეგმირჩქინანს გიშაკერძაფას. არძა რჯულშე, მიდგას თიშ შიშ უღჷ დო სიმართლეს ორთუნ, მოსაწონ რე თიშო“ (საქმეები 10:34, 35).

დედამიწაშ მიკოლუაფა

„იეჰოვა ღორონთიქ ადამიან ედემიშ ბაღის ქუდახორუ, ნამდა თიქ დამუშუკო თინა დო ქიმკაჯინკო თის“ (დაბადება 2:15). ღორონთ მოსპუნს თინეფს, მით დედამიწას ანადგურენს (გამოცხადება 11:18).

ჰარამობაშ დო უზნეობაშ მიმართ სწორ დამოკიდებულება

„დუდ ეუჩილითეთ ირნერ ჰარამობას, მუშენდა კოჩიშ სიცოცხლე თიშ ქონებაშა ვა რე დამოკიდებულ“ (ლუკა 12:15) „თქვან შქას ვემიშინუაფდას უზნეობა, მუთუნნერ უწმინდურება დო ჰარამობა, მუთ ვასქვანს წმინდეფს“ (ეფესოელები 5:3).

სიალალე დო ხანდა

„მოკონა, ირფელს პატიოსანეფ ვორდათ“ (ებრაელები 13:18). „მით ხირულენდჷ, მიოტუას ხირუა, შურ დო გურით დო პატიოსანო იხანდას“ (ეფესოელები 4:28).

მიდგას ოსაჭირუნ თინეფიშ მოხვარა

„გურშა ეუქექეთ გურაკოჭირებულეფს, ხუჯ ქუდუკინით სუსტეფს, მუთვინით არძას“ (1 თესალონიკელები 5:14) „გაჭირებაშ დროს მივეხვარათ ქვრივ-ომბოლეფს“ (იაკობი 1:27).

ბიბლია თე პრინციპეფს ხვალე ვემიშინუანსინ, მოგურუანა დუვაფასათ თინეფ დო ირდღაშიან ცხოვრებას გეგმიბრინუათ. ხალხ თე პრინციპეფს გეგმირინუანს-და, მსოფლიოს ვეჸი თიზმა პრობლემეფ, მუნერით ამდღა რე. თაშ ნამდა, არგამა რე, ბიბლიურ პრინციპეფ ფასის ვადინუანს დო მანგარ მნიშვნელოვან რე. მუ ჯგირობუას მოიღანა ბიბლიურ პრინციპეფიშ გიმორნაფა ამდღა?

ართ მანგარ ბრძენ კოჩიქ თქუ: „სიბრძნეშ სიმართლეს თიშ საქმეეფ ოძირანს“ (მათე 11:19). ქათანხმუთო თე სიტყვეფს? სიბრძნეს თქვან კეთებულ საქმეეფ ოძირანს. შილებე გოირჩქინდან კითხვეფქ: ბიბლია ნამდვილო პრაქტიკულ ქორენ-და, უჯგუშობაშა ოკო ვა თირუასო ჩქიმ ცხოვრება? მუჭო მიმეხვარებ თინა თი პრობლემეფიშ გინოჭკირუას, მუთ ამდღა მიღჷ? მორთ გუვარჩუათ თეშ მაგალით.

დორის მანგარ დაკავებულ ადამიან რდუ დო თავისფალ დრო ვა უღუდ. ველუდუნ თეშ, მუსხირენ უბედრობაქ ართო ქიგიოტირხჷ დუდის. მაგალთო, თის ბაღანა ძღაბიქ დუღურ. უკულ თიშ ქორწინებაქ ხოლო აკოცუ დო ფინანსურო ხოლო მანგარო გუჭირდჷ. თინა იჩიებ: „აზრის ვა ვორდჷ მუ ოკო ვაკეთკო. ვართ სქუა პჸუნდჷ, ვართ ქომონჯ დო ვართ ჸუდე მიღუდ. სიცოცხლეშ ხალის მივოდინე, ძალეფქ ქეშმელუ დო ვართ მომავალიშ იმენდ მიღუდ“.

თეიშახ დორისის მუშ დუდშა დღას ვეგმუცადებ თე სიტყვეფიშ ჭეშმარიტება: „ჩქი სუმენეჩდოვით წანას ფცოცხლენთ, ჯგირ ჯამრთელობა ქომიღნან-და, ოთხონეჩის ხოლო, მარა თე წანეფ გაჭირებათ დო ოწუხებელით რე ეფშა; მეფურინუნს დო ჩქი ხოლო თის მეპჸუნთ“ (ფსალმუნი 90:10).

დორისის მუშ ცხოვრებას არძაშ უმოს რთულ პერიოდის, ბიბლიაქ ეუქექუ გურშა. თიქ მუშ დუდშა გეგმოცად,  ნამდა ღორონთიშ სიტყვათ ხემძღვანელობას ჯგირ შედეგეფ მოუღ. თეშ უკულიან სუმ სტატიას მოჩამილ რე, თინეფიშ მაგალითეფ, მიდგაქ ბიბლიათ იხემძღვანელეს დო თიშ საშვალებათ მერუეს პრობლემეფს. თინეფქ მუშ დუდშა გეგმოცადეს, ნამდა ბიბლია თიცალ შეუდარებელ დო ძვირფას რე, მუჭოთ სტატიას დუდის მოშინაფილ ქანდაკება. თინა გენესხვავებ თი წიგნეფშე, ნამუთ დროშ მიკულაწკუმა ართო იჯვეშებ დო ვეგმირინე. მუ რე თიშ მიზეზ, ნამდა ბიბლიას თეცალ ჯგირ შედეგეფ მოუღ? თინა ხომ ვარ, ნამდა თექ ღორონთიშ აზრეფ რე ინოჭარილ დო ვართ ხოლო ადამიანიშ? (1 თესალონიკელები 2:13).

შილებე თქვა ხოლო ორწყეთ, ნამდა ცხოვრება ხეთე მიკურს დო ეფშა რე პრობლემეფით. მუჟამსით ირდღაშიან პრობლემეფ გიგოტირხნა დუდის, სო გორუნთ გურიშექექაფას დო სანდო რჩევეფს?

მორთ გუვარჩუათ, მუჭო შეულებ ბიბლიას პრაქტიკულო მიგეხვარან. თის შეულებ დუგოგურუან ...

თე სუმ საკითხ უკულიან სტატიას იჸუაფ გარჩიებულ.