„ახალ კრებაშა გინულაშენ მანგარო ბნერვიანენდ, მუშენდა ვამჩქუდ, მუჭო მემღენდეს დო ქუმაშიდ დო ვარ თექ მეგობრეფი“, — იშინანს ალენი. * თიშ ახალ კრება 1 400 კილომეტრიშ მაშორას რდუ.

თქვა ხოლო შურო ქორეთ ახალ კრებაშა გინნაულა-და, ალბათ ქუგაჸინა თენა გამორსებული. მუ მიგეხვარებნა მერჩქვანას? მუშ კეთება შეილებნა, მერჩქვანაქ მანგარო გაიჭირდეს-და? მუჭო შეილებნა თინეფიშ მოხვარა, მით თქვან კრებაშა რე ახალ გინულირი?

დეფიქრით თე მაგალითშე: მუჟამსით ჯას გინმორგუნან, თის უჭირს ახალ დიხაშ მერჩქვანა. ჯაშ ეჸოთამაშ დროს თის ფოსვეფს ელმუჭკირანა, ნამდა გინაღალარო ადვილქ ქიჸუას. გინორგუალაშ უკულ თინა ახალშო უტენს ფოსვეფს. თეგვარო, ახალ კრებაშ მერჩქვანაქ შილებე თქვა ხოლო გაიჭირდან. ჯვეშ კრებას „ფოსვეფ“ გოტებულ გაფდეს, შხვანერო ქოფთქუათინ, რჸუნდეს მეგობრეფ დო გიღდეს სულიერ გეგმა. ასე თქვა ახალ ფოსვეფ ოკო გუტუათ, ნამდა ქიმიარჩქვანათ ახალ კრებას. მუ მიგეხვარებნა თეს? მორთ, გუვარჩუათ მუსხირენ ბიბლიურ პრინციპი.

ღორონთიშ სიტყვას ირიათო კითხულენსინ ფერ პიროვნებაშე ბიბლია იჩიებ, ნამდა „იჸუაფ წყურგილეწკუმა რგილ ჯაცალო, ნამუთ მუშ დროს მიკიღანს ნაყოფის დო ნამუშ ფურცელეფ ვა ხუმუ; ირფელს, მუდგას ორთუნ, ხეგომორძგვილ იჸუაფ“ (ფსალმ. 1:1—3).

ჯაქ ვა დოხუმასინ, წყარქ ვა მაკორდას ოკო. თეგვარო ქრისტიანქ ხოლო სულიერო გემანგარასინ, ღორონთიშ სიტყვა ოკო იგურუას. თიქ ირდღას ოკო იკითხას ბიბლია დო ვა გაჩილითუას კრებაშ შეხვალამეფი. ირიათო გიღდან ჩვევას ოჯახურ თაყვანიშცემა დო პირად გურაფაშ ჩატარება. ახალ კრებაშა გინულაშ უკულ კინ თი სულიერ გეგმას ოკო მიაჸუნათ, მუსით ადრე მეჸუნდით.

„მით წყარს შხვას ხვეიანო არზენსინ, მუს ხოლო ხვეიანო აღვენუ წყარ ოშუმალო“ (იგავ. 11:25).

ახალ კრებას უმოს მალას ქიმიარჩქვანუთ, მუჟამსით ბოლოშა დეხარჯებუთ მსახურებას. კევინ, ნამუთ უხუცესო მსახურენსინ, იჩიებ: „მა დო ჩქიმ ოჯახობაქ ახალ კრებაშა გინულაშ უკულ ხეთეშე დამხმარე პიონერო ქიდიბჭყით მსახურება. თექ მანგარო მიმეხვარეს. მალას გეფჩინებაფეთ და დო ჯიმალეფ, პიონერეფ დო თექიან ტერიტორია“. ართ ჯიმა როჯერქ თიცალ ადგილშა გინორთ, ნამუთ მუშ ოცხოვრებელშე 1 600 კილომეტრიშ მაშორას რდუ. თინა იჩიებ: „ახალ კრებაშ მიორჩქვანაფალ არძაშ უჯგუშ საშვალება რე, მუთ შილებე ხშირას გილართე მსახურებაშა. თეს გეძინელ, ქაძირეთ უხუცესეფს, ნამდა მზათ რეთ გაკეთათ შხვადოშხვა საქმე. მაგალთო, ქიმეხვარათ დარბაზიშ დონწყუალას, ჩირთუნ თიმწკუმა შხვეფიშ მანგიორო გაკეთათ დავალებეფ ვარდა და დო ჯიმალეფ სამეფო დარბაზშა ქიმიჸონათ. მუჟამსით და დო ჯიმალეფ ქოძირნა, ნამდა დუდგინოდვალირო მსახურენთინ, უმოსო დეგეახლოებნა“.

„თქვა ხოლო გეფართოვით“ (2 კორ. 6:13).

