იესო ხალხის ოგურუანდჷ, მშვიდობა უღდესკო ართიანწკუმა. მარა ართშა თიქ მოწაფეეფს თეცალ სიტყვეფ უწუ: „ვეფიქრათ, ნამდა დედამიწაშა მშვიდობაშ მაღალშა მოფრთჷ, მშვიდობაშ ვარინ, ყამაშ მაღალშა მოფრთჷ; მოფრთჷ, ნამდა უთანხმოება გემშებღე მუმა დო სქუაშ შქას, დიდა დო ოსურსქუაშ შქას, ნოსა დო დიანთილიშ შქას“ (მათ. 10:34, 35). მუს ნიშნენს იესოშ თე სიტყვეფ?

იესოს ვაკოდ, ოჯახიშ წევრეფ ართიანს წუკინდინუკო, მარა უჩქუდ, ნამდა მუშ გურაფეფ ნამთინე ოჯახის თეცალ შედეგის ქუმუღანდჷ. თაშ ნამდა, მიდგას იესოშ მოწაფეობა დო ნათუა ოკოდ, საჭირო რდჷ, უჩქუდკო, ნამდა ოჯახიშ წევრეფს შილებე ვახიოლესკო თე გადაწყვეტილებაქ. თინა მეუღლეშ ვარდა ოჯახიშ წევრეფიშ მხარეშე წინააღმდეგობას ქეშეხვადუდ-და, გუჭირდუდ იესოშ გურაფეფიშ ართგურო მეჸუნა.

ბიბლია ქრისტიანეფს ელუჩანს: „მშვიდობიანო რდათ არძაწკუმა“ (რომ. 12:18). მარა იესოშ გურაფეფქ შილებე ყამაცალქ იჸუას ნამთინე ოჯახშო. თაშ თიმ დროს ხვადუ, მუჟამსით ოჯახშე ართ-ართ ღებულენს იესოშ გურაფეფს, მარა შხვა წევრეფ ვა ღებულენა ვარდა ვა მოწონა თე გურაფეფ. თეცალ შემთხვევას თინეფქ შილებე „ნტერო“ გინართან თის, მით გურაფლენს ჭეშმარიტებას (მათ. 10:36).

იესოშ მიმაჸუნალეფ, მით რელიგიურო გორთილ ოჯახეფს ცხოვრენა, მინშა შეხვადნა თიცალ სიტუაციეფს, ნამუთ გიმოცადუნს იეჰოვაშ დო იესოშ მიმართ თინეფიშ ჸოროფას. მაგალთო, იეჰოვაშ მოწმე ვა რენ ფერ ოჯახიშ წევრეფქ შილებე თის დანძალან, მონაწილება მიღას რელიგიურ დღესასწაულეფს. თეცალ გამოცდაშ დროს მიშ მხარეს დეკინენს თინა? იესოქ თქუ: „მიდგას მუმა ვარდა დიდა ჩქიმდე უმოსო უჸორს, ჩქიმ ღირს ვა რე“ (მათ. 10:37). მუშო ოკო რაგად, იესოშ თე სიტყვეფ ვა ნიშნენს, ნამდა მოწაფეეფს მშობლეფ ნაკლებო ოკო უჸორდესკო. თინა ოგურუანდჷ, მუჭო გიორინესკო ცხოვრებას პირველ ადგილს თინა, მუთ არძაშ უმოს მნიშვნელოვან რე. მუჟამსით ოჯახიშ წევრეფ მოწინააღმდეგნა, მუშო ოკო რაგად, კინ ჯვეშობურო მიჸორა თინეფ, მარა, თეწკუმა ართო, მარჩქილენა, ღორონთიშ ჸოროფა უმოს მნიშვნელოვან რე.

არგამა რე, ოჯახშე წინააღმდეგობაქ შილებე მანგარ გურჭუა ქუმმორინუან, მარა იესოშ მიმაჸუნალეფს ოკო შუდან თიშ სიტყვეფ: „მით ვეჭოფუნს მუშ წამებაშ ძელს დო ვეკმაჸუნუ, ჩქიმ ღირს ვეჸუაფ“ (მათ. 10:38). შხვა სიტყვეფით ქოფთქუათინ, ქრისტიანეფ ოჯახშე წინააღმდეგობას უჯინენა მუჭოთ ქრისტეშ მოწაფეობაშო გინაღალარ განსაცდელეფიშ ნაწილს, ნამდგას მოთვინებათ ურზუნა. თეწკუმა ართო, თინეფს იმენდ უღნა, ნამდა მუნეფიშ ჯგირ საქციელ ქიმეხვარებ იეჰოვაშ მოწმე ვა რენ ფერ ოჯახიშ წევრეფს, დითირან აზროვნება დო დეინტერესან ბიბლიურ ჭეშმარიტებათ (1 პეტ. 3:1, 2).