გეფართოვით ჯიმალურ ჸოროფას. მუჟამსით მელისაქ მუშ ოჯახწკუმა ართო ახალ კრებაშა გეგნორთუნ, თინეფს მიზანო უღდეს ახალ კრებაშ წევრეფწკუმა ხოლოშიან ურთიერთობა. თინა იჩიებ:  „კრებაშა ადრე მიფშით დო შეხვალამაშ თებაშ უკულ ხოლო ფსკიდუდით სამეფო დარბაზის. თე ირფელქ ხე შეუნწყუ ხოლოშიან ურთიერთობაშ გავითარებას“. თინეფქ კრებაშ წევრეფიშ სახელეფ ხოლო მალას ქიმკიწონეს. თეს გეძინელ, ჸუდეშა აპეჯენდეს და დო ჯიმალეფს დო თექ ხე შეუნწყუ მეგობრობაშ გავითარებას. მელისა გითმუძინანს: „ჩქი ართიანიშ ტელეფონიშ ნომერეფ ქენიბჭარით. თენა საშვალებას მარზენდეს დევეკავშირითკო ართიანს დო სულიერ საქმეეფ დაბგეგმითკო“.

უჩინებ ხალხწკუმა ჩიებაშ დოჭყაფა ქოიჭირან-და, შეილებნა გუძიცუათ თინეფს, თიმწკუმა ხოლო, მუჟამსით იშონდოიშენ ვა რეთ თეშ ხასიათის. თეცალ საქციელით შხვეფს ჩქინწკუმა ურთიერთობა უმოს ეფ აჸინა. თეს გეძინელ, ბიბლიას ჭარ, ნამდა „ხიოლით ეფშა თოლეფ გურს ახარენს“ (იგავ. 15:30). რეიჩელი, ნამუთიქ შხვა კრებაშა გინორთუნ, იჩიებ: „ირო მორდებუან ვორდი. მინშა ჩქიმ დუც ვანძალენქ და დო ჯიმალეფწკუმა ჩიება ქიდიპჭყე. თიცალ მიდგარენს ბგორუნქ, მით სამეფო დარბაზის ხვალე ხე დო მითინწკუმა ვა რაგადანს. თე პიროვნება შილებე ჩქიმცალ მორდებუან რდას“. თაშ ნამდა, ქეცადით მიზანო გიღდან ირ შეხვალამაშ დოჭყაფაშა ვარდა თებაშ უკულ გეჩინებაფუათ ახალ მაუწყებელი.

დუდშე შილებე გოხიოლდან ახალ ხალხიშ გაჩინებაფა, მარა დროშ ხანიშ უკულ თე ირფელქ ჩვეულებრივ მუდგარენო გინირთას. თაშ ქორენ-და, უმოსო ქიმინდომით, გირჩქინათ ახალ მეგობრეფი.

ნამთინე ჯას მეტ დრო ოკო, ახალ გარემოს ქიმიარჩქვანას დო ფოსვეფ გოუტუას. თეგვარო, ახალ კრებაშა მერჩქვანა არძას ართნერო ვეგშალე. შხვა კრებაშა ქორეთ გინულირ დო დიო ხოლო ქოიჭირა მერჩქვანა-და, თე ბიბლიურ პრინციპეფ მიგეხვარებნა:

„თაშ ნამდა, ვემვოტუათ ჯგირიშ კეთება, მუშენდა მუშ დროს მიბღენთ შედეგის, მუჟამსით ვა ფშურდუთ“ (გალ. 6:9).

მერჩქვანას უმოს დრო ოკო, ვინემ თქვა ფიქრენთ. მაგალთო, გალაად თებულ ბრელ მისიონერ მუსხირენ წანას სქიდუ თი ტერიტორიას, სოდეთ დანიშნეს დო უკულ მეურს მუშ ქიანაშა სტუმარო. თენა ოხვარ თინეფს, ქიმიარჩქვანან თექიან და დო ჯიმალეფს დო კულტურას.

ართ ჯიმა ალეხანდროს შხვადოშხვა კრებაშა მუსხირენშა აჸუ გინაულარქ. თის ჯგირო უჩქ, ნამდა მერჩქვანას დრო ოკო. თინა იჩიებ: «მუჟამსით ბოლოს გინოფრთით შხვა კრებაშა, ჩქიმ ოსურქ თქუ: „ჩქიმ არძა მეგობარ ჯვეშ კრებას რე!“». თიქ ქუგაშინ მუშ ოსურს, ნამდა ზუსტას თეშნერ სიტყვეფ თქუ ჟირ წანაშ წოხლე ხოლო, მუჟამსით ახალ კრებაშა გინორთეს, მარა უკულ თიქ შხვეფით დეინტერეს დო თინეფქ თიშ მეგობრეფქ ქიჸუეს.

„ვა თქუა, ულირ დღალეფ ასეიანს უჯგუნია, მუშენდა სიბრძნეს ვაძირანს თე სიტყვეფი“ (ეკლ. 7:10).

ვეშუდარათ ართიანს ჯვეშ დო ახალ კრება. მაგალთო, თქვან ახალ კრებას რენან თი ჯიმალეფ, შილებე უმოს მორდებუან ვარდა ურთიერთობაშ მოჸოროფე რდან. არძას მოკონა შხვეფქ ქოძირან ჩქინ ჯგირ თვისებეფ, თეგვარო თქვა ხოლო შხვეფიშ ჯგირ თვისებეფს მიაქცით ყურადღება. ნამთინეს, მიდგაქ შხვა კრებაშა გინორთუნ, სერიოზულო  აჸუ დაფიქრებელქ თე შეკითხვაშე: «დასურო ქომიჸორსო „მთელ საჯიმალო“?» (1 პეტ. 2:17).

„ქითხით დო ქუმგაჩამნა“ (ლუკ. 11:9).

ვემიოტუათ თე საკითხშე ლოცვა. დეივიდ, ნამუთ უხუცესო მსახურენსინ, იჩიებ: „ვეცადათ თე პრობლემაშ ხვალე მოგვარებას. რე თიცალ საკითხეფ, ნამუშ კეთება ხვალე იეჰოვაშ მოხვარათ შემალებენა, თაშ ნამდა ქილოცით თეშ გურშენ!“. ჟიშე მოშინაფილ რეიჩელი იჩიებ: «მუჟამსით მა დო ჩქიმ ქომონჯ თიშნერო ბგინაფლენდით დუც, ითამ კრებაშ წევრეფ ვა ვორდითინ, იეჰოვას ლოცვას კონკრეტულო ვურაგადუდით: „ქორთხინთ ქუგმოგებაფეთ, თეშ ხომ ვეფქციებუთ, ნამდა და დო ჯიმალეფს ოძნელნა ჩქინწკუმა ურთიერთობა“. თეშ უკულ ვოცადუდით და დო ჯიმალეფწკუმა მეტ დრო გამტარებდესკო».

მშობლეფი, თქვან ბაღანეფს მერჩქვანა ქოუჭირან-და, ართო ქილოცით თეშ გურშენ. ქიმეხვარით თინეფს კრებაშ გალე ხოლო უღდან ურთიერთობა თანაქრისტიანეფწკუმა დო თინეფ შქას მეგობრეფ გირჩქინან.

მუჭო შეილებნა თინეფიშ მოხვარა, მით თქვან კრებაშა რენა გინულირ? ქეცადით მეგობრულ ურთიერთობაშ გავითარებას. თექ ჯგირო გეგშაირთანინ, თქვან დუდ თინეფიშ ადგილს ქიგიორინეთ. დეფიქრით, მუნერ საქციელ გახიოლედეს დო თაშ ქიმიქცით (მათ. 7:12). ქუდაპეჯით ახალგინულირეფ ოჯახურ თაყვანიშცემაშა ვარდა ართო ქუჯინით JW მაუწყებლობას დო ართო მეუთ ოქადაქებშა. თინეფს ჸუდეშა ქუდაპეჯენთ-და, თენა დღას ვა გაჭყორდუნა. ხოლო მუჭო შეილებნა ახალგინულირეფიშ მოხვარა?

კარლოსი იჩიებ: „მუჟამსით ახალ კრებაშა გინოფრთითინ, ართ დაქ ქომჩეს თი მაღაზიეფიშ სია, სოდეთ პროდუქტეფ ძვირ ვა ღირუდ. თექ მანგარო მიმეხვარეს“. ნამთინეს შილებე დესაჭირას თიშე მოხვარაქ, მუჭო მიკიქუნან თქვან კლიმატის მეურენ თეშ. თეს გეძინელ, ქადაქება ვა გუჭირდუნა, მუჟამსით ქივეჩიებუთ ჩქინ მხარეშ ისტორიას ვარდა გეუნწყათ, მუ წანს თაქიან ხალხის.

ალენი, ნამუთ დაჭყაფუს მიფშინეთინ, დახე ართ წანა ქორე, ახალ კრებას რენ. თინა იშინანს: „დუდშე ჩქიმ დუც ვანძალენდ და დო ჯიმალეფწკუმა ურთიერთობას. მარა ასე ბედნერ ვორექ, მუშენდა თინეფ ჩქიმ ოჯახიშ წევრეფცალ რენა“. ალენქ ქიმეხვად, ნამდა კრებაშე გინულათ მეგობრეფ ვა უდინუაფ. შხვა კრებაშა გინულათ, თიქ ქიშუ ახალ მეგობრეფ, მით ირიათო თიშ გვერდით იჸუაფუნა